00:00:00 IGIHE NETWORK KN KINYARWANDA EN ENGLISH FR FRANCAIS

Ese ni ngombwa gusenga ?

Yanditswe na Urinzwenimana Mike
Kuya 19 Nzeri 2021 saa 09:35
Yasuwe :
0 0

Mu myizerere itandukanye y’abantu usanga benshi bagira uburyo basengamo Imana yabo, kikaba igikorwa cyubahwa kuko biba ari nk’umuyoboro uhuza abizera n’Imana, bikaba kandi urufunguzo rufungura irembo cyangwa umuryango abizera binjiriramo bakagera ku gukora kw’Imana yabo.

Habaho ibihe bisanzwe umuntu asengamo bikamera nk’umuhango uhoraho ariko habaho n’ibihe bidasanzwe umuntu afata agasenga, agatabaza Imana, akinginga bitewe n’uburemere bw’icyo ashaka ku Man, mbese akamaramaza kugeza ubwo Imana nayo imwiyereka mu buryo budasanzwe.

Mu by’ukuri iyo urebye imiterere y’umuntu, usanga yifitemo kutuzura muri we gutuma ashakisha izindi mbaraga ahandi zamufasha kubaho yumva yuzuye. Imana yaremye umuntu mu buryo avoma ubuzima bwe mu isoko y’umwuka (spiritual source). Umuntu ashobora guhitamo kuvoma ubuzima bwe mu Mana cyangwa agahitamo indi soko.

Zimwe mu ntambara abantu benshi barwana nazo mu buzima bwa buri munsi akenshi usanga baba barazitsinzwe mu ntambara yo mu mwuka bivuze ngo ‘Ibanga ryo kuneshwa kose ni ukuneshwa kugira amasengesho . Si ukuneshwa gusenga gusa, ni ukuneshwa mu masengesho.’

Muri Bibiliya habonekamo umugani w’umufarisayo n’umukoresha w’ikoro, umufarisayo ni we wasenze igihe kirekire kandi kenshi, ariko amasengesho ye yari ubupfu. Amasengesho ye ntiyumviswe n’Imana kubera ko ari we, ari n’amasengesho ye, nta cyari gitunganiye Imana.

Concordance , ni igitabo gifasha umuntu mu gushaka imirongo yo muri Bibiliya iyo uzi nibura ijambo rimwe muri uwo murongo. Iyi yerekana bwangu akamaro ko gusenga mu Ijambo ry’Imana.

Muri concordance y’Icyongereza rero ijambo ‘gusenga’ n’andi ayishamikiyeho nka ‘amasengesho’ no ‘gusenga’, aboneka inshuro 331 muri Bibiliya yitwa NASB; inshuro 545 muri KJV; n’inshuro 375 muri NIV.

Impamvu iyi mibare itandukanye biterwa n’uko amagambo amwe y’Igiheburayo n’ay’Ikigiriki asobanurwa mu buryo butandukanye muri izo Bibiliya uko zitandukanye. Urugero, KJV ishobora gukoresha ijambo ‘gusenga’ aho NASB cyangwa NIV bikoresha ‘gusaba’.

Ijambo ry’Imana riratubwira ngo “Ntimukagire ikibahagarika umutima, ahubwo igihe cyose mumenyeshe Imana ibyo mukeneye muyisaba, muyinginga kandi muyishimira” Abafilipi 4:6 BIRD.

Igihe cyose Bibiliya ibuza abizera kwiganyira kuko bidafasha, ahubwo bituma bakura amaso ku Mana akita ku bwoba, Bibiliya ahubwo ikatubwira ngo dusenge mu buryo bwose bwo gusenga. Imana iradukunda, kandi itwitaho, niyo mpamvu ivuga ngo “Muyikoreze amaganya yanyu yose, kuko yita kuri mwe” 1 Petero 5:7

“Kandi iki nicyo kidutera gutinyuka imbere ye, nuko atwumva iyo dusabye ikintu nkuko ashaka. Kandi ubwo tuzi ko yumva icyo dusabye cyose, tuzi nuko duhawe ibyo tumusabye.” (1Yohana:5,14-15)

Amasengesho ni uburyo bwo kwinjira mu munezero n’ibyiringiro by’urukundo rw’Imana, imigisha yayo, ubuyobozi bwayo, no kubaho kwayo. Ni uburyo bwo gutumbira Uwo n’Icyo Imana ari cyo,mu bumana bwayo , gahunda zayo, amasezerano yayo n’imigambi yayo.

Uburyo bwo gusenga buhesha Umwami icyubahiro kandi bukerekana gushaka ubumwe bwacu n’Imana hamwe no kwumvira. Bikomeza imitima yacu kubera ko bizana Imana aho tuyibonera mu migambi yayo.

Kenshi kubera kubura ubwenge kwacu no kuba dufite aho tutarenga, kandi kubera kamere yacu y’icyaha, iyaba Imana yasubizaga amasengesho yacu yose uko dusabye, rimwe na rimwe tuba twarahawe ibyo twagereranya n’ibuye, inzoka, cyangwa sikorupiyo, ariko Imana nka Data wa twese wo mu ijuru kubwa Yesu Kristo (Nk’uzi ibyiza kuruta ibindi, uzi byose, kandi ushobora ibyiza kurusha ibindi ), arategereza kugeza aho, ku bw’amasengesho atitiriza yo gusaba, gushaka no gukomanga, amasengesho yacu ahindurwamo ubushake bw’Imana kugeza aho tumenyeye inyigisho ishaka kutwigisha binyuze mu imenyerezwa ry’intango y’amasengesho atitiriza yo gusabira abandi.

Mu by’ukuri gusenga kwacu, ntigukwiye kwanduzwa n’ikintu cyose nk’ibyaha, kuko ibyaha ni imwe mu mbogamizi ikumira gukora kw’Imana muri twe. Niba umutima warahindutse icumbi ry’ikibi , ikibanze ni uko ubanza ukemerera Umwami Yesu akinjira mu mutima wawe, akirukana izo mbaraga wacumbikiye zagutsikamiraga, akayobora ubugingo bwawe kuri Yesu.

Nkuko twabibonye hejuru mu mitere y’umuntu, mu kumva yuzuye kwe bimusaba kugira ivomo ryo mu buryo bw’umwuka. Ndakwifuriza kurigira muri Yesu Kristo. Ubwo yari akiri hano ku isi yadusabye kutizirikana twe ubwacu gusa, ahubwo gusenga kwawe gukwiye kuzirikana umuryango wawe, igihugu cyawe, inshuti zawe ndetse n’abanzi bawe, ubundi dutegereze imirimo y’Imana twizeye kandi twihanganye isaha y’Imana nigera tuzabona kugira neza kwayo.

Gusenga ushikamye byongera umubano hagati ya Muntu n'Imana

Urinzwenimana Mike


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .