Kwamamaza

Urunturuntu hagati ya Padiri Ubald Rugirangoga na Diyosezi ya Kabgayi

Yanditswe kuya 22-09-2016 saa 16:20' na IGIHE


Padiri Ubald Rugirangoga ukunzwe n’abayoboke Gatolika ndetse n’ab’ayandi madini kubera ibikorwa bye by’umwihariko isengesho akunda gukora yemeza ko Yezu arikirizamo abarwayi ndetse akaritangiramo n’imigisha myinshi, biravugwa ko yaba yarabujijwe gutanga inyigisho ze muri Diyosezi ya Kabgayi.

Rugirangoga Ubald yavukiye ahahoze ari muri Perefegitura ya Cyangugu ari naho akorera. Mu Rwanda azwi nk’umunyamasengesho n’umukozi w’ibitangaza usenga benshi bagakira, bikagaragarira mu bitambo bya Misa byitwa isengesho ryo gukizwa aturira muri Paruwasi zinyuranye mu gihugu.

Uyu mupadiri ngo yaba atabyumva kimwe na Musenyeri wa Diyosezi ya Kabgayi, Smaragde Mbonyintege, ku buryo ngo yanamubujije gutangira inyigisho ze muri Diyosezi ayobora.

Padiri Ubald yabwiye KT Press ko hari ubwo yatumiwe n’Ababikira muri Diyoseze ya Kabgayi nyuma bakamubwira ko batakimwakiriye kuko Musenyeri Mbonyintege yababujije.

Yagize ati “Nari natumiwe n’ababikira bo muri Diyosezi ya Kabgayi ngo twifatanye mu isengesho, nyuma bambwira ko ryahagaritswe na Musenyeri kubera impamvu ntigeze nshaka kumenya.”

Padiri Ubald ngo yabwiwe ko atemerewe gukoreshereza isengesho muri Diyosezi ya Kabgayi

Padiri Ubald yatangaje ko ibihe nk’ibi mu ivugabutumwa bibaho kandi yabyiteguye ko hari abadakunda ibyo akora ariko ngo ntibamubangamiye kuko ari mu mugambi w’Imana.

Ati “Icy’ingenzi ni uko nta kibazo mfitanye n’Abakirisitu, ndabizi ko igihe cye kizagera akumva uko ubuntu bw’Imana bukora. Yifata nk’umuntu ufite byinshi byo gukora aho gusobanurira abantu ubuntu bw’Imana. Igihe cye kizagera kandi azabimenya.”

Mu kiganiro IGIHE yagiranye na Musenyeri Mbonyintege, yavuze ko Padiri Ubald atigeze amusaba kujya gukorera isengesho muri Diyosezi ngo amubuze.

Yagize ati“Nta kibazo na kimwe mfitanye nawe, ntabyo yigeze ansaba kandi sinigeze mubuza.”

Ku bijyanye no kuba ababikira baratumiye Ubald ariko akababuza, Musenyeri Mbonyintege yagize ati “Ibyo birekere aho ni ibyacu interne (imbere).”

Musenyeri Mbonyintege, yavuze ko Padiri Ubald atigeze amusaba kujya gukorera isengesho muri Diyosezi ngo amubuze

Uretse isengesho ryo gukiza Padiri Ubald akora, azwiho kuba yaratangije Gacaca Nkirisitu muri Paruwasi ya Mushaka yayoboye nyuma ya Jenoside, iyo gahunda yaje gusakara muri Kiliziya zo mu Rwanda, yari igamije gufasha abayoboke b’iryo dini, kwemera ibyaha, kwirega no gusaba imbabazi.

Icyo gikorwa cy’isanamitima cyatumye benshi bemera uruhare bagize muri Jenoside bagasaba imbabazi abo bahemukiye. Cyageze no mu zindi paruwasi nka Ntendezi, Nyamata,Mashyuza, Shangi, Nkanka, Mugombwa ndetse no muri Diyosezi ya Butare.

Ubald yatoranyijwe ku rwego rw’igihugu mu barinzi b’igihango 17 bari mu Mujishi wa “Ndi Umunyarwanda” bashimiwe ko bimakaje ubumwe n’ubwiyunge.

Inkuru iracyacukumburwa…

Indi nkuru wasoma: Padiri Ubald uvugwaho gukora ibitangaza ni muntu ki?


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved