Kwizezwa ibitangaza, amahame, kutagendana n’ibihe: Ibituma urubyiruko rutera umugongo Kiliziya Gatolika

Yanditswe na Cyprien Niyomwungeri
Kuya 22 Ugushyingo 2019 saa 02:14
Yasuwe :
0 0

Umushumba wa Diyosezi Gatolika ya Butare akaba na Perezida w’Inama y’Abepiskopi Gatolika mu Rwanda, Musenyeri Philippe Rukamba, aherutse gutangaza ko bakurikije imibare yabo yo mu 2018, abayoboke ba Kiliziya Gatolika ari 48% by’Abanyarwanda bose.

Icyo gihe yabwiye IGIHE ko ‘nubwo imibare ingana gutya abakirisitu Gatolika bagabanutse cyane cyane mu cyiciro cy’urubyiruko, aho abenshi bajya mu madini mashya’.

Mu ikusanyabitekerezo IGIHE yakoze binyuze kuri konti yayo ya Twitter, yabajije ibintu bituma urubyiruko rugaragazwa nk’abateye umugongo cyane Kiliziya Gatolika muri iki gihe.

Abatanze ibitekerezo bahuriye ku mpamvu zo kuba urubyiruko muri iyi minsi rukunda kwizezwa ibitangaza [kubona buruse, viza za Amerika n’ahandi, imodoka, abagore n’abagabo, akazi n’ibindi] bigatuma birukankira ku madini n’amatorero asa n’ayacuruza ibyo ‘bitangaza’.

Hari kandi abagaragaje ko Kiliziya nayo ifite uburyo bw’imikorere busa n’ubushaje kandi ibutsimbarayeho, ku buryo bigora urubyiruko kubihuza n’iterambere n’ikoranabuhanga ruhugiyemo cyane.

Uwitwa Joseph Collins yagize ati “Kiliziya Gatolika igira amahame akomereye urubyiruko cyane cyane abashaka guhabwa amasakaramentu; uzi gusaba gahunda yo gushyingirwa birakomeye! Niboroshye ibintu nk’ayandi madini, ituro ry’umwaka barigire icya cumi nk’ahandi urebeko tutiyongera.”

Kwizezwa ibitangaza

Ingingo yo kwizezwa ibitangaza ni imwe mu zahurijweho n’abantu benshi nk’impamvu nyamukuru ituma urubyiruko ruva muri Kiliziya kuko inyigisho zayo hatabamo kubwira umuntu ngo ‘Imana iguhaye V8, akazi keza, umugabo, umugore, umwana n’ibindi abantu benshi baba bashaka kumva’.

Uwitwa Prosper Tuyambaze yagize ati “Kiliziya Gatolika ntiyizeza urubyiruko ibyo rukeneye muri iyi minsi. Urubyiruko rurashaka abarubeshya ko ruzabona akazi keza, imodoka nziza, abagore, abagabo beza n’ibindi. Wirubwira iby’ingororano y’ijuru (naryo bashidikanyaho).”

Eng. Samuel H na we yagize ati “Urubyiruko rukururwa n’ibigezweho. Rero rubarize aho babahanurira ku hazaza harwo: Abagabo beza, ubutunzi bw’inzu nziza, imodoka, amashuri n’ibindi.”

Tuyizere Patrice we yagize ati “Ibyo byo gutakaza abayoboke ntibizayibuza gukomeza kwamamaza inkuru nziza ya Yezu Kristu; abo babeshya ibitangaza bitanashoboka bagahurura bakabaye bamenya uwo bemeye akaba ariwe bizera wenyine. Yezu yaravuze ngo abaziyitirira izina ryanjye bababeshya ntimuzemere.”

Lydie Mutesi yavuze ko ubu amadini yabaye menshi mbere hari amahitamo amwe ariko ubu urubyiruko rufite amahitamo menshi. Ikindi ngo ni uko inyigisho za Kiliziya zitabamo kwizeza abantu ibitangaza.

Ati “Bashaka kubwirwa ko ubonye umugabo cyangwa umugore, ko ubonye Viza, ko ubonye imodoka nziza n’ibindi.”

Muhire Rodrigue na we yagize ati “Niba utanyijeje ibitangaza sinkuyoboka, niba utandema agatima cyangwa ngo unyigishe ubanje kuntera ubwoba ubwo ntuzambona iwawe. Byakugora kandi kungumana niba utanyereka ko Isi irimbutse ngo nkunde nkome inyuma. Ngibyo ibyo Kiliziya itakoze uretse nifuza ko itazanabikora.”

Pie Ntwari yunzemo ati “Biroroshye, turi mu Isi igendera ku muvuduko ukabije. Abantu ntidukunda ibiri ku murongo, dukunda akavuyo kuko turi mu Isi y’akavuyo. Kiliziya Gatolika ni ya yindi imwe, ishingiye ku ntumwa kandi itajya iyo bijya. Ni yayindi ifite umurongo kandi amadini menshi agendera ku kavuyo Isi iyaha”.

Fiona Kamikazi Rutagengwa asanga kuba urubyiruko ruva cyane muri Kiliziya Gatolika ari uko ‘amadini avuka buri munsi, amwe mu bayobozi ba Kiliziya Gatolika bahemukiye u Rwanda, iterambere n’ikoranabuhanga bigabanya imyizerere y’abantu kandi imyigishirize ya Kiliziya Gatolika ikaba itizeza abantu ibitangaza kandi nibyo abantu bakunda kumva’.

Urubyiruko rukunda ibigezweho

Hari abasanga Kiliziya Gatolika igomba gutekereza uko yagendana n’ibihe, igahanga udushya dukurura abantu kugira ngo urubyiruko ruhuze ibihe rugezemo n’ibyo rusanga muri Kiliziya.

Uwitwa Ndayisaba Samuel yagize ati “Urubyiruko dukunda ibigezweho, dushaka gukira, ngo imihango ya Kiliziya Gatolika irashaje, isaba kwihangana. Uzasanga akenshi bagaruka barazengurutse amadini yose babona bageze mu zabukuru bakabona kugaruka, uzasanga abagarukiramana ari abasaza kuko basanze idini ritunganye ari rimwe.”

Ingabire Paul yakomeje agira ati “Imitangire y’inyigisho za Kiliziya ni kimwe mu bigomba kuvugururwa bikajyana n’igihe tugezemo kuko urubyiruko ruba rushaka kugendana n’ibishya. Ikindi ni uko abenshi mu rubyiruko bajya aho bizezwa ibitangaza kandi Kiliziya yo itajya ibikora.”

Uwitwa Martin yakomoje ku nyigisho za Kiliziya Gatolika avuga ko “Ibintu byabo ntibijya bihinduka, abashonje, abahaze, abari mu mahoro n’abari mu makuba bose basomerwa ivanjiri imwe. Bibereye mu mandazi kandi urubyiruko rwifitiye ibibazo byinshi.”

Iki gitekerezo cye ntigitandukanye cyane n’icya Murwanashyaka J. de Dieu wavuze ko ‘Bimwe mu bice bigize misa n’uburyo Igitambo cya Misa giturwamo, iyo mbyitegereje mbona ari ibya kera, biragoye ko umwana ubyirutse areba TV [Televiziyo] na YouTube yabasha imigenzo ya kiliziya. Usanga biri gakondo cyane’.

Abayoboke ba Kiliziya Gatolika mu Rwanda bangana na 48% by'Abanyarwanda bose

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza