Kwamamaza

Impaka z’urudaca kubera umupadiri wahamijwe jenoside bivugwa ko asoma misa

Yanditswe kuya 10-10-2016 saa 14:03' na Emma-Marie Umurerwa


Nyuma yo guhamwa n’icyaha cya Jenoside yakorewe Abatutsi, akabifungirwa ndetse akarangiza igihano cye, biravugwa ko Padiri Ntimugura Laurent wo muri Diyoseze ya Cyangugu afatanya n’abandi bapadiri gusoma misa, ibintu byakuruye impaka hibazwa uburyo uwihayimana agateshuka ku nshingano yakongera kujya kuri Altar.

Padiri Ntimugura Laurent wahamwe n’icyaha cya Jonoside yakorewe Abatutsi, agakatirwa gufungwa imyaka 20, yarangije igihano cye afungurwa tariki ya 10 Nzeri 2016 nk’uko amategeko abiteganya.

Icyo abantu batandukanye bakomeje kwibaza ni uburyo umupadiri wakoze Jenoside, agahamwa n’ibyaha ndetse akanabifungirwa yarangiza igihano agakomeza imirimo ya Alitari (Altar).

Abibaza ibi bashingira ku bunyangamugayo buba bukwiye kuranga Abihayimana, bigatuma hari abafata Padiri Ntimugura nk’ufite icyasha mu maso y’abakirisitu n’abanyarwanda muri rusange ku buryo adakwiye kubajya imbere ngo abigishe ijambo ry’Imana.

‘Padiri yari gufungurwa nkamujugunya hanze?’

Musenyeri Jean Damascène Bimenyimana, Umushumba wa Diyosezi Gatolika ya Cyangugu, aganira na IGIHE, yavuze ko yakiriye Padiri Ntimugura nk’umuntu wahoze uba muri Paruwasi ya Cyangugu mbere yo gufungirwa icyaha cya Jenoside, ariko ahakana ko asoma misa nk’uko bivugwa.

Yagize ati “Abavuga ko yasubiye ku mirimo ya ‘Altar’ bamubonye mu yihe Paruwasi? Nonese mubona umupadiri yaza nkamujunga hanze? Ntabwo umuntu yafungurwa ngo mubwire ngo jya kuzerera ku gasozi. Umupadiri aba ari umupadiri wa Diyosezi uko ameze kose ntabwo Musenyeri yamujugunya hanze.Uwo mupadiri tubana hano muri ’Evêché’, nta butumwa bundi afite, ntabwo nigeze muha.”

Tumubajije niba igihe kizagera Padiri Ntimugura agahabwa inshingano, Musenyeri Bimenyimana yagize ati “Ibyo tuzabisuzuma ariko ubu ari muri Evêché nta butumwa afite, nta Paruwasi ajyamo, ntibaramubona ajya gusoma misa muri Paruwasi, ntibaramubona aho ajya kwigisha abantu. Ibyo abantu bavuga ntabwo ari byo.”

Umuvugizi wa Kiliziya Gatolika mu Rwanda, akaba n’Umushumba wa Diyosezi ya Butare, Musenyeri Philippe Rukamba, yatangarije IGIHE ko Padiri Ntimugura atemerewe gusoma misa mu ruhame bitewe n’uko atarahabwa inshingano.

Yagize ati “Ashobora gusoma misa ku giti cye, ariko ntiyemerewe kuyisoma mu ruhame kuko kugeza ubu atarahabwa inshingano na Musenyeri.”

Padiri Ntimugura ashobora kuzaburanishwa n’urukiko rwa Kiliziya

Musenyeri Rukamba yakomeje avuga ko uyu mupadiri nubwo yarangije ibihano by’amategeko ya Leta, ngo aramutse arezwe mu rukiko rwa Kiliziya yakongera akaburana.

Yagize ati “Birashoboka ko hamaze gusuzumwa ibyaha yarezwe mbere, yaregwa no mu rukiko rwa Kiliziya, hanyuma agahamagazwa. Ashobora kuregwa n’abo yiciye, na Kiliziya ubwayo ishobora kuvuga iti wowe warishe none ubu ngubu tugomba kugucira urubanza, ariko kugira ngo urubanza rube hagomba umuntu urega.”

Hari abapadiri bambuwe inshingano z’ubuseseridoti kubera ibyaha bakoze

Mu Rwanda ngo hari abapadiri nubwo atari benshi bagiye bahamwa n’ibyaha bitandukanye, urukiko rwa Kiliziya Gatolika rugategeka ko bamburwa inshingano. Urugero rwa hafi ni Padiri Misago Deogratias wo muri Diyosezi ya Butare wahamwe n’icyaha cyo gusambanya umwana.

Musenyeri Rukamba yakomeje agira ati “Niba koko umuntu ari umwicanyi, ari umuntu wagize nabi, nk’ibyo ni ibyaha bishobora kukwambura inshingano muri Kiliziya ikaguhagarika. Twebwe twemera ko uhawe ubupadiri akomeza akaba padiri ubuzima bwose, ariko nta burenganzira uba ufite bwo gukora imirimo ya gisaserodoti, ashobora kuba padiri ku izina. Isakaramentu ry’ubupadiri ntirivaho.”

Yakomeje avuga ko hari ibyaha bituma umusaserodoti yamburwa inshingano na Kiliziya Gatolika birimo nko gufata abana ku ngufu, gusambana n’abo bahuje ibitsina n’ibindi.

Musenyeri Bimenyimana Jean Damascène avuga ko uyu mupadiri adasoma misa nkuko bivugwa

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved