Kwamamaza

Abakirisitu bashimiye Imana ku bwa Ste Teresa wageze mu Rwanda afasha imbabare

Yanditswe kuya 6-09-2016 saa 12:03' na Ntakirutimana Deus


Imbaga y’Abanyarwanda n’abanyamahanga bamenye cyangwa banyuzwe n’ibikorwa bya Mutagatifu Mama Teresa w’i Calcutta, bahuriye mu gitambo cya Misa cyo gushimira Imana yamutoye nk’umutagatifu.

-Teresa yitaye ku mpunzi z’Abanyarwanda birukanywe na Obote

- Yashinze mu Rwanda ikigo cyita ku batishoboye basaga 100

- Ibikorwa bye byageze ku batuye Isi bose

- Abaye umutagatifu wa kabiri wasuye u Rwanda

- Yahinduye umunyamakuru utarizeraga

Iyo misa yabaye ku mugoroba wo ku wa mbere tariki ya 5 Nzeri 2016, muri Kiliziya y’Umuryango mutagatifu (Sainte Famille) yari yakubise yuzuye, imbere y’abakirisitu bari barangajwe imbere n’abakecuru, imfubyi ndetse n’abafite ubumuga butandukanye basaga 100 baba mu kigo cy’Ababikira b’Inshuti z’Urukundo(aba Calcutta) yashinze mu Rwanda.

Bamwe bamushimiye ko ku bw’umuryango yatangije babashije kwiga amashuri yabo kugeza ku rwego rwa kaminuza barihiriwe n’abo babikira.

Ababikira yashinze basabye buri wese kubasabira kugira ngo bazatere ikirenge mu cye.

Mu butumwa bwe Musenyeri Thaddée Ntihinyurwa, Arikiyepisikopi wa Kigali yavuze ko Mutagatifu Mama Teresa yaranzwe n’urukundo rwagaragajwe n’ibikorwa kurusha amagambo.

Yagize ati”Wenda mu magambo ye yavuze urukundo gake, ariko mu bikorwa yararwigishije karahava[...] ibikorwa bye byageze ku batuye ibice byose by’isi, Yari umukene ku bukungu bw’Isi, ariko yari umukire w’ingoma y’ijuru. Yerekanye ko ahari urumuri umwijima uhunga, n’ahari ukuri ikinyoma kibebera.”

Ubwo yazaga mu Rwanda mu 1983, Mama Teresa yasuye impunzi z’Abanyarwanda zari zarirukanywe muri Uganda, akora ibikorwa byo kuzitaho, kuzubakira aho kuba afatanyije n’ababikira yashinze b’Aba Calcutta bazitagaho.

Padiri Lucchetta Giuseppe, wari mu bapadiri bera wamwakiriye icyo gihe aza mu Rwanda, yavuze ko yamubonye nk’umugore wakoranaga umuhate, agakora buri kazi kose, karimo kuyora ibitaka abishyira mu mufuka no kubaka ubwiherero icyo gihe.

Amwe mu magambo Lucchetta yibuka Mama Teresa yavugiye mu Rwanda, harimo aho yabonye intego ya Musenyeri Joseph Ruzindana, igira iti ‘Sitio’[Mfite inyota] nawe akavuga ko afite inyota yo gukiza abantu benshi ku Isi.

Musenyeri wa Diyoseze ya Kibungo, Antoine Kambanda yabwiye abari aho uburyo ibikorwa bya Mama Teresa byahinduye Isi. Mu gitabo yasomye aribuka umunyamakuru w’Umwongereza wabajije Mama Teresa, ati “Wambwira ibanga ukoresha kugira ngo ushobore gukurura aba bakobwa bavuye ku Isi hose bavuye iwabo mu buzima bwiza, bakaza muri ubu butari bwiza.

Mama Teresa yaramurebye amusubiza ko ‘Imbaraga n’ibanga rituma baza ari Ukarisitiya.”

Uwo munyamakuru utarizeraga ngo yahise yemera Imana ndetse ahinduka n’umugatolika.

Ubutumwa bukomeye bwa Mama Teresa, agenera buri wese amubwira ko igikorwa agiye gukora agomba kukinoza nk’icya mbere n’icya nyuma.

Mutagatifu MamaTeresa yashyizwe muri urwo rwego na Papa Francis tariki ya 4 Nzeri 2016.

Mama Teresa yavutse mu 1910 mu muryango w’abanya-Albania muri Macédoine, agace kari mu maboko y’ubwami bwa Ottoman. Yagiye mu Buhinde ajyanwe no kwiha Imana afite imyaka 18, yinjira mu muryango w’ababikira bitiriwe umubyeyi w’i Lorette.

Yitabye Imana mu 1997 ageze ku myaka 87. Mu 2003 Mama Teresa yagizwe umuhire nk’icyiciro kibanziriza kugirwa umutagatifu.

Ni umubikira washinze ibitaro bitandukanye mu bice binyuranye by’Isi. Mu 1950 yashinzwe umuryango w’Abamisiyoneri b’Impuhwe umuryango umaze kugera ku babikira 4,500 ku Isi hose.

Ababikira b'Aba-Calcutta bashyigikiwe na bagenzi babo
Ababikira babarizwa mu muryango Mama Teresa yashinze bari baje gushimira Imana kuba yagizwe umutagatifu
Mu bafashwa n'ibikorwa Mama Teresa yatangije harimo abagendera ku tugare
Mu bafashwa n'Ibikorwa Mama Teresa yatangije harimo abashaje cyane batakibasha kubyuka
Abakirisitu bari benshi mu gitambo cya Misa
Musenyeri Kambanda
Abepisikopi n'Abasaseredoti bafatanyije mu gutura igitambo cya Misa yo gushimira Imana
Padiri Lucchetta Giuseppe ni we wakiriye Mama Teresa aza mu Rwanda mu 1983
Umwe mu barihiwe amashuri n'umuryango washinzwe na Mama Teresa
Ubutwari bwe bwagarutsweho na benshi
Imodoka ifasha mu butumwa bwa Mama Teresa

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 27 September 2016
Copyright © 2009 -2014 - IGIHE Ltd - All Rights Reserved