Ibisigazwa bya Mutagatifu Tereza w’Umwana Yezu bigiye kuzanwa mu Rwanda

Yanditswe na Akimana Erneste
Kuya 20 Gicurasi 2018 saa 12:17
Yasuwe :
0 0

Kiliziya Gatolika yo mu Rwanda iritegura kwakira ibisigazwa bitagatifu (Reliques) bya Tereza w’Umwana Yezu, ufatwa nk’umurinzi w’iyogezabutumwa ku Isi hose, akaba n’Umutagatifu washyizwe mu rwego rw’abahanga ba Kiliziya.

Ibaruwa Abepiskopi Gatolika bo mu Rwanda bageneye Abakirisitu babategurira kwakira ibisigazwa by’uyu mutagatifu, igaragaza ko azaba ari mu gihugu kuva ku itariki 15 Kamena kugeza ku itariki ya 30 Nyakanga 2018.

Mutagatifu Tereza w’umwana Yezu yari umubikira w’Umukarumerita ahitwa Liziye mu Bufaransa. Yavutse mu 1873 ahitwa Alençon mu Bufaransa yitaba Imana akiri muto mu 1897 afite imyaka 24 gusa.

Abepiskopi Gatolika bo mu Rwanda basobanura ko Tereza w’Umwana Yezu, azaba aje kwibutsa umuhamagaro wa mbere w’Abakirisitu ari wo w’ubutagatifu no kubigisha inzira ye ngufi yo kubugeraho.

Basobanura kandi ko azaba aje guhishurira abakirisitu ibanga rikomeye ryo kumenya no gukunda Kiliziya n’ubutumwa bw’ibanze bahuriyeho nk’abana bayo.

Kiliziya Gatolika yemera ko Tereza w’Umwana Yezu, ari Umutagatifu ufite ubuhanga bw’umwimerere abakirisitu bashobora kwigirwaho guhuza urukundo rw’Imana n’urwa bagenzi babo.

Ibi bigaragarira mu mvugo ye aho yagize ati “Nasobanukiwe ko urukundo mfitiye abavandimwe banjye b’ababikira rucagase, nabonye ko ntabakunda nk’uko Imana ibakunda. Noneho numva neza ko urukundo nyakuri rwa kivandimwe, ari urutuma umuntu yihanganira amafuti y’abandi, ntangazwe na busa n’intege nke zabo, ahubwo agafashwa n’udukorwa duto twiza umuntu abona bakora, ariko cyane cyane numvise ko urukundo rwa kivandimwe rutagomba na rimwe kugumya gupfukiranwa mu ndiba y’umutima.”

Abakirisitu kandi bazamwigiraho kutagamburuzwa n’inabi iyo ari yo yose no kudacibwa intege n’ububabare bwabo mu rugamba rw’urukundo.

Mutagatifu Tereza w’Umwana Yezu ni umwe mu batagatifu bakundwa cyane ku Isi kandi wiyambazwa n’abantu benshi.

Papa Yohani Pawulo wa II washyize Tereza w’Umwana Yezu mu barimu ba Kiliziya (Docteur de l’Église), yatangaje ko Tereza ari we Mwarimu wa Kiliziya muto cyane mu bandi, yongeraho ko ari ‘Umwarimu ukwiye muri ibi bihe byacu ; ibihe binyoteye Ijambo rizima kandi rya ngombwa; ibihe by’ubuhamya bw’ubutwari kandi bwizewe’.

Ibaruwa Abepiskopi Gatolika bo mu Rwanda bageneye Abakirisitu babategurira kwakira ibisigazwa by’uyu mutagatifu, igaragaza ko ibisigazwa by'uyu mutagatifu bizaba biri mu gihugu kuva ku itariki 15 Kamena kugeza ku itariki ya 30 Nyakanga 2018

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza