00:00:00 IGIHE NETWORK KN KINYARWANDA EN ENGLISH FR FRANCAIS

ADEPR mu gahenge nyuma y’induru z’urudaca

Yanditswe na Ishimwe Israel
Kuya 18 Ukuboza 2020 saa 06:48
Yasuwe :
0 0

Iminsi irabarirwa ku ntoki ngo umwaka wa 2020 urangire! Ni amezi 12 yashaririye benshi kubera icyorezo cya Coronavirus, n’ingamba zafashwe mu guhangana n’ikwirakwira ryacyo.

Abemera Imana bo bayishimira uburinzi bwayo kuri bo aho bavuga ko nubwo byari bikomeye cyane ariko ‘Iyo bizera’ yakomeje kubarwanirira, iba mu ruhande rwabo.

Ushatse kuvuga ku bafite ishimwe rikomeye ntiwarenza ingohe abayoboke ba ADEPR, itorero ribarizwamo abasaga miliyoni ebyiri mu Rwanda.

ADEPR yatangiye umwaka itutumbamo umwuka mubi, ndetse icyari kibyimbye cyaje kumeneka, ubuyobozi bwariho buvaho, intebe y’itorero yicazwamo amaraso mashya.

Bijya kuzamba ibibazo by’itorero byatangiriye ku mutwe waryo, ahavugwaga kuryana hagati ya Rev. Karuranga Ephrem wari Umuvugizi wa ADEPR na Rev. Karangwa John wari umwungirije; uku kurebana ay’ingwe kwanarandiye mu kunyuranya mu ifatwa ry’imyanzuro hagati ya Biro Nyobozi n’Inama y’Ubuyobozi y’itorero, CA.

Umwaka watangiye aba bombi batari kumwe kuko Rev. Karangwa yari afungiye i Mageragere; yafashwe mu Ukwakira 2019 ashinjwa gukoresha inyandiko mpimbano, igihe yiyamamarizaga umwanya wo kuba Umuvugizi wungirije wa ADEPR kuko byasabaga ko agomba kuba afite Impamyabumenyi yo ku rwego rwa Bachelor’s.

Icyo gihe yatanze impamyabumenyi yo muri Philippines n’iyo muri Uganda, biza kumenyekana ko ari impimbano atigeze ahiga.

Akigezwa mu Rukiko rw’Ibanze rwa Kicukiro nta muyobozi n’umwe wo muri ADEPR wari uhari, icyo bamwe buririyeho bavuga ko hari akangononwa mu mubano n’abo bakorana.

Ukurebana ay’ingwe kwari mu bwiru kwahishuwe nyuma yo ku wa 30 Kamena 2020 ubwo Urukiko rwisumbuye rwa Nyarugenge rwemezaga ko Rev. Karangwa ari umwere, icyemezo Ubushinjacyaha bwajuririye.

Agifungurwa yasubiye mu mirimo ye bisanzwe, anahabwa ibigenerwa umukozi birimo imodoka ariko hadateye kabiri atangira kwishyuza umushahara atahawe wa miliyoni 28 Frw w’amezi umunani yamaze atari mu kazi.

Icyo gihe Rev Karuranga ku wa 23 Nyakanga 2020 yamugiriye inama yo kwandika ibaruwa agaragaza aho yari ari kugira ngo hagenwe ibikurikije amabwiriza itorero rigenderaho n’imicungire y’abakozi baryo.

Aha niho batangiye guterana amagambo mu nyandiko zahoraga zisakazwa mu itangazamakuru, zirimo n’abasaba no kwishinganisha aho Rev. Karangwa yaregaga Karuranga muri CA avuga ko amurwanya, akanamutera ubwoba.

Rev. Karangwa John wari Umuvugizi wungirije (ibumoso) yavuze ko Umuvugizi wa ADEPR, Rev Karuranga Ephrem (iburyo) amurenganya yitwaje igitinyiro cy’umwanya afite

Mu guhosha uwo mwuka, Inama y’Ubuyobozi yateranye ku wa 26 Kanama 2020 yanzura ko Rev Karangwa ahagarikwa by’agateganyo amezi atatu.

Nk’uwashyiraga mu bikorwa imyanzuro, Rev. Karuranga yasabye Rev. Karangwa gutanga ibikoresho by’akazi, ariko CA irabyitambika ahubwo isaba uwari Umuvugizi ibisobanuro kuri icyo cyemezo.

Ni ibyemezo byafashwe nko kwikora mu nda no kwerekana ubunyamwuga buciriritse mu buyobozi no kunanirwa guhosha amakimbirane.

Mu bindi byateje umwuka mubi muri ADEPR, harimo ko Rev. Karuranga yasabye abakirisitu ituro mu gihe igihugu cyari muri gahunda ya Guma mu rugo, igikorwa cyafashwe nko gukama intama aragiye aho kuzigoboka muri ibyo bihe bikomeye zari zikeneye ihumure ry’umwungeri.

Muri Gicurasi, Biro Nyobozi yashinjwe kugabanya imishahara y’abakozi b’itorero binyuranye n’amategeko ariko yo ikavuga ko mu bihe bidasanzwe ifite ububasha bwo gufata ibyemezo byihutirwa. Yananenzwe ko uwakomozaga ku mutungo wanyerejwe, yahezwaga bwangu mu nshingano.

Ibi bibazo byose bishingiye ku miyoborere, imikoranire mibi mu nzego n’imikorere yahemberaga amacakubiri no kubangamira ituze ry’abagize ADEPR, nibyo byagejeje ku cyemezo simusiga cy’Urwego rw’Igihugu rw’Imiyoborere (RGB) cyo gukuraho inzego z’ubuyobozi zirimo Biro Nyobozi, Inteko rusange, Inama y’Ubuyobozi na Komite Nkemurampaka.

Rev. Karuranga yakuweho amaze amezi 39 ayobora ADEPR; yegujwe abura imyaka itatu ngo manda ye irangire.

Ku wa 8 Ukwakira 2020 nibwo RGB yatangaje Komite y’Inzibacyuho iyobowe na Pasiteri Ndayizeye Isaïe, ihabwa amezi 12 ashobora kongerwa.

Umuvugizi wa ADEPR, Pasiteri Ndayizeye Isaïe, yavuze ko impinduka ziri gukorwa mu itorero zijyanye n'ikusanyabitekerezo ryakozwe mu banyetorero bigendanye n'umurongo bashaka guha itorero

-  Umwaka watangiye mu nduru, urangiye mu ituze

Umwaka wa 2020 watangiye ADEPR yakamo umuriro, abasesenguzi n’abakirisitu mu itorero bafite icyizere ko ugeze ku musozo nta bombori bombori zumvikana mu itorero.

Umunyamakuru akaba n’Umusesenguzi, Ntigurirwa Peter, yabwiye IGIHE ko hari icyizere ko abayobozi bashya bamazeho amezi abiri n’icyumweru bazasubiza ibintu ku murongo.

Yagize ati “Iyi nzibacyuho yagiyeho ituma abantu baceceka kuko hari abari bafite gahunda yo gushaka uko ababasimbuye [Rev Karuranga] bakora bahuzagurika, bandikishaga inkuru zibaharabika, basaga n’aho bahanganye.’’

Yavuze ko uko guhangana ariko kwatumaga abayobozi bahora bahangayitse mu mirimo yabo.

Yakomeje ati “Hari n’abatarumvikanaga kandi bifuzaga ko bariya bayobozi bavaho. Ubu abantu baratunguwe no kubona abayobozi bashya batagize uruhare mu kubashyiraho kuko byakozwe bucece mu bushishozi bwa RGB hajyaho abantu bitondewe, byatumye abantu batanga agahenge.’’

Ntigurirwa avuga ko nubwo hari abanenga uko abayobozi bashyizweho ariko ‘ibibi birutana’ kuko ukurikije ibitangazwa n’ibihari bitanga icyizere.

Avuga ati "Igikenewe ku bakirisitu ni ukubona abanyakuri. Itorero rikwiye kubakira ku buzima bw’umwuka. Nubwo tutarabona igihe gihagije ngo turebe ibyo bakora, usanga bashyigikiwe. Tubafitemo icyizere.’’

Komite y’Inzibacyuho igaragarizwa icyizere ko iri gukora amavugurura nk’abayobozi ‘b’abanyakuri kandi b’abizerwa.’

Ntigurirwa ati “Kuba bataratanga raporo yanditse ngo abakirisitu bayibone ntiwavuga ko byacitse. Twabaha amezi atandatu ngo tubone icyerekezo cy’aho bigana. Tubanze turebe, baratuje nta muntu uri kubarwanya. Tubahe umwanya.’’

-  Ni agashya! ADEPR yagize ibanga

Hambere buri ntambwe itewe n’umuyobozi muri ADEPR, amakuru yaruhukiraga mu itangazamakuru, agataramirwaho ku mbuga nkoranyambaga.

Ubu keretse guhimba no gushyushya inkuru, hamaze kabiri nta byerekeye ADEPR bihwihwiswa hanze aha.

Umuhanzi Niringiyimana Daniel Svensson wavukiye muri ADEPR yavuze ko yakunze koabayobozi bashya bafite umutima w’impuhwe utagambirira kwihimura no gukomeretsa abandi.

Yagize ati “Bitandukanye n’izindi ngoma zabayeho, aba bafite ibanga rikomeye. Abantu baracecetse bategereje kumva icyo bavuga. Bafite umutima wo guharanira ko buri muntu mu itorero azagira aho aruhukira. Ntibahise bafata abashumba ngo babakure ku buyobozi. Nta mutima wo gukubitira mu cyico ngo bihimure, nta munyangire. Barajijutse cyane.’’

Umuvugabutumwa muri ADEPR, Kalisa Fred, yashimye ko abayobozi bashya bagabanyije umwuka mubi wari umaze iminsi mu itorero.

Yagize ati “Ni byiza ko bakorera ibintu imbere ntibisohoke. Bakurikiranye dosiye ya Zigirinshuti, asubizwa mu nshingano [yari yahagaritswe kubera ubuhanuzi yatanze mu bihe bya Coronavirus.]’’

Yasabye ko bakwihutisha impinduka zikenewe, hakanazirikanwa ukwigenga kwa paruwasi kuko “byereka abakirisitu ko ibyo bakora ari ibyabo ndetse amafaranga batanga agaruka kubaka iwacu.’’

-  Nta byera ngo de!

Umwe mu bapasiteri bo muri ADEPR wifuje ko amazina ye adatangazwa, yavuze ko nubwo hari byinshi byakozwe ariko hakiri ibyuho.

Yagize ati “Nta kintu na kimwe baratangariza abakirisitu, abantu bose bategereje ikizavamo. Ese ibyo bari gukora bizafata igihe kingana gute? Uko bitinda ni uko abantu bata icyizere.’’

Avuga ko uburyo bwiza bwari bukwiye kubakira ku gutangariza abakirisitu imirongo migari y’aho itorero rigana.

Ati “Ni urugendo rurerure kuko ibyabayeho mu myaka 80, ntiwabikemura mu myaka itanu cyangwa umwe. Umuvuduko bari gukoresha mu gukemura ibibazo ntushimishije kuko tubahanze amaso.’’

-  ADEPR iragana aheza

Umuvugizi wa ADEPR, Pasiteri Ndayizeye Isaïe, yabwiye IGIHE ko mu minsi ya mbere babanje gukusanya amakuru ku miterere y’ibibazo.

Yagize ati “Twumvise ibitekerezo by’abantu, kubisesengura no gushaka ibisubizo byafasha itorero. Turishimira ko ibyiciro byose by’abanyetorero, twahuye nabyo ndetse baduhaye amakuru y’ibitagenda n’ibyahinduka.’’

Yavuze ko icyatumye abakirisitu, baganirijwe binyuze mu byiciro bibahagarariye, basubiza agatima impembero ari uguhabwa ijambo mu mpinduka zikenewe muri ADEPR, nubwo ibyavuyemo bitaratangazwa.

Ati “Ubu turi kubisesengura, igihe cyo kubitangaza ntikiragera. Sinavuga umunsi cyangwa igihe iki n’iki ariko igihe nikigera bazabimenya. Icyihutirwa si ukubitangaza ahubwo ni uko ibyo ugiye gutangaza birimo umuti urambye.’’

Pasiteri Ndayizeye yavuze ko bihutiye gukemura ibibazo rusange, iby’abantu ku giti cyabo birekerwa izindi nzego.

Ati “Ibibazo byose by’abanyetorero ntibikemurwa na Biro Nyobozi. Hari ibyakemutse binyuze mu mirongo migari ibidufasha.’’

Komite y’Inzibacyuho iyobowe na Pasiteri Ndayizeye Isaïe, yungirijwe na Pasiteri Rutagarama Eugène; Umuyobozi Nshingwabikorwa, Pasiteri Budigiri Herman; Umuyobozi ushinzwe Umutungo, Imari n’Imishinga, Umuhoza Aurélie n’Umuyobozi ushinzwe Abakozi n’Ubutegetsi, Gatesi Vestine.

Yasabwe kuvugurura imiyoborere, amategeko, inzego z’imiyoborere n’inzego z’imirimo ndetse n’imikorere n’imikoranire muri ADEPR no gushyiraho uburyo buhamye kandi butanga umuti urambye wo kubaka itorero. Banasabwe gukoresha igenzura ry’imikorere, abakozi n’umutungo ngo rifashe muri ayo mavugurura no kwemeza no gushyira mu bikorwa amavugurura ya ADEPR.

Uhereye iburyo: Umuvugizi wa ADEPR, Pasiteri Ndayizeye Isaïe; Pasiteri Rutagarama Eugène umwungirije; Umuyobozi Nshingwabikorwa, Pasiteri Budigiri Herman; Umuyobozi ushinzwe Umutungo, Imari n’Imishinga, Umuhoza Aurélie n’Ushinzwe Abakozi n’Ubutegetsi, Gatesi Vestine. Aba ni bo bahawe inshingano zo kuvugurura ADEPR no kuyiha icyerekezo gishya

Inkuru wasoma:

Ijambo rya mbere rya Pasiteri Ndayizeye Isaïe wahawe kuyobora ADEPR mu nzibacyuho

Abayobozi bashya bahawe kuyobora ADEPR mu nzibacyuho y’umwaka


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .