Kwamamaza

Musenyeri Mbanda yabonye umusimbura

Yanditswe kuya 21-09-2016 saa 20:52' na Ntakirutimana Deus


Musenyeri Mbanda Laurent wa Diyoseze y’Abangilikani ya Shyira mu yahoze ari Perefegitura ya Ruhengeri usanzwe uzwi mu bikorwa byo gufasha abana aho arera abagera kuri 28, yabonye uzamusimbura kuri uwo murimo azasoza muri 2019.

Pasiteri Samuel Mugiraneza niwe watorewe kuzasimbura Musenyeri Mbanda Laurent ubwo azaba agiye mu kiruhuko cy’izabukuru.

Mu kiganiro IGIHE yagiranye na Musenyeri Mbanda, yavuze ko yahisemo gusaba ko hatorwa uzamusimbura hakiri kare, mbereho imyaka ibiri ngo ajye mu kiruhuko cy’izabukuru kuko ngo yifuza ko uwo mushya azabanza agasobanukirwa n’inshingano ze, akamenyana n’abantu ndetse akubaka ubucuti n’ibindi.

Ubusanzwe uzasimbura umushumba runaka ashobora gutorwa mbere mu gihe kiri hagati y’amezi atandatu na 24, ariko we atowe mbere ho hafi imyaka itatu.

Mu gutora, hareberwa ubuhanga afite mu bijyanye n’iyobokamana (tewolojiya) ndetse n’uko yifata mu bya gipasitori, hakurikijwe ibigenwa na bibiliya ndetse n’uko yashobora kuyobora diyoseze.

Musenyeri Mbanda yemeza ko iryo torero ryamwohereje muri Amerika aho yarimo gukorera impamyabumenyi y’ikirenga (Doctorat) mu by’iyobokamana ndetse akaba yari amaze n’imyaka 15 ari umupasitori.

Ati “ Yatoranyijwe muri babiri, ntekereza ko ashoboye afite uburambe ni umupasitori koko usobanukire umurimo wa gipasitori yari amazemo imyaka irenga 15.”

Pasiteri Samuel Mugiraneza azimikwa nka Musenyeri w’Umusimbura muri Werurwe 2017, abe afite inshingano zose za Diyoseze ya Shyira, aho azahabwa n’inkoni y’ubushumba muri Werurwe 2019, mu gihe Musenyeri Mbanda yari kuzasoza imirimo ye mu Ukwakira 2019.

Ni iki Mbanda yishimira ko yagejeje ku gihugu?

Kuva yatorerwa kuyobora Diyoseze ya Shyira asimbuye Musenyeri John Rucyahana muri 2010, yafashije guteza imbere uburezi ku buryo hashinzwe ibigo by’amashuri y’abana b’incuke 217 muri iyo diyoseze yigamo abasaga ibihumbi 20.

Hashinzwe kandi ishuri ryigisha imyuga ryigamo abasaga 900, hubakwa hoteli imwe n’isoko rya kijyambere mu Mujyi wa Musanze.

Mbanda yafashije abana icumi barangije kubona buruse zo kwiga muri Leta Zunze ubumwe za Amerika aho yabaye igihe. Abapasiteri nabo bamuboneyeho umugisha babasha kwiga, harimo batandatu bize icyiciro cya gatatu cya Kaminuza (masters) n’icumi barangije icya Kabiri (Bachelors) ndetse n’abandi 250 bize amasomo atandukanye arimo n’ay’iyobokamana.

Musenyeri Mbanda arera abana 31

Mbanda yabyaye abana batatu barimo babiri bakora muri Amerika n’umwe ukora i Kigali, ariko guhera muri 2006 yafashe abana 28 arerera mu nzu yabubakiye mu Mujyi wa Musanze, aho bitabwaho ku kintu cyose bakenewe, barihirirwa mashuri meza n’ibindi.

Muri bo ufite imyaka myinshi ni 16 naho umuto akaba afite umunani. Mu minsi iri imbere ngo azashaka uburyo uzaba ufite abo bafitanye amasano ba hafi yajya mu miryango, abatazayibona azakomeze kubarerera muri urwo rugo.

Mu bindi yishimira ni uko we n’itorero batanze ubutumwa ngo hagakizwa abantu benshi ndetse bakigisha benshi inyigisho zibafasha mu buzima bwabo bwa buri munsi.

Abaturage batishoboye bishyuriwe mitiweli ku buryo buri mwaka baba basaga 180, ndetse n’abahawe inka zatanzwe mu myaka itandukanye, bamwe muri bo barimo abapasiteri 45 n’abaturage basanzwe, uyu mwaka bakaba bateganya kuziha abantu 15 barimo bamwe bamaze kuzihabwa.

Mu gihe cy’ibiza byibasiye abatuye mu Ntara y’Amajyaruguru , EAR Shyira yafashije imiryango 760 ibaha ibiribwa n’ibikoresho bitandukanye birimo amabati yahawe bake muri bo.

Musenyeri Mbanda Laurent wa Diyoseze y’Abangilikani ya Shyira yabonye umusimbura

Musenyeri Mbanda nyuma yo gusezera…

Mu mirimo yabayemo irimo kuba Umuyobozi w’Umushinga Compassion International mu Rwanda mu gihe kirenze imyaka 15 ndetse no gukora mu mishinga intandukanye mpuzamahanga mu migabane irimo Amerika, u Burayi na Aziya.

Ibyo byose ngo bizatuma mu gihe yaba agiye mu kiruhuko cy’izabukuru abona umurimo yakora ariko yizeye guhabwa n’Imana.

Ati “ Ndi umukozi wabigize umwuga (professional) gucuruza mbishoboye ntibyaba ari bibi, ariko si wo muhamagaro wanjye, njyewe ndi umunyamwuga, icyo Imana izampishurira nicyo nzakora, nakoze byinshi mu mishinga itegamiye kuri leta (ONG) imyaka irenga 30, Compassion nkoramo 18.”

Ibindi yakozemo ngo yabaye mu bayobozi b’inama z’ubutegetsi mu miryango itandukanye, yigisha muri kaminuza ku buryo ngo bitatangaza abonye umwanya mwiza ujyanye n’ibyo yabayemo mu bayobozi b’inama z’ubutegetsi n’ibindi.

Mbanda yishimira ko nasezera azaba asize Diyoseze ya Shyira nta mwenda n’umwe ibereyemo umuntu n’umwe, kuko mu gihe yari ayibereye umushumba hishyuwe miliyoni zisaga 400 n’asaga miliyari yishyuwe ariko hagurishijwe Hotel Ishema.

Mu itorero ry’Abangilikani, Umushumba ajya mu kiruhuko cy’izabukuru afite imyaka 65, Mbanda akaba afite 62 kuko yavutse mu 1954.

Pasiteri Samuel Mugiraneza niwe watorewe kuzasimbura Musenyeri Mbanda

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved