Musenyeri Kayinamura yanyomoje inkuru y’amacakubiri muri Methodiste Libre

Yanditswe na Kanamugire Emmanuel
Kuya 26 Ukwakira 2016 saa 04:04
Yasuwe :
0 0

Umushumba w’ Itorero Methodiste Libre mu Rwanda, avuga ko nta macakubiri ashingiye ku moko n’Uturere ari mu Itorero ayoboye, ahubwo bashyize imbere iterambere.

Mu minsi ishize nibwo hasakaye inkuru y’amacakubiri yavugwaga mu Itorero Methodiste Libre mu Karere ka Rusizi, mu kiswe conferance ya Kinyaga, aho bamwe mu bapasiteri bashinjwaga n’abakirisitu kubasaba kwitandukanya n’Abatutsi.

Musenyeri Kayinamura Samuel, Umwepisikopi n’Umuvugizi w’Itorero Methodiste Libre mu Rwanda, yagize icyo avuga kuri iyi nkuru yamamaye ari mu ruzinduko hanze y’u Rwanda.

Yagize ati “Nta macakubiri ari mu Itorero, nta yarimo, mu itorero harimo umutekano, iterambere rirahari nta kibazo gihari.”

Abavuga amacakubiri ni bo bayafite

Musenyeri Kayinamura yakomeje avuga ko abumvise ko mu Itorero ayoboye hari amacakubiri badakwiye kubifata nk’ukuri.

Ati “Icyo nabwira abumvise ayo makuru yose ndetse n’itangazamakuru ryabitangaje ni uko ibyavuzwe atari byo nta macakubiri dufite. Icyabaye ni uko twashatse ko korali zihura zikaririmbana n’izindi, abo bavuze ko hari amacakubiri ni abanze kuririmbana , ahubwo tubona ko udashaka gukorana n’abandi ari we ufite amacakubiri.”

Mu butumwa yifuje kugeza ku bayoboke b’Itorero Methodiste Libre mu Rwanda, Musenyeri Kayinamura yagize ati “Turahumuriza abakirisitu bacu n’abanyarwanda ko nta macakubiri dufite, Itorero rifatanyije n’Igihugu mu rugamba rw’Iterambere.”

Musenyeri Kayinamura (hagati), Umuyobozi wa Methodiste Libre mu Rwanda

Yagize n’icyo avuga kuri Pasiteri Habiyambere Celestin, uyobora Itorero ry’aba Methodiste Libre mu kiswe conferance ya Kinyaga, akaba ari n’umwe mu bashyirwaga mu majwi ko abiba amacakubiri.

Ati “Uriya ni umushumba ,yatorewe kuyobora conference kandi atorwa hafi 100%, ntitwamwimura hariya dushingiye ku bihuha, ikibazo kiri gukurikiranwa n’inzego z’umutekano.”

Musenyeri Kayinamura yanavuze ko kuba inzego zishinzwe umutekano ziri gukora iperereza kuri iki kibazo nta bintu byinshi yakivugaho, abantu bakwiye gutegereza ibizava mu iperereza.

Indi nkuru wasoma: Rusizi:Abapasiteri barakekwaho gukangurira abakirisitu kwikiza Abatutsi
[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza