Mgr Sinayobye Edouard yakomoje ku izingiro ry’iby’ingenzi azubakiraho bikamufasha kuba umushumba mwiza (video)

Yanditswe na Prudence Kwizera
Kuya 15 Gashyantare 2021 saa 07:17
Yasuwe :
0 0

Ku wa 6 Gashyantare 2021 ni bwo Umushumba Mukuru wa Kiliziya Gatolika ku Isi, Papa Francis, yagize Padiri Sinayobye Edouard wari usanzwe ari Umuyobozi wa Seminari Nkuru y’i Nyumba Umushumba wa Diyosezi ya Cyangugu.

Ni inkuru yakiriye neza kuko na we yamuguye mu matwi asa nk’utunguwe kuko atabikekaga.

Diyoseze ya Cyangugu yari imaze imyaka ibiri iragijwe Musenyeri Hakizimana Célestin wayiyoboraga abifatanya no kuba Umushumba wa Diyoseze ya Gikongoro kuko uwari Musenyeri wayo, Bimenyimana Jean Damascène yitabye Imana mu 2018.

Musenyeri mushya wa Diyoseze ya Cyangugu, Sinayobye Edouard, yavuze uko yiyumvise akimara kugezwaho inkuru nziza y’uko ahawe ubwo butumwa bushya na Papa Francis, avuga n’iby’ingenzi azubakiraho kugira ngo abashe kuba umushumba mwiza.

Mu kiganiro cyihariye na IGIHE, Musenyeri Sinayobye yavuze ko yatunguwe cyane no gutoranywa ngo abe Umushumba wa Diyoseze ya Cyangugu abyakirana umutima wo kumvira.

Musenyeri Sinayobye yavuze ko yatunguwe no guhabwa kuyobora Diyosez ya Cyangugu gusa yizeza ko azakora ibishoboka agakenura ubushyo bw'Imana

IGIHE: Kugirwa Musenyeri wa Diyoseze ya Cyangugu wari ubyiteze?

Musenyeri Sinayobye: Byarantunguye cyane ntabwo nari mbyiteze.

IGIHE: Wabyakiriye ute?

Musenyeri Sinayobye: Biragoye gusubiza ikibazo nk’icyo, kuko ni ubutumwa bukomeye cyane, burenze imbaraga z’umuntu. Nabyakiranye umutima wo kumvira Imana yantoye nk’Umukristu nk’Umusaseridoti kugira ngo mbe umwana wa Kiriziya, mbe umuntu ufasha bandi kumenya Imana.

Icyo rero naragisezeranye, nasezeranye mu buzima bwanjye bwose ko ndi umuntu w’Imana, ndi umuntu wa Kiriziya. Ibyo nzakora byose aho nzajya hose ni ukugira ngo ingoma y’Imana igere mu bantu.

N’ubwo binsumbye, binduta ndetse ubyumvishije umutima w’umuntu biteye n’ubwoba, ariko nabyakiriye mu kumvira Imana no kumvira abayobozi ba Kiriziya.

IGIHE: Uriya munsi ubwo butumwa bwakugezehe ku yihe saha, wahise wiyumva umeze ute?

Musenyeri Sinayobye: I Roma babitangaje ko Nyirubutungane Papa Francis yangize Umwepiskopi wa Cyangugu ku isaha ya saa Sita i Vatican, hano mu Rwanda ku isaha ya Kigali hari saa Saba. Nari ndi kumwe n’Abasaseridoti bagenzi banjye tubana muri iyi seminari (Nyumba) n’abaseminari.

Haza Abepiskopi babiri, Nyiricyubahiro Musenyeri Smaragde Umushumba wa Diyoseze ya Kabgayi na Nyiricyubahiro Musenyeri Célestin Umushumba wa Diyoseze ya Gikongoro akaba muri iyi myaka yose Cyangugu itagiraga Umwepiskopi yari ayishinzwe.

Baraza batubwira iyo nkuru iturutse i Roma, njyewe bari babimbwiye mbere gato ariko bambwira ko mbigumana mu mutima. Bamaze kubitubwira aho tuba turishimye bavuza akamo, n’uko nanjye ndabyakira ngerageza gusaba Imana ngo izamfashe.

IGIHE: Papa Francis ni we waguhaye ubutumwa bushya, mu buzima mwaba nwarigeze guhura?

Musenyeri Sinayobye: Ntabwo turahura mu buzima. Buriya Papa aba afite inzego zindi bafatanya umurimo wo kuyobora Kiriziya, ubwo nizo twagize aho duhurira ntabizi, hanyuma bamugezaho ibyo babona ubwo rero amenya mu byo bamushyikirizaga, akora umurimo we wo kuntorera kuyobora Diyoseze ya Cyangugu.

IGIHE: Ni iki ugiye gushyira imbere kugira ngo ube umushumba mwiza?

Musenyeri Sinayobye: Isengesho. Isengesho niryo rishoboza bose, abo Imana itora bose, guhura n’Imana ukayereka umutima wawe ukayisaba imbaraga numva ari cyo cya mbere Kiriziya yantoje itoza n’abandi.

Ikindi ni ugufatanya n’abandi. Umurimo wo kuyobora Diyoseze nzagenda nywiga buhoro buhoro, ariko ndatekereza ko icya mbere cy’ibanze ari umurimo wo kumenya gufatanya n’abandi mu bwubahane mu kumva bagenzi bawe no kububaha.

Birumvikana nk’umuyobozi hari byinshi ugomba gutekereza ndetse ukaba wagisha n’inama n’abandi. Hari n’Abepiskopi bakuru banjye tuzajya dukorana muri byinshi.

IGIHE: Ugiye kuyobora Diyoseze ya Cyangugu mu gihe u Rwanda n’Isi byugarijwe n’icyorezo cya Coronavirus, muzafasha gute abakirisitu ngo badahungabana mu buzima busanzwe n’ubuzima bwa roho?

Musenyeri Sinayobye: Icya mbere ni icyo dusabwa n’igihugu cyacu. Gukurikiza amabwiriza duhabwa n’igihugu.

Icya kabiri navuga ngo ni ubufatanye; Coronavirus itera ibibazo byinshi. Hari ukurwara, ukwiheba, hari ubukene. Ntabwo dufite ubukungu bwinshi ariko muri bike dufite, dufite umuco mwiza wo gufatanya.

Ntekereza ko nk’abakristu dukwiye kugira uwo mugambi tukawuhuza twese wo gufatanya mu bibazo biterwa na Coronavirus.

Hari n’indi nshingano mbona muri uko gufatanya, gutera inkunga yo gushima no gutera umwete abaganga bacu.

IGIHE: Usanzwe uri umwanditsi w’ibitabo, uzabikomeza mu nshingano nshya wahawe?

Musenyeri Sinayobye: Igihe cyose nzaba mfite akanya. Igihe cyinshi ni ukugishyira mu kwita ku bushyo bw’Imana, hanyuma ngize igihe kindi gito nasagura mbona cyashobora kumfasha kwandika nabyo numva ari umurimo w’iyogezabutumwa, nanyaruka nkagira utwo nandika.

IGIHE: Uhawe ubutumwa bwo kuba Musenyeri mu gihe muri iyi minsi hari kugaragara Abapadiri bava mu murimo bagashaka abagore ndetse no muri Diyoseze ya Cyangugu uragijwe byigeze kuba. Ubona biterwa n’iki, uteganya gukora iki mu kubikumira?

Musenyeri Sinayobye: Burya kuva mu nshingano z’ubusaseridoti bituruka ku mpamvu za buri wese bitewe n’urugendo yakoze n’ubuzima arimo muri icyo gihe n’ibibazo yahura nabyo. Ntabwo ari icyorezo!

Icyo numva nakora ni ugusabira, burya isengesho ni ikintu gikomeye. Ni ugusengera Kiriziya kugira ngo Abasaseridoti Imana ibakomeze.

Icya kabiri ni ukwegera abasaseridoti. Numva Imana nimfasha abasaseridoti ba Cyangugu tuzaganira bihagije buri wese ku giti cye twumve ko turi kumwe muri urwo rugendo rwo gukorera Imana.

Ikindi ni ukurera no kurushaho gushyira ijisho ku baseminari bakuru kuko nibo basaseridoti b’ejo.

IGIHE: Uragijwe Diyoseze ya Cyangugu mu gihe abakristu bari mu kababaro k’urupfu rwa Padiri Ubald. Hari ibiganiro byatangiye byo kuzana umurambo we mu Rwanda, mwaba muzi aho bigeze?

Musenyeri Sinayobye: Ibyo kuzana umurambo we ntabwo mbizi neza, cyokora nanjye ndabyumva ko biri mu nzira ariko bitarashoboka neza neza. Icyo twifuza ni uko byashoboka.

IGIHE: Hari ibikorwa Padiri Ubald yari yaratangiye ku Musozi w’Ibanga ry’Amahoro ndetse ubwo yitabaga Imana yari ari muri Amerika yagiye no gushaka inkunga yo gukomeza kubaka aho hantu. Hari icyo mwatekereje ku gukomeza ibyo bikorwa?

Musenyeri Sinayobye: Ntabwo ndabitekerezaho neza ariko numva ari ikintu cyiza. Uriya musozi w’Ibanga ry’Amahoro, buriya Imana mu migambi yayo ifite uko iyobora ingabire itanga nk’iriya.

Numva ari umusozi mwiza Imana izakomeza gufashirizamo abana bayo. Ndatekereza ko ari ugukomeza ibyo Diyoseze ya Cyangugu yatangiye, kuhashyira imbaraga no gusigasira iyo ngabire kugira ngo ibashe kugaburira benshi.

IGIHE: Abakristu ba diyoseze ya Cyangugu urabasaba iki kugira ngo ikomeze gutera imbere?

Musenyeri Sinayobye: Ndabasaba ubufatanye n’ubwitange kuko Kiriziya turimo dukorera ni umuryango w’Imana. Umuco rero w’ubufatanye uri muri kamere ya kiliziya.

Musenyeri Sinayobye azakomeza gushyigikira ibikorwa Padiri Ubald yari yaratangije muri Diyosezi ya Cyangugu

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .