Nyamagabe: EAR Diyoseze ya Kigeme yahawe Musenyeri mushya wahize gufasha imfubyi n’abakene

Yanditswe na Prudence Kwizera
Kuya 14 Mutarama 2018 saa 07:17
Yasuwe :
2 0

Itorero ry’Abangilikani Diyoseze ya Kigeme ryahawe Musenyeri mushya Musabyima Assiel, wavuze ko mu byo azakora azashyira ingufu mu kwita ku bantu bose bababaye akabafasha guharanira kubaho neza mu buzima busanzwe no mu bwa roho.

Ni igikorwa cyabaye kuri uyu wa Gatandatu tariki ya 13 Mutarama 2017, gihurirana no kwizihiza isabukuru y’imyaka 25 EAR Diyoseze ya Kigeme imaze ibayeho.

Musabyima Assiel abaye Musenyeri wa gatatu uyoboye iyo Diyoseze nyuma ya Musenyeri Mvunabandi Augustin wayiyoboye asimbuye Musenyeri Kayumba Normal wabanje.

Amaze gutoranywa, kwimikwa no guhabwa inkoni y’ubushumba, Musenyeri Musabyima Assiel yavuze ko azashyira ingufu mu kwita ku bana b’imfubyi, abaturage bakennye, abababaye n’abakomeretse kugira ngo abayobore mu nzira nziza ituma babaho neza.

Yagize ati “Nzashyira ingufu mu kwita ku bana b’imfubyi bashyirwa mu mashuri kugira ngo bige bazabe abagabo, tuzita ku bababaye n’abakomeretse kandi tuzafasha abakene tubereka inzira yo gusohoka mu bukene kugira ngo bagire ubuzima bwiza n’amajyambere."

Iki gikorwa cyitabiriwe n’abayobozi mu nzego za Leta barimo Guverneri w’Intara y’Amajyepfo, Marie Rose Mureshyankwano; Umuyobozi Mukuru w’Urwego rw’Igihugu rw’Imiyoborere, Prof. Shyaka Anastase; inzego z’umutekano, Abasenateri n’abihayimana bo mu matorero atandukanye yo mu Rwanda no mu mahanga.

Guverineri w’Intara y’Amajyepfo, Marie Rose Mureshyankwano, yavuze ko amatorero n’amadini ari abafatanyabikorwa bakomeye ba Leta, by’umwihariko asaba EAR gukomeza gushyira imbaraga mu kurera abana b’u Rwanda, kurwanya amakimbirane yo mu miryango no gufasha abaturage kugira ubuzima bwiza n’iterambere.

Yagize ati "Icyo tubasaba ni uguharanira guteza imbere amahoro mu muryango, ukaba umuryango urangwa n’amahoro, murinda abana ibiyobyabwenge, hitabwa ku burere buboneye kugira ngo umuryango nyarwanda ukomeze kuba igicumbi cy’amahoro."

Musenyeri Mukuru wa EAR mu Rwanda, Onesphore Rwaje, niwe wayoboye umuhango wo kwimika Musenyeri mushya wa Diyoseze ya Kigeme amusaba kugera ikirenge mu cy’uwo asimbuye, amwizeza ko bazakomeza ubufatanye hagamijwe guteza imbere umuryango Nyarwanda.

Abakirisitu bo mu itorero EAR babwiye IGIHE ko kuribamo byabafashije byinshi mu iterambere n’imibereho myiza, nko kuba baba mu matsinda yo kwizigama no kugurizanya, korozanya amatungo n’ibindii bikorwa bakora by’amajyambere.

Bavuze ko mu myaka 25 iri torero rimaze ribayeho muri Diyoseze ya Kigeme hamaze gushingwa amatsinda yo kuzigama no kugurizanya akorerwamo n’ibindi bikorwa by’amajyambere agera ku 1200.

Musenyeri Mukuru wa EAR mu Rwanda, Onesphore Rwaje, niwe wayoboye umuhango wo kwimika Musenyeri mushya wa Diyoseze ya Kigeme
Musenyeri Rwaje mu kwimuka Musenyeri Musabyima Assiel wa Diyosezi ya Kigeme
Guverineri w’Intara y’Amajyepfo, Marie Rose Mureshyankwano (Hagati)
Abahayimana ba Kiliziya Gatolika nabo bitabiriye ibirori by'iyimikwa rya Musenyeri wa Diyoseya ya Kigeme muri EAR, Musabyima Assiel
Musenyeri wa Diyosezi ya Kigeme, Musabyima Assiel yimitswe

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza