Mahirwe Adeline uririmba muri Korali Shalom yasohoye indirimbo yise “Icyomoro”

Yanditswe na IGIHE
Kuya 2 Kanama 2019 saa 08:51
Yasuwe :
0 0

Umuhanzikazi Mahirwe Adeline uri mu bagenderwaho muri Korali Shalom ikorera umurimo w’ivugabutumwa muri ADEPR Nyarugenge yasohoye indirimbo ya kabiri kuva atangiye umuziki nk’umuramyi wigenga.

Indirimbo nshya ya Mahirwe yayise “Icyomoro”, ishushanya uko Yesu ari we womora abarira, abababaye n’abafite imitima ihagaze.

Mahirwe yamenyekanye cyane muri Korali Shalom kubera ijwi rye rifite umwihariko ryumvikana mu ndirimbo zayo zitandukanye atera.

Nyuma y’amezi arindwi atangiye gukora umuziki nk’umuhanzi wigenga, yatangaje indirimbo yise e“Icyomoro”. Yakurikiye iya mbere yise ‘‘Ikorera igihe’’, yagiye ahagaragara mu ntangiriro za Mutarama 2019.

Indirimbo ye nshya yayishyikirije abakunzi b’ibihangano bye kuwa 30 Nyakanga 2019, umusi ufite amateka mu buzima bwe kuko ariwo yaboneyeho izuba.

Kuri uwo munsi umugabo we, Sengurebe Joël, barushinze ku wa 22 Ukuboza 2018, yaramutunguye amusanga mu kazi, amwifuriza isabukuru nziza.

Aba bombi babwiranye amagambo y’urukundo agaragaza ko bazarambana iteka kugeza igihe bazatandukanywa n’urupfu.

Mu kiganiro yagiranye n’itangazamakuru, Mahirwe Adeline, yagaragaje ibyishimo bidasanzwe.

Yagize ati “Uyu munsi wanshimishije cyane, ni uko umuntu atareba ikiri ku mutima ariko ndanezerewe cyane. Kwizihiza isabukuru y’amavuko wanasohoye indirimbo nshya nk’iyi ihumuriza abantu ni ikintu kidasanzwe kuri njye.’’

Indirimbo nshya ya Mahirwe yayihimbye abikuye ku bibazo yigeze guhura nabyo, ariko Imana ikamuba hafi akabisohokamo amahoro.

Ati “Indirimbo yanjye yitwa Icyomoro, nashatse kuvuga uburyo Yesu yomora imitima y’abantu bafite ibikomere, bababaye, bihebye, bashavuye, mbabwira ko Yesu wenyine ariwe cyomoro kibasha kuruhuka ibyo byose.”

“Icyomoro” ni indirimbo y’amajwi y’iminota ine n’amasegonda atanu; igizwe n’ibitero bibiri n’inyikirizo.

Mu magambo ayigize yuje ihumure, mu gitero cya kabiri hari aho yagize ati “Mu byago no mu makuba Yesu ni we wa mbere ugutabara. Iyo wihebye, urize ushavuye, ubuze uko ugira, inshuti n’imiryango bose bakuvuyeho ni we usigarana. Iyo uburwayi bukurembeje wabuze uko ugira n’abaganga bananiwe Yesu ni we usigarana…”

Indirimbo yatunganyirijwe muri studio ya KLM, ikorwa na Producer Bruce usanzwe ukorana n’umuhanzi Israel Mbonyi.

Mahirwe yatangiye kugaragaza impano yo kuririmba abarizwa mu ishuri ryo ku Cyumweru muri Repubulika Iharanira Demokarasi ya Congo i Goma aho yarerewe. Kuva mu 2007, uyu muhanzi yanyuze muri Korali zirimo Elayono, Tumaini, Integuza na Siyoni zo muri ADEPR Rubavu.

-  Umva hano indirimbo ya Mahirwe Adeline yise “Icyomoro”

Mahirwe Adeline yashyize ahabona indirimbo ye ya kabiri kuva atangiye umuziki nk'umuhanzi wigenga muri Mutarama 2019
Korali Shalom iri mu zikomeye mu Itorero rya ADEPR. Aha Mahirwe (wambaye umukara imbere) yari ayoboye bagenzi be mu gitaramo cy'umuhanzi Danny Mutabazi cyabereye muri Dove Hotel ku Gisozi ku wa 2 Kamena 2019
Mahirwe Adeline ku wa 30 Nyakanga 2019, yizihije isabukuru y'amavuko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza