Kwamamaza

“Itangazamakuru ryahembereye urwango,harageze ngo rikoreshwe mu ivugabutumwa ryiza”

Yanditswe kuya 16-09-2016 saa 08:15' na Niyonsenga Schadrack


Abayobozi b’ihuriro ry’ibitangazamakuru bya gikirisitu n’abanyamakuru ba gikirisitu muri Afurika bari mu Rwanda mu nama y’Inteko rusange y’iri huriro, baravuga ko batangajwe no kubona urwego abanyarwanda bagezeho mu bumwe n’ubwiyunge ukurikije amahano ya Jenoside yakorewe abatutsi mu 1994 yabagwiririye.

Ibi babivuze ubwo basuraga urwibutso rwa Jenoside rwa Kigali ku Gisozi, birebera ndetse banasobanurirwa amateka ya Jenoside yakorewe Abatutsi mu 1994.

Ubumwe n’ubwiyunge by’abanyarwanda bitangaza abantu batari bake bitewe n’uburyo bigeze ku rwego rushimishije kandi mu gihe gito ugereranyije n’ubukana bw’ibyabaye mu Rwanda mu 1994.

Umuyobozi Mukuru ushinzwe ubumwe n’ubukangurambaga rusange muri Komisiyo y’Igihugu y’Ubumwe n’Ubwiyunge, Mugaga Johnson aherutse gutangariza IGIHE ko ibanga nyamukuru ryakoreshejwe kugira ngo abanyarwanda babe babanye neza ari ubushake bwa politiki ndetse n’abaturage biyumvisemo ko kwiyunga ari ngombwa.

Sandy Day uyoboye abarenga 50 bo mu ihuriro ry’ibitangazamakuru bya gikirisitu muri Afurika “Africa by Radio”, yavuze ko ibitangazamakuru byo mu Rwanda byakoreshejwe mu buryo bukomeye mu kwanganisha abantu ariko ko kuri ubu igihe kigeze ngo bihinduke ibyunga abantu.

Sandy ati “Nibajije nti ni gute babashije kwiyunga? Nabajije umukozi w’Imana umwe nti ni gute aba bantu beza batuye muri iki gihugu cyiza bakoze Jenoside? Igisubizo yampaye yambwiye ngo bose bari babaye satani. Impamvu dukora ibyo dukora ni uko dushaka kubona abantu bo ku isi bose bahinduka abakirisitu”.

Akomeza agira ati “Turashaka ko abantu bose baba abakirisitu, biyumvamo imbabazi, impuhwe, urukundo, ubusabane ndetse n’ubwiyunge. Itangazamakuru ryahembereye urwango ariko igihe kirageze ngo rikoreshwe mu ivugabutumwa rihamagarira abantu bose kwitegura Imana”.

Bishop Sibomana Jean, Umuvugizi w’Itorero rya ADEPR mu Rwanda ryakiriye aba banyamahanga biyemeje guhindura itangazamakuru umuyoboro w’ivugabutumwa rya gikirisitu, yavuze ko ADEPR yahisemo kubasaba gusura urwibutso rwa Jenoside kugira ngo nk’uko ari abanyamakuru barebe uburyo itangazamakuru ryakoreshejwe mu guhemukira u Rwanda mu rwego rwo gutuma biha intego yo gukoresha itangazamakuru mu buryo budasenya.

Yagize ati “Ni byiza ko tubazana hano kugira ngo ibyabaye ku Rwanda bagiye bumva babirebe n’amaso yabo. Bizabafasha mu murimo wabo w’itangazamakuru, kumenya buryo ki bakwirinda nk’ibyabaye hano mu Rwanda. Turifuza ko bakora ivugabutumwa ryiza ryigisha urukundo no gusabanya abantu”.

Abanyamahanga basura u Rwanda bakunze gusura n’urwibutso rwa Jenoside bashaka kwirebera imbonankubone amateka ya Jenoside yakorewe Abatutsi baba babwirwa ndetse no kugira ngo bayakureho isomo ryo kuba bagira uruhare mu gutuma amahano nk’ayo atakongera kuba ahandi ku isi ndetse no mu gufasha guhangana n’abayipfobya.

Iyi nama ihuriwemo n’abaturutse mu bihugu 16 byo ku migabane itandukanye birimo Canada, Ghana, Australia, Afurika y’Epfo, Tanzania, Benin, Kenya, Ethiopia, Romania, Indonesia, u Bwongereza, u Burundi, Uganda, u Rwanda, Sudani y’Amajyepfo na Leta Zunze Ubumwe za Amerika.

Iyi nama igamije gutanga amahugurwa ajyanye n’uburyo ivugabutumwa ryakorerwa mu itangazamakuru n’uburyo bwo kumenya uko itangazamakuru rifasha mu kogeza ubutumwa bwiza, yatangiye ku wa Mbere tariki 12 Nzeri ikazasoza imirimo yayo ku wa gatandatu tariki 17 Nzeri 2016.

Abagize ihuriro Africa by Radio basobanurirwa amateka ya Jenoside yakorewe Abatutsi
Bashyize indabo ku mva ndetse bunamira abashyinguye ku rwibutso rwa Kigali ku Gisozi

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved