Korali Siyoni na Goshen zahuje imbaraga mu mushinga wo kubakira abana b’imfubyi

Yanditswe na IGIHE
Kuya 19 Ugushyingo 2019 saa 06:30
Yasuwe :
0 0

Korali Siyoni yo muri ADEPR Jenda mu Karere ka Nyabihu mu Burengerazuba, yiyemeje kubakira umuryango w’abana babiri b’imfubyi inzu yo kubamo.

Aba bana iyi korali igiye kubakira ni uwitwa Mugabe Irene na mushiki we Iradukunda Vivine baherutse gupfusha umubyeyi bari basigaranye.

Umuyobozi wa Korali Siyoni, Maniraho Jean De Dieu, yabwiye IGIHE ko abo bana bari bamaze igihe baririmbana ariko batazi neza mu by’ukuri ubuzima babayemo.

Nyuma yo kubura umubyeyi bari basigaranye mu minsi ishize bagiye kubasura basanga haricyo bakora ngo babakure mu buzima barimo.

Yagize ati “Twarabasuye dusanga baryama hasi, kandi ntaho gukura ibibatunga bagira, duhita dufata umwanzuro wo kubafasha.”

Maniraho yavuze ko bahise bagira igitekerezo cyo kububakira inzu mu Karere ka Nyabihu izatwara amafaranga y’u Rwanda agera kuri miliyoni enye.

Korali Siyoni mu gitaramo yakoze ku Cyumweru tariki 17 Ugushyingo 2019, yerekanye ibikoresho bizakoreshwa kuri iyo nzu birimo inzugi z’ibyuma n’amadirisha ndetse ikibanza cyatangiye gutunganywa.

Inzu izubakirwa abo bana izaba irimo ibyangombwa nkenerwa byose byo mu rugo.

Yakomeje ati “Turashaka ko muri Kamena umwaka utaha twazayitaha twizihiza n’isabukuru y’imyaka 25 tuzaba tumaze dutangiye ivugabutumwa. Gusa turateganya ko muri Mutarama 2020, baba bayigiyemo tugakomeza kuyikora neza ariko bafite aho baking umusaya.’’

Uyu mushinga Korali Siyoni yawufatanyije na Korali Gosheni yo kuri ADEPR Muhoza mu karere ka Musanze, yahise itanga amabati 40 azakoreshwa mu gusakara iyo nzu.

Umuyobozi wa Korali Gosheni, Kamanzi Dan, yazuze ko hazanarebwa uburyo aba bana bashakirwa n’icyo bakora cyabafasha kwibeshaho.

Abana bana bombi bize amashuri yisumbuye, umwe yize ibijyanye n’Amashanyari undi yiga Icungamutungo ariko bombi nta kazi bafite.

Mugabe Irene na mushiki we bishimiye uko bagenzi babo muri Kirisitu babatekerejeho bakemera kwitanga ngo babone aho kuba kuko n’inzu babagamo bayitijwe n’umuvandimwe kandi nayo yavaga no kubona ibyo kurya bikaba ingume.

Korali Gosheni na Siyoni ni zimwe mu zifite ibihangano bikunzwe cyane cyane mu Ntara y’Amajyaruguru n’Uburengerazuba bw’u Rwanda.

Korali Goshen iri muri korali zikunzwe cyane muri ADEPR, Ururembo rw'Amajyaruguru
Abaririmbyi ba Korali Siyoni bitwaje inzugi mu rusengero mu gikorwa cyo gutangiza umushinga wo kubakira abana b'imfubyi
Iradukunda Vivine na Mugabe Irene bashimye abatekereje kububakira inzu ngo babone aho gukinga umusaya
Korali Goshen yerekeje i Jenda yitwaje inkunga y'amabati azakoreshwa mu kubaka iyo nzu
Umuyobozi wa Korali Siyoni, Maniraho Jean De Dieu, yasobanuye imiterere y'umushinga wo kubakira abana b'imfubyi
Iki gitaramo cyaranzwe n'ibihe by'akanyamuneza
Imirimo yo gutunganya ahazubakwa iyo nzu yarakozwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza