Kwamamaza

Tereza washinze umuryango w’aba-Calicutta azagirwa umutagatifu mu minsi ibarirwa ku ntoki

Yanditswe kuya 2-09-2016 saa 19:31' na Ntakirutimana Deus


Kiliziya Gatorika ku Isi n’imisozi y’i Calcutta mu Buhinde yuzuye ibyishimo by’uko umwe mu bayo witangiye ibikorwa by’ubugiraneza byabengutswe n’Isi yose agiye guhabwa icyubahiro cy’Ubutagatifu kiliziya igena uwapfuye yarabaye intangarugero akiri ku Isi.

I Vatican kwa Papa ku rubuga rutagatifu rwa Kiliziya ya Mutagatifu Petero, mu byishimo by’abaturutse imihanda yose y’Isi, niho Papa Francis azemereza ku mugaragaro ko Tereza ashyizwe mu rwego rw’abatagatifu, ku cyumweru tariki ya 4 Nzeri 2016.

Mama Tereza cyangwa Tereza w’i Calcutta ni izina ryamamaye ku Isi hose, mu bamumenye n’abatarigeze bagira icyo abakorera, bashima ibikorwa bye yahawe n’abaciye bugufi.

Avuka mu 1910 yiswe n’ababyeyi be Agnes Gonxha Bojaxhiu, nyuma ahinduka ‘Mama’ rikomoka kuri Madre yahamagarwaga n’ababembe, imfubyi n’abandi bababaye yitayeho, bo babona ko Isi yabaharurutswe, babonaga uko ashyashyana abitaho, mu rwego rwo kumushimira ko yaruse Isi yabatereranye, bati ’Madre,’[Mama].

U Rwanda rwashyingiye Tereza ,imiryango yombi igira ibyago

Yari inkuru mbi ku Banyarwanda, ubu yamaze kwibagirana mu mitima ya bamwe, kumva ko ababikira babiri b’Abanyarwanda Reginette Uwingabire w’i Janja na Marguerite Mukashema bari mu bikorwa by’ubugiraneza mu muryango w’Intumwa z’Urukundo washinzwe na Mama Tereza biciwe muri Yemen n’abahezanguni bo mu mutwe wa Islamic State, tariki ya 4 Werurwe 2016 , bari mu bantu 16 biciwe aho bakoreraga ubwo butumwa.

Mu marira n’agahinda basomewe misa yo kubasezeraho mu Rwanda tariki ya 13 Werurwe 2016. Musenyeri Mbonyintege Smaragde, ari i Kivumu muri Diyoseze ya Kabgayi aruhura abari bababaye ko bishwe bahowe Imana kuko baguye mu butumwa bwiza.

Ati “ Kuba Abamaritiri si ubugome bw’Imana ahubwo ni ubuntu bwayo imbere y’ubugome bw’abantu.”

Igihango cya Tereza n’u Rwanda cyatangiye kare mu 1995 asura u Rwanda, ndetse we na Papa Jean Paul II wahaje mu 1990, bakaba aribo batagatifu bakandagiye mu Rwanda, bakaganira n’abaho.

Bashinze n’ibigo bitanga ubufasha mu Rwanda, Papa i Mbare mu karere ka Muhanga na Tereza w’i Calicutta hafi na Kiliziya yitiriwe umuryango mutagatifu(Ste Famille), aho yanasengeye mu 1995, hazabera na Misa yo kwishimira ko ashyizwe mu batagatifu ku wa mbere tariki ya 5 Nzeri 2016, ku isaha y’i saa kumi n’imwe z’umugoroba.

Mama Tereza ni muntu ki?

Mama Tereza yavutse mu mwaka wa 1910 mu muryango w’abanya-Albanie muri Macédoine, agace kari mu maboko y’ubwami bwa ottoman. Yaje kujya mu Buhinde afite imyaka 18 agiye kwiha Imana mu muryango w’ababikira bitiriwe umubyeyi w’i Lorette, yaje guhabwa ubwenegihugu bw’u Buhinde butuma benshi bamwita Umuhinde.

Mu 1946 afite imyaka 36 y’amavuko yabonye uburyo Abahinde bari mu mihanda y’i Calcutta bari bakennye, abandi bafite uburwayi barabuze ubitaho, afata umwanzuro wo gushinga umuryango wo kwita ku babaye gutyo, yise ‘Abamisiyoneri n’Urukundo abandi bita umuryango w’Intumwa z’Urukundo mu 1950.

Nyuma y’imyaka ibiri atangira kwambara umwambaro w’umweru n’ubururu witwa ‘Sari’ wambarwaga n’abakene nyakujya mu Buhinde, ndetse wambarwa n’ababikira yashinze hirya no hino ku Isi, mu rwego rwo kwicisha bugufi.

Tariki ya 25 Gicurasi 1931 afata izina rya Mary-Teresa ahereye ku izina rya Mutagatifu Tereza w’Umwana Yezu cyangwa Tereza w’i Lisieux[mu Bufaransa] yiyambazaga bari imfubyi kimwe wari mu muryango w’Ababikira b’aba Karumerita.

Mu butumwa bwe yabaye muri Ireland nk’umumisiyoneri no mu Buhinde. Ababikira yashinze bagiye bakwizwa ku Isi aho bajyaga mu bikorwa by’urukundo, ku buryo ubu abasaga 3 500 bari mu bigo byita ku bababaye bisaga 610 biri mu bihugu 123 ku migabane itanu y’Isi.

Mu 1979 hagendewe ku bikorwa bitandukanye by’ubugiraneza yakoze yahawe igihembo cyitiriwe Nobel. Agihabwa yamaganiye kure abavanamo inda, agira ati “ Umwicanyi ukomeye w’amahoro uyu munsi ni icyaha cyo kuvanamo inda, umumalayika uba utegereje kuvuka.

Yaje gupfira mu bitaro by’i Calcutta mu 1997, tariki ya 5 Nzeri yishwe n’igifu. Tereza yashyizwe mu rwego rw’abahire na Papa Jean-Paul II, i Roma tariki ya 19 Ukwakira 2003.

Tereza mu maso y’ibihangange

Tereza yazengurutse Isi akangurira abayobozi b’ibihugu kurwanya ubukene, ku buryo Javier Perez wahoze ari Umunyamabanga mukuru wa Loni yise Tereza, Umugore w’Umunyambaraga ku Isi[ femme la plus puissante du monde].

Yahuye na Papa Francis mbere y’uko aba Papa mu 1994, mu rwenya yateye, avuga ko yumvise anyuzwe cyane, ariko ko yari kugira ubwoba budasanzwe iyo Tereza aba amukuriye mu muryango w’Abihayimana, kubera uko yafatwagwa ku Isi.

Tereza akimara kwitaba Imana yashyinguwe mu cyubahiro gikomeye mu mihango yateguwe na leta, ashyingurwa ahantu n’ubu hasurwa n’ibihumbi by’abantu.

Ubutagatifu ni urwego rubanzirizwa n’ubuhire, zishyirwamo uwo kiliziya yasanze yarabaye nta makemwa akiri ku Isi.


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 28 September 2016
Copyright © 2009 -2014 - IGIHE Ltd - All Rights Reserved