Zimwe muri sikandali zaranze imyaka 8 Benedigito amaze ari umushumba wa kiliziya Gatolika

Zimwe muri sikandali zaranze imyaka 8 Benedigito amaze ari umushumba wa kiliziya Gatolika


Yanditswe kuya 12-02-2013 - Saa 08:59' na Kayonga J.

Papa Benedigito wa XVI yatunguye benshi ubwo kuri uyu wa mbere tariki 11 Gashyantare yatangazaga ko mu mpera z’uku kwezi, tariki ya 28, azegura ku mirimo ye ku mpamvu z’imiterere y’ubuzima bwe. Dusubize amaso inyuma turebera hamwe bimwe mu byaranze imyaka umunani, byiganjemo ibibazo by’ingutu n’intambara zagiye zikomerera nyir’ubutungane.

Iyi nkuru yo kwegura kwa Papa Benedigito hari benshi bemeza ko ifite ubukana nk’ubwa bombe y’inkazi. Imbere y’abakaridinali bari bateraniye muri kimwe mu byumba by’I Vatikani, uyu mushumba wa kiriziya gatolika wa 265 yatangaje ko yeguye ku mirimo ye. Yagize ati “Muri iyi si ya none, ikomeje kurangwa n’impinduka zihuse ndetse n’ibibazo bifitiye umumaro ukomeye ubuzima bw’imyizerere, kugirango umuntu abashe kuyobora iyi nkuge ya Mutagatifu Petero no gusakaza ivanjili, ingufu z’umubiri na roho ziri ngombwa”, ibi papa yabitangaje nyuma y’imyaka umunani amaze ku ntebe y’ubutungane, imyaka itari yoroshye na mba kuri kiriziya gatolika.

Nyuma yo gutorerwa kuyobora kiriziya gatolika tariki 19 Mata 2005, ntibyari byoroshye kuzungura Yohani Pawulo wa Kabiri, papa wabaye ikirangirire ndetse wari ukunzwe bikomeye. Benedigito wa XVI, kimwe mu bintu byamugoye cyane kuva ku ikubitiro ndetse kikamutandukanya cyane n’uwo yari azunguye ni uko we mu ruhame atabasha kwisanzura ndetse kenshi bimuviramo ingorane mu gushyikirana n’abantu.

Benedigito XVI ubwo yari mu ruzinduko rwa mbere ku mugabane w'Afurika, ahera muri Cameroun

Mu kiganiro yagiranye na televiziyo y’Abafaransa France 24 nyuma y’amasaha macye papa atangaje ko azegura ku ntebe y’ubutungane mu mpera za Gashyantare, Philippine de Saint-Pierre, umuyobozi w’ibiganiro kuri televiziyo ya kiriziya gatolika KTO, yagize ati “niba yeguye kuri ubu, birashoboka ko kuri we byinshi mu byo yifuzaga kugeraho kuri ubu yabigezeho”. Hari gahunda nyinshi zari zimuri ku mutima yabashije gusohoza. Gusa imyaka umunani amaze ku ntebe y’ubutungane ntiyaranzwe n’ituze muri kiriziya kuko igice kinini muri yo cyaranzwe n’ibibazo bitandukanye ; igikomeye muri byo kikaba ari icy’abihaye Imana bakoranaga imibonano mpuzabitsina n’abana bakiri bato.

• Kiriziya mu mazi abira nyuma yo gutahura ko abihaye Imana bakoranaga imibonano mpuzabitsina n’abana bari bakiri bato

Nyuma yo kugera ku ntebe y’ubutungane mu mwaka wa 2005, itahurwa ry’amahano y’ikorwa ry’imibonano mpuzabitsina ry’abihaye Imana ku bana bakiri bato ryarimo rivuza ubuhuha muri Leta Zunze Ubumwe z’Amerika. Mu mwaka wa 2008, Papa Benedigito wa XVI ni we wabaye umupapa wa mbere watangaje ko atewe “ikimwaro” ndetse ahura n’abahohotewe. Gusa bidatinze mu mwaka wa 2009 hakomeje gutahurwa ibikorwa nk’ibyo byo gukorana imibonano mpuzabitsina kw’abihaye Imana n’abana bakiri bato hirya no hino ku isi, cyane muri Irlande, ndetse no mu bindi bihugu byinshi mu Burayi ndetse n’Amerika ya ruguru n’iy’amajyepfo.

Guhishira abihaye Imana bakoraga imibonano mpuzabitsina n’abana nabyo byateje impagarara. Kiriziya yashinjwe guhishira abihaye Imana bakoraga imibonano mpuzabitsina n’abana bakiri bato kuva mu mwaka w’ 1975 kugera mu mwaka wa 2004. Aha byabaye intandaro yo gutahura ibikorwa nk’ibi byakorewe mu Budage, mu Buholandi, muri Autriche, ndetse no muri Leta Zunze Ubumwe z’Amerika. Papa Benedigito wa XVI yaje gutangaza ko ibikorwa byo guhuza ibitsina kw’abihaye Imana n’abana bakiri bato bihangayikishije kiriziya ndetse anabisabira imbabazi.

Bidateye kabiri ariko, papa ubwe yashinjwe guhishira umupadiri wakoranaga imibonano mpuzabitsina n’abana bakiri bato ubwo yari akiri karidinali. Mu gihe Vatikani yagaragaje ko iri ku ruhande rwa papa muri iki kibazo, hari amajwi yavugiye hejuru amusaba kwegura ndetse iminsi mikuru ya Pasika icyo gihe yizihizwa mu mwuka mubi. Tariki 10 Mata 2010, Vatikani yashyize ahagaragara gahunda ihamye yo kurwanya ikorwa ry’imibonano mpuzabitsina ry’abihaye Imana n’abana bakiri bato, ibinyujije ku rubuga rwayo rwa internet.

Kiriziya Gatolika yahuye n'ikibazo gikomeye cy'abihaye Imana bakoranaga imibonano mpuzabitsina n'abana bakiri bato

Muri iki gihe ubwo kiriziya yari mu bihe bitari biyoroheye, Benedigito wa XVI ku nshuro zitandukanye yashinjwe kuba mu myaka 24 yamaze ari mu nzego zo hejuru muri kiriziya Gatolika atarigeze afata ingamba zikomeye zo kurwanya iki kibazo, aha bimwe mu bikomerezwa by’I Vatikani byagaragaje ko harimo umutego wo kwifashisha itangazamakuru mu gusebya kiriziya, ariko bidatinze Benedigito wa XVI yahisemo kwemera ibyaha bya kiriziya, nyuma yaje gufata icyemezo cyo gushyira mu kiruhuko igitaraganya abayobozi bo hejuru muri kiriziya bagera ku 10 bagaragaweho no gukora ibyaha byo guhuza ibitsina n’abana bakiri bato.

Umunyamakuru wa La Croix I Rome waganiriye na France 24, Frédéric Mounier, yagaragaje ko Benedigito wa XVI ntako atagize asaba Yohani Pawulo wa kabiri kugira icyo akora kuri iki kibazo. Yagize ati “Kimwe mu biranga Benedigito wa XVI ni ubunyangamugayo no kudahishira amafuti, ntako atagize ngo ashyire ku murongo uboneye ubutabera bw’I Vatikani mu rwego rwo gukemura ibi bibazo”.

• Akimara gutorwa, Papa Benedigito wa XVI yateje impagarara ubwo yavugaga ko u Burayi bushingiye idini Gatolika

Ku nshuro ya mbere ubwo yavugaga ijambo mu ruhame akimara gutorwa, Papa Benedigito wa XVI yateje impagarara ubwo yavugaga ko adashimishijwe no kuba umushinga w’Itegeko Nshinga ry’Umuryango w’Ubumwe bw’u Burayi utagaragaza neza uburyo uwo mugabane ushingiye ku mahame ya gikirisitu. Imyaka ibiri nyuma yaho, Vatikani yaje gutangaza ko ishyigikiye ko Turukiya yakwinjira mu Muryango w’Ubumwe bw’u Burayi n’ubwo ari igihugu ahanini gituwe n’abayisilamu.

• Ijambo yavugiye I Ratisbonne ryateye uburakari ku bayisilamu

Tariki 12 Nzeli 2006, Benedigito wa XVI yavuze ijambo ryibanze ku kwemera ubwo yari mu Budage muri kaminuza ya Ratisbonne. Mu rwego rwo kwamagana ubugizi bwa nabi bukorwa mu izina ry’idini, yatanze urugero rw’umwami w’abami w’I Byzantin Manuel II Palaiologos wabayeho hagati y’umwaka wa 1350 – 1425, uyu yamaganye Intumwa y’Imana Mohamed avuga ko “yifashishaga inkota mu gusakaza ukwemera kw’idini y’abayisilamu”. Abayisilamu ku isi hose bakozwe mu jisho n’urugero Benedigito yatanze, hamwe na hamwe haba n’imyigaragambyo yo kumwamagana.

Nyuma y’amezi macye atanze urwo rugero rutashimishije abayisilamu, yagerageje kwikosora avuga ko ababajwe no kuba ijambo yavugiye I Ratisbonne ryarabaye intandaro yo kutumvina. Nyuma yaho mu myaka itatu yakurikiye, mu gihe ijambo yavugiye Ratisbonne ryari rikiri mu mwitwe y’abantu, nyir’ubutungane yanyarukiye muri Jordania aho yari agiye gukorera urugendo rwe rwa mbere ku butaka bw’abayisilamu. Yasengeye mu musigiti wa Al-Hussein, umunini gusumba indi muri icyo gihugu, icyo gihe aba abaye umupapa wa kabiri, nyuma ya Yohani Pawulo wa kabiri, wabashije kwinjira mu musigiti.

Papa Benedigito wa XVI i Ratisbonne mu Budage ubwo yavugaga ijambo ryateye umwuka mubi hagati ya kiriziya Gatorika n'abayisilamu

• Ikibazo cya Williamson n’ubwiyunge n’abaharanira ko nta mpinduka yabaho ku mahame ya cyera y’idini

Kuva akimara kugera ku ntebe y’ubutungane, Benedigito wa XVI yatangiye igikorwa cy’ubwiyunge n’igice cy’abagatolika baharanira ko nta mpinduka yabaho ku mahame n’imigenzereze bya cyera by’idini (intégriste). Muri nyakanga 2007, yashyizeho itegeko ry’uko misa zizajya zisomwa mu kilatini nk’uko byahoze.

Nyuma gato Benedigito wa XVI akoresheje iteka, yagize impfabusa icibwa mu idini (excommunication)ry’abihaye Imana bane ryari ryarakozwe na Papa Yohani Pawulo wa kabiri kubwo kwigira ibyingenge mu dini gatolika. Umwe muri bo yari musenyeri Williamson, uzwi cyane ku kuba yaragiye apfobya Jenoside yakorewe Abayahudi ndetse no kuba ashinja abanyamerika kuba aribo ubwabo bateguye igikorwa cyo ku itariki 11 Nzeli 2001 ubwo imiturirwa ya World Trade Center yibasirwaga n’ibitero by’abiyahuzi.

Iki cyemezo cyateje impagarara mu buryo bubiri : mu bayahudi no mu bagatolika ubwabo. Abayahudi bahise basaba ibisobanuro birambuye papa, bamusaba ko yagaragaza neza aho ahagaze ku birebana na Jenoside yabakorewe. Ibintu bidakunze kubaho, n’umuyobozi wa guverinoma, Angela Merkel, yasabye mu buryo bweruye papa ko yatanga ibisobanuro bifatika. Vatikani yahise itangaza ko itari izi amagambo yavuzwe na Williamson, uyu bamusaba ko yabisabira imbabazi. Gusa imbabazi zasabwe na Williamson ubuyobozi bwa kiriziya bwagaragaje ko “zidahagije”.

• Yongeye gukomeza igikorwa cyo gushyira mu rwego rw’abahire Piyo wa XII

Mu buryo bwatunguye benshi, Benedigito wa XVI yashyize umukono ku iteka ritangiza igikorwa cyo gushyira mu rwego rw’abahire Papa Yohani Pawulo wa kabiri, ndetse na Piyo wa XII, umupapa utavugwaho rumwe na benshi wayoboye kiriziya gatolika hagati y’umwaka w’ 1939 n’ 1958. Piyo XII ashinjwa kuba atarigeze arwanya cyangwa ngo yamagane ibyaha byakozwe n’abanazi. Vatikani yakomeje kujya igaragaza ko Piyo wa XII yarokoye abayahudi mu Burayi, cyane i Roma, aho ngo yabikoraga rwihishwa bitazwi n’inzego z’ubuyobozi za kiriziya, ndetse kandi ko ngo impamvu yabikoraga bucece kwari ukugirango adashyira ubuzima bwabo mu kangaratete. Iki gikorwa kugeza n’ubu kiracyatera umwuka mubi hagati ya kiriziya gatolika n’abayahudi.

Papa Pie XII yakirwa n'abanazi. Uyu Benedigito wa XVI yatangije igikorwa cyo kumushyura mu rwego rw'abahire mu gihe ashinjwa n'abayahudi kuba yari ashyigikiye abanazi

• Mu mwaka umwe, yamaganye byimazeyo ikoreshwa ry’agakingiro, nyuma arisubira

“Agakingiro karushaho gutuma ikibazo cya Sida gifata indi ntera”. Iyi nteruro yasakaye cyane mu bitangazamakuru by’isi yose nyuma y’aho papa ayivugiye ari mu ndege mu mwaka wa 2009 ubwo yari mu rugendo rwa mbere ku mugabane w’Afurika rwamuganishaga muri Cameroun. Muri aya magambo, Benedigito wa XVI yarengeje uwamubanjirije, Yohani Pawulo wa kabiri, warwanyaga ikoreshwa ry’agakingirizo nk’igisubizo ku gukumira indwara ya Sida. Nyuma yaho mu mwaka wa 2010, mu gitabo cye yise “Urumuri rw’isi”, yabaye umupapa wa mbere wemeye ko ikoreshwa ry’agakingirizo, mu buryo bumwe na bumwe, rishobora gukoma mu nkokora ikwirakwira rya Sida.

Mu mwaka umwe, Benedigito wa XVI yamaganye byimazeyo ikoreshwa ry'agakingirizo, nyuma arisubira yemeza ko kakwifashishwa mu kurwanya ikwirakwira rya Sida

• Sikandali iheruka : Vatileaks, ikibazo cyahuhuye Benedigito wa XVI

“Vatileaks” ni ryo zina ryahawe sikandali yashegeshe Vatikani mu mwaka wa 2012 ubwo inyandiko z’ibanga za Vatikani zashyirwaga ahagaragara. Umukozi wa hafi wa papa, Paolo Gabriele yaje gukekwaho ko ari we uri inyuma y’isakara ry’izo nyandiko z’ibanga, ahita afatwa arafungwa. Izo nyandiko zashyize ahagaragara byinshi mu bitazwi bibera I Vatikani birimo umwuka mubi hagati y’abaharanira impinduka n’abatabikozwa, abaharanira ko ibintu byose byakorwa mu mucyo mu gihe abandi bahitamo ko gahunda z’I Vatikani zakorwa mu bwiru. Izo nyandiko kandi kandi zigaragaza uburyo ruswa ivuza ubuhuha I Vatikani, urwango hagati y’abayobozi bo hejuru muri kiriziya ndetse n’ubugambanyi. Geneviève Delarue, inzobere mu birebana n’amadini kuri radiyo y’Abafaransa RFI, yavuze ko Vatileaks yahuhuye Papa Benedigito wa XVI wari usanzwe atorohewe n’ibibazo by’urudaca byo mu bihe bishize.

Foto : Internet

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO