00:00:00 IGIHE NETWORK KN KINYARWANDA EN ENGLISH FR FRANCAIS

Umuryango w’abayisilamu ba Ahmadiyya ku Isi ugiye gutangira igiterane cy’iminsi itatu

Yanditswe na Muhonzire Sylvine
Kuya 6 Kanama 2021 saa 03:42
Yasuwe :
0 0

Umuryango w’abayisilamu ba Ahmadiyya ku Isi ugiye gutangira igiterane ngarukamwaka cy’iminsi itatu cyiswe Jalsa Salana kizaba kiba ku nshuro ya 126, mu rwego rwo kurushaho gushimangira umubano wabo n’Imana.

Iki giterane kiratangira kuri uyu wa Gatanu tariki 6 Kanama 2021 kizasozwe tariki 8 Kanama 2021, kikaba kibera mu mujyi wa Hampshire mu Bwongereza aho icyicaro gikuru cy’uyu muryango giherereye.

Kubera icyorezo cya Covid-19, iki giterane nticyabaye umwaka ushize wa 2020 ndetse icy’uyu mwaka kiritabirwa n’abantu 4000 gusa bakingiye Covid-19 kandi bafite icyemezo ko nta bwandu bwayo bafite, batari hejuru y’imyaka 65 kandi batari munsi ya 18.

Abandi bayisilamu baragikurikirana hifashishijwe ikoranabuhanga ku bitangazamakuru bitandukanye, aho muri Afurika kiri buce kuri televiziyo 13 harimo BTN TV yo mu Rwanda na BETV y’i Burundi.

Jalsa Salana ni igiterane ngarukamwaka cy’abayisilamu bo mu muryango w’ab-Ahmadiyya cyari gisanzwe gihuza abantu hafi 40.000 baturutse mu bihugu 115 byo ku Isi, harimo abayobozi batandukanye, abadiplomate, abayobozi b’ayandi madini.

Kiyoborwa n’umuyobozi mukuru w’uyu muryango ku Isi, Hazrat Mirza Masroor Ahmad, ndetse agatanga ubutumwa mu minsi itatu yose y’igiterane.

Uyu muryango w’abayisilamu baba Ahmadiyya ufite abayoboke mu bihugu birenze 250 harimo n’u Rwanda, ukaba ari umwe mu bice by ’abayisilamu ku Isi kimwe nkuko havugwa aba-Sunni n’aba Shia.

Watangiye mu 1889 utangijwe na Hazrat Mirza Ghulam Ahmad ahitwa Qadian mu Buhinde, ugenda waguka ugera no mu bindi bihugu ndetse igiterane cya mbere (Jalsa Salana) cy’aba bayisilamu cyabaye mu 1891 cyitabirwa n’abantu 75.

Kubera ibibazo by’amadini n’imyizerere mu Buhinde, abayisilimu babaga muri iki gihugu bagiye kuba muri Pakistan, uyu muryango wimukirayo na bwo haza kuba ibibazo byatumye uyu muryango wa Ahmadiyya wimurira icyicaro cyayo mu Bwongereza mu 1984, ubwo umuyobozi wayo mu rwego rw’isi yahimukiraga.

Umusigiti wa mbere mu Bwongereza ukaba warubatswe 1913 ubu ukaba ufite amashami agera mu 130 ku Isi hose.

Jalsa Salana iba buri mwaka mu bihugu bitandukanye nka Ghana, Nigeria, u Budage, u Busuwisi, Canada, Leta Zunze Ubumwe za Amerika, Fiji, Bangaldesh, Australia, Singapore, u Buyapani n’ahandi.

Igiterane cya Jalsa Salana kizamara iminsi itatu kibera mu Bwongereza abandi bazajya bagikurikira kuri za Televiziyo
Hazrat Mirza Masroor Ahmad, Umuyobozi w'Umuryango w'Abayisilamu baba Ahmadiyya ageza ijambo ku bitabiriye igiterane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .