Umuramyi Muhoza Janvier wamamaye muri ‘Izabikora’ yasohoye album ye ya mbere

Yanditswe na Uwiduhaye Theos
Kuya 13 Ugushyingo 2019 saa 09:17
Yasuwe :
0 0

Umuramyi Janvier Muhoza wamamaye mu ndirimbo yise ‘Izabikora’ yakunzwe n’abatari bake, yasohoye album ye ya mbere yanitiriye iyi ndirimbo ye yamubereye ikiraro n’isoko y’igikundiro ku bakunda kuramya no guhimbaza Imana.

Iyi album ya Janvier Muhoza yise ‘Izabikora’ yagiye hanze mu ntangiriro z’iki cyumweru igizwe n’indirimbo umunani ziganjemo izo kuramya no guhimbaza nk’uko ariwo mujyo yahisemo mu muziki we.

Yabwiye IGIHE ko indirimbo zose ziri kuri iyi album ye ya mbere zifite amateka yihariye.

Yagize ati “Indirimbo zose ziriho zifite amateka yihariye yo kuba zuje ubutumwa bwo kugarura abantu mu nzira y’agakiza kandi zigatanga ihumure. Nagiye nzihabwa bitewe n’ibihe ndi gucamo Imana ikabimperamo indirimbo.”

Muhoza ateganya kumurika album ye mu 2020, ubu yashyize hanze CD zayo ziri kugurishirizwa kuri Zion Temple mu Gatenga aho asanzwe akorera umurimo w’Imana.

Uyu musore aherutse kubwira IGIHE ko iyi ndirimbo yititiriye album ye ifite amateka akomeye kuko yavuye mu ihishurirwa ryo kuyihimba ari mu bihe byo gusenga mu 2011.

Icyo gihe yatekerezaga kujya kwiga muri kaminuza ariko abura buruse yo kwiga muri kaminuza ya leta kubera uburwayi yagize bugatuma agira amanota mabi kandi yari umuhanga, akagira igikomere ku mutima.

Yavuze ko Imana yabimwibukije akumva atsinzwe bigatuma yiringira ko nyuma y’ukuntu Uwiteka yamwitayeho, yumva ko n’ibindi izabikora, biza kuba ibitangaza kuri we ubwo ababyeyi n’abavandimwe babonaga akazi akabasha kujya kwiga muri kaminuza.

Muhoza yize ibijyanye n’Imibare, Ubutabire n’Ibinyabuzima (MCB) mu mashuri yisumbuye.

Kaminuza yayitangiriye i Butare ariko ishuri yigagagamo riza gufungwa, akomereza muri Ines Ruhengeri ari naho yasoreje Icyiciro cya Kabiri cya Kaminuza.

Muhoza yatangiye kumenyekana mu mwaka wa 2015 ari nabwo yatwayemo igihembo gihabwa umuhanzi mushya mu ruhando rw’umuziki uhimbaza Imana mu bizwi nka Groove Awards Rwanda.

Iyi album ye nshya iriho indirimbo zirimo ; ‘Izabikora’, ‘Uransekeje’, ‘Ab’iki gihe’, ‘Wowe Yesu’, ‘Iratwibutse’, ‘Mfite ibyiringiro’, ‘Ndatuje’ na ‘Ubutumwa’.

-  Reba ‘Izabikora’, indirimbo ya Janvier Muhoza yamuzamuriye izina

Muhoza yatangiye kumenyekana mu 2015, umwaka yahawemo igihembo cy'umuhanzi mushya muri Groove Awards Rwanda
Umuramyi Muhoza Janvier yamamaye mu ndirimbo yise 'Izabikora'
Album nshya ya Muhoza Janvier iriho indirimbo umunani

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza