U Burusiya bwahagaritse Abahamya ba Yehova bubafata nk’intagondwa

Yanditswe na Cyprien Niyomwungeri
Kuya 20 Mata 2017 saa 09:21
Yasuwe :
0 0

Urukiko rw’Ikirenga rw’u Burusiya rwahagaritse ibikorwa by’idini y’abahamya ba Yehova muri iki gihugu nyuma y’ubusabe bwa Minisitiri w’Ubutabera wasabye ko iri dini ryafatwa nk’agatsiko k’intagondwa.

Umucamanza muri uru rukiko, Yuri Ivanenko, yategetse ko Ibiro bikuru by’abahamya ba Yehova i St Petersburg n’inzu z’ubwami 395 mu Burusiya bifungwa ndetse n’umutungo wabo ugafatirwa ugashyirwa mu wa leta.

Ibiro Ntaramakuru byo muri iki gihugu, Interfax, byanditse ko kuri uyu wa Kane umunyamategeko wa Minisiteri y’ubutabera mu Burusiya, Svetlana Borisova, yavuze ko abahamya ba Yehova bateza ikibazo ku burenganzira bw’abaturage, amategeko y’igihugu n’umutekano wa rubanda.

Abanyamategeko b’idini y’abahamya ba Yehova barimo Sergei Cherepanov, batangaje ko bazakora ibishoboka byose bakajuririra iki cyemezo mu Rukiko rw’uburenganzira bwa muntu rw’u Burayi.

Mu bihugu byinshi Abahamya ba Yehova bafite icyicaro gikuru i New York muri Leta Zunze Ubumwe za Amerika, bakunda kujyanwa mu nkiko kubera imyemerere yabo irimo kudatanga no kudahabwa amaraso, kutemera ibikorwa bya gisirikare na politiki n’ibindi.

Mu Burusiya abahamya ba Yehova barenga ibihumbi 175, bakunze gushyirwaho igitutu mu myaka ishize, aho mu 2015 Urukiko rw’Ikirenga rwavuze ko urubuga rwemewe rw’Abahamya ba Yehova rwa www.jw.org ruriho ibitekerezo by’ubutagondwa, bategeka ko rufungwa.

Ibigo bitanga interineti mu Burusiya hose byafunze urwo rubuga kandi kwamamaza urwo rubuga biba icyaha gihanwa n’amategeko muri icyo gihugu. Inkiko zo muri iki gihugu zigeze kwemeza ko ibitabo 87 by’Abahamya bishyirwa ku rutonde rw’ibitabo birimo ibitekerezo by’ubutagondwa.

Abahamya ba Yehova bavuga ko iyi gahunda y’u Burusiya yo kubibasira ishingiye ku bihamya bidafatika n’imikoreshereze mibi y’itegeko ry’icyo gihugu rikumira ibikorwa by’ubutagondwa.

Mu mwaka wa 2015, Komite y’Umuryango w’Abibumbye Iharanira Uburenganzira bw’Ikiremwamuntu yavuze ko ihangayikishijwe na raporo zitandukanye zigaragaza uko iryo tegeko rikoreshwa hagamijwe kuvutsa Abahamya ba Yehova n’abandi bantu uburenganzira bwo kuvuga icyo batekereza, umudendezo mu by’idini no kubibasira.

Mu 1991 nibwo abahamya ba Yehova bemewe bwa mbere nk’idini mu Burusiya.

Bamwe mu bitabiriye isomwa ry'urubanza rwo guhagarika Abahamya ba Yohova mu Burusiya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244