Impanuro za Pasiteri Gatabazi Christine ku baramyi bishyira hejuru

Yanditswe na IGIHE
Kuya 19 Kamena 2019 saa 10:00
Yasuwe :
0 0

Pasiteri Gatabazi Christine wo mu Itorero rya Assemblée de Dieu yavuze ko umuririmbyi wese agomba guca bugufi munsi y’abamukuriye, akemera kuyoborwa no kugirwa inama n’umushumba we.

Ni ubutumwa yageneye abaririmbyi baba abakora umuziki nk’abahanzi bigenga n’ababarizwa muri za korali zitandukanye.

Yabivuze ku wa 16 Kamena 2019, ubwo yari mu gitaramo Gospel Moving Choir (GMC) ikorera ivugabutumwa ry’indirimbo muri Assemblée de Dieu Kimihurura, yamurikiyemo album yayo ya gatanu.

GMC iri mu makorali amaze igihe kinini mu murimo w’Imana by’umwihariko muri iri torero kuko ubu yujuje imyaka 30.

Pasiteri Gatabazi wungirije Rev. Gatabazi Jean muri Assemblée de Dieu yavuze ko GMC yatangiye mu 1989 kandi icyo gihe na we yaririmbagamo.

Hari indirimbo zayo zamenyekanye mu myaka yo hambere yagize uruhare mu kwandika.

Mu butumwa bwe. Pasiteri Gatabazi yavuze ko umuririrmbyi mwiza ari uguma mu rusengero akiga.

Uyu Mushumba asanga hari abaririmbyi benshi bajya mu rusengero baririmba indirimbo bakumva ko babaye ibyamamare ndetse rimwe na rimwe bakihunza ubundi buzima bwo gusenga.

Yakomeje agira ati “Umuririmbyi wese impano yaba afite iyo ariyo yose agomba kwibuka ko akiri umwana w’Imana, akiri umukirisitu, agomba guca bugufi akumvira abamuyobora.”

Umuyobozi wa Gospel Moving Choir, Kamugisha Robert, yavuze ko mu ndirimbo nyinshi yahimbye zamenyekanye harimo iyitwa ‘Imana ijya Kundema’ yamamaye cyane mu bakunda ibihangano byo kuramya no guhimbaza Imana.

Yavuze ko kubera ukuntu yakunzwe kera abantu batandukanye bagiye bayiyitirira cyane.

Ati “Niyo mpamvu kuri album yacu nshya twongeye tukayiririmba tukayikorera remix kugira ngo abantu bongere bibuke ba nyirayo n’ibyo bihe byiza.”

Gospel Moving Choir yamenyekanye mu ndirimbo zitandukanye zirimo izakunzwe nk’iyitwa ‘Imana ijya kundema’, ‘Ndaje Mana’, ‘Imigambi y’Imana imfitiye’, ‘Twaratsindishirijwe’ n’izindi.

Muri album yakoze harimo iyitwa ‘Twaratsindishirijwe’, ‘Yesu ntusanzwe’, ‘Agura imbago’, na ‘Ntituzabiceceka’ ya kane. Izi album zose uko ari eshanu zigizwe n’indirimbo 50.

Album yayo nshya yise ‘Sinzatinya’ yayimurikiye mu gitaramo gikomeye yatumiyemo itsinda rimaze kwandika ibigwi mu muziki wo kuramya no guhimbaza Imana rya Alarm Ministries. Ryongeye kwishimirwa by’ikirenga binyuze mu bihangano byaryo bigezweho mu nsengero ndetse bibyinitse.

Abitabiriye iki gitaramo batashye banyuzwe n’umuziki unyura amatwi n’ubutumwa bwiza bukubiye mu bihangano byaririmbiwemo.

GMC irateganya gutunganya indirimbo zayo zose zigera ku 187 zigakorerwa amajwi n’amashusho.

Kambale Gerard ni we waririmbye iyitwa Imana ijya kundema
Gospel Moving Choir (GMC) ikorera ivugabutumwa ry’indirimbo muri Assemblée de Dieu Kimihurura
Abaririmbyi ba Alarm Ministries banyuzagamo bakabyina
Iki gitaramo cyitabiriwe n'abantu b'ingeri zitandukanye
Umuramyi Muhumure Confiance uririmba mu matsinda yo kuramya no guhimbaza Imana ari mu bakomeye muri Alarm Ministries
Umuziki wacurangiwe muri iki gitaramo wari uryoheye amatwi
Pasiteri Gatabazi Christine yahanuye abahanzi bishyira hejuru bagasuzugura abayobozi babo
Umuyobozi wa Gospel Moving Choir, Kamugisha Robert, aganira n'itangazamakuru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza