Georgia: Papa yasomeye misa muri stade irimo mbarwa

Yanditswe na Uwishyaka Jean Louis
Kuya 2 Ukwakira 2016 saa 05:10
Yasuwe :
0 0

Umushumba wa Kiliziya Gatolika ku isi, Papa Francis, yasomeye misa muri stade irimo abantu bake mu ruzinduko arimo muri Georgia nyuma y’uko idini rya Orthodox muri icyo gihugu risabye abayoboke baryo kutitabira iryo sengesho.

Abayoboke b’idini rya Orthodox muri iki gihugu basabwe kutajya muri misa y’abanyagatolika, gusa ubuyobozi bwabo bwo bwatangaje ko uwo mwanzuro wafashwe mu bwumvikane.

Abantu 3000 nibo bitabiriye iyi misa yaberaga muri stade ya Meshki isanzwe yakira abantu ibihumbi 25.

Kuva Papa Francis yatangira kugirira ingendo mu bihugu by’amahanga ndetse akanahasomera misa, ni bwo bwa mbere igitambo cya misa ayoboye cyitabiriwe n’abantu bake cyane.

Abaturage bitabiriye iyi misa yabereye mu Murwa Mukuru w’iki gihugu, Tbilisi, bavuze ko uruzinduko rwa Papa Francis rwabaye ingirakamaro ku gihugu cyabo ndetse no kubayoboke bose b’idini gatolika.

Umwe muri bo witwa Keti Khitarikhvili yagize ati "Iki ni igikorwa cy’ingenzi haba ku ruhande rw’igihugu cyacu ndetse no ku bakirisitu gatolika, ni umupapa w’ukuri, si uwo kwigisha iyobokamana gusa ahubwo ni n’umunyapolitiki kubera ko ndahamya ko ku bw’uru ruzinduko, igihugu cya Georgia kiramenyekana ku rwego rw’isi.”

BBC itangaza ko urugendo rwa Papa Francis muri iki gihugu rutari rushingiye ku bayoboke b’idini gatolika bari munsi ya 1% by’abaturage ba Georgia, ahubwo ngo intego yari ugushaka uburyo umwiryange ushingiye ku myemerere uri hagati y’abakirisitu gatolika n’aba Orthodox kuva mu kinyejana cya 11 warangira.

Si ubwa mbere Papa asura iki gihugu kuko mu 1999 Georgia yasuwe na Papa Yohani Pawulo II, aho mu kugerayo yafashwe nk’Umukuru wa Leta ya Vatican aho kuba Umushumba wa Kiliziya Gatolika.

Padiri David Klividze, wo muri orthodox yagize ati "Uribaza uko byagenda umuyoboke wo miri Islam mu bwoko bw’aba Sunni aramutse agiye kuvuga ubutumwa mu ba Shia bo muri Iran agakoreshereza amasengesho muri stade cyangwa ahandi hantu? Ibyo ntibishobora kubaho.”

Icyakora ku wa Gatanu Umuyobozi w’aba Orthodox muri Georgia, Patriarch Ilia, yari yakiriye Papa Francis amuha ikaze muri iki gihugu, avuga ati “Imana ihe umugisha Kiliziya Gatolika y’i Roma.”

Umukuru w’Igihugu cya Georgia, Georgy Margvelashvili nawe yitabiriye iyi misa itabonye abayoboke benshi. Icyakora abandi banyapolitiki bo ntibayitabiriye bitewe n’uko bari bafite ubwoba bw’uko abanyamadini bazatora bagira uburakari ntibazitabire amatora ya kane y’abagize Inteko Ishinga Amategeko ateganyijwe muri iki gihugu tariki 8 uku kwezi.

Umwe mu ba Padiri mu idini y’aba Orthodox yatangaje ko ibyo bakoze ari nko kwigaragambya bamagana abakirisitu gatolika bashakaga kubatwarira abayoboke.

Byitezwe ko kuri iki Cyumweru Papa Francis ari busure Azerbaijan ituranye na Georgia, inatuwe n’abayoboke b’idini gatolika bari munsi ya 300, kuko umubare munini w’abatuye iki gihugu ari abasilamu.

Papa Francis amaze gusura ibihugu bitandukanye birimo n’ibyo ku mugabane wa Afurika, aho ubwo yari muri Repubulika ya Centrafrique yasuye umusigiti wo mu Murwa Mukuru Bangui ahatangira ubutumwa bw’uko abasilamu n’abakirisitu ari abavandimwe.

Stade ijyamo abantu ibihumbi 25 yarimo abantu bake cyane bitabiriye Misa ya Papa
Papa yakiriwe n'Umuyobozi wa Orthodox muri Georgia ahabwa ikaze ariko abayoboke b'iri dini babuzwa kwitabira misa ye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza