Musenyeri Laurent Mbanda yatorewe kuyobora Itorero ry’Angilikani mu Rwanda

Yanditswe na Ferdinand Maniraguha
Kuya 17 Mutarama 2018 saa 01:39
Yasuwe :
1 0

Musenyeri Laurent Mbanda yatorewe kuyobora Itorero ry’Abangilikani mu Rwanda asimbuye Musenyeri Onesphore Rwaje wimitswe mu mwaka wa 2011.

Mbanda yatowe kuri uyu wa Gatatu n’Inama y’Abepiskopi ba Angilikani yateraniye i Kigali muri Katederali yitiriwe Mutagatifu Sitefano ( St Etienne).

Musenyeri Mbanda yatanze inkoni y’ubushumba bwo kuyobora EAR Diyosezi ya Shyira muri Werurwe umwaka ushize. Samuel Mugiraneza ni we wasimbuye Mbanda ku bushumba bw’iyo diyosezi.

Mbanda yavukiye mu Rwanda ku itariki ya 25 Ukwakira 1954. Yaje guhunga akiri muto ahungana n’ababyeyi be bajya mu gihugu cy’u Burundi ari ho yigiye amashuri abanza n’ayisumbuye.

Arubatse afite umugore n’abana batatu. Asimbuye Musenyeri Rwaje ugiye mu kiruhuko cy’izabukuru.

Mbanda w’imyaka 64 azwiho ibikorwa byo gufasha abana dore ko arera abagera kuri 30.

Umwaka ushize yabwiye IGIHE ko kuva yatorerwa kuyobora Diyosezi ya Shyira asimbuye Musenyeri John Rucyahana muri 2010, yafashije guteza imbere uburezi ku buryo hashinzwe ibigo by’amashuri y’abana b’incuke 217 muri iyo diyoseze yigamo abasaga ibihumbi 20.

Hashinzwe kandi ishuri ryigisha imyuga ryigamo abasaga 900, hubakwa hoteli imwe n’isoko rya kijyambere mu Mujyi wa Musanze.

Mbanda yafashije abana icumi barangije kubona buruse zo kwiga muri Leta Zunze ubumwe za Amerika aho yabaye igihe. Abapasiteri nabo bamuboneyeho umugisha babasha kwiga, harimo batandatu bize icyiciro cya gatatu cya Kaminuza (masters) n’icumi barangije icya Kabiri (Bachelors) ndetse n’abandi 250 bize amasomo atandukanye arimo n’ay’iyobokamana.

Musenyeri Mbanda yabaye umuyobozi mushya w'Itorero ry'Abangilikani mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza