Mgr. Antoine Kambanda yasabye abakristu gutsinda ukwikunda no kwita ku baciye bugufi

Yanditswe na Twarabanye Venuste
Kuya 25 Ukuboza 2019 saa 01:07
Yasuwe :
0 0

Umushumba wa Arikidiyosezi ya Kigali, Musenyeri Antoine Kambanda, yasabye abantu gutsinda ukwikunda no kwita ku baciye bugufi kuko aribwo buryo bwiza bwo kwitura Imana ineza ibagirira.

Mu nyigisho yatanze y’umunsi wa Noheli ya 2019, Mgr Kambanda, yavuze ko uko umuntu yaba ari kose n’akazi kenshi yaba afite atabura umwanya wo gukora icyiza kigirira mugenzi we akamaro.

Yakomoje ku ibaruwa Papa yandikiye abakirisitu yise ’Ibyishimo by’Ivanjiri’ avuga ko “iyo umuntu yireba cyangwa yiyuzuyemo nta mwanya agirira Imana” mu buzima bwe.

Yavuze ko kwikunda ari byo bigaragara mu ngo zimwe na zimwe zibura gukundana no kwakirana hagati y’abashakanye bigatuma zisenyuka.

Ati “Ibyo tubona kenshi abantu barikunda, yajya no kubaka urugo gushaka umugore cyangwa gushaka umugabo kubera kwireba, kwikunda no kuba yiyuzuyemo, ntashobore kwakira mugenzi we mu mutima we no mu buzima bwe, bakabana nk’amashyiga bakabana nabi urugo rugasenyuka.”

Mgr Kambanda yavuze ko kwitanaho ku bashakanye, bikwiye kujyana na none no kwita ku bakene n’abandi bafite ibibazo bitandukanye, yibutsa abakirisitu ko ari cyo gisobanuro cya Noheli.

Ati “Bavandimwe mukingurire umukiza imitima yanyu, ubuzima bwanyu. Mukingurire abavandimwe imitima yanyu n’ubuzima bwanyu cyane cyane abakene n’abababaye, abihebye n’abigunze. Noheli ni ukwakira Imana mu bantu. Imana yigize umuntu kugira ngo tuyakire, kandi tuyikunde tuyiture ineza itugirira, tubigirira abandi, tugirira abandi akamaro.”

Aho niho yahereye asaba abantu kwita ku baciye bugufi. Yavuze ko akazi umuntu yaba afite ako ariko kose, atabura uburyo n’umwanya wo gukora icyagirira mugenzi we akamaro.

Ati “Mu rwego rwose umuntu arimo, mu bushobozi bwe no mu nshingano ze, buri muntu afite uburyo bwo kuba yagirira mugenzi we akamaro...Nta muntu udafite uburyo n’igihe, cyo kuba yakora icyiza. Icy’ingenzi ni ugutsinda ukwikunda, gutsinda ukwireba tugaharanira icyagirira abandi akamaro. ”

Yavuze ko ‘ibyo ari byo bihesha Imana ikuzo bikaba n’uburyo bwo kuyitura urukundo n’ineza igirira abantu kandi bakayibera amaboko n’amaguru.’

Yabwiye abakristu ko ari maboko Yezu akoresha mu kuramira no gufasha abababaye, bakaba amaguru ye akoresha abageza ku bamwifuza bose.

Ati “Ni twebwe maso ye abonesha kugira ngo abone abamukeneye, ni twebwe matwi ye akoresha kugira ngo yumve abamutakambira. Turi ingingo zigize umubiri wa Kiristu, kuba yarigize Imana akavuka kuri Noheli akaba umwe muri twe, yatugize umuryango umwe natwe turi umubiri we n’ingingo akoresha kugira ngo akomeze gukiza abantu”.

Musenyeri Kambanda yavuze ko kubaho abantu bikunda no kwirengagiza abafite ibibazo bituma babaho bigometse ku Mana bakabaho mu mwijima ntawe umenya undi kandi bamwe bahemukira abandi na bo batiretse.

Musenyeri Kambanda yasabye abakristu kwita ku baciye bugufi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza