Kwamamaza

Kuki Abahamya ba Yehova badaterwa amaraso, ntibatore, ntibajye muri Politiki n’igisirikare?

Yanditswe kuya 26-09-2016 saa 13:12' na Emma-Marie Umurerwa


Abahamya ba Yehova, bafite amahame n’imyemerere itandukanye cyane n’iyo mu yandi madini. Ntibatora, ntibaterwa amaraso, ntibajya muri politiki yemwe ntibajya no mu gisirikare ahubwo ngo bakora imirimo igisimbura.

Twifashishije urubuga rwabo ‘Jw.org’ twabakusanyirije inkuru igaragaramo ibisubizo bya bimwe mu bibazo abantu bibabaza ku myemerere ndetse n’imyifatire y’abahamya ba Yehova.

Bavuga impamvu batajya muri politiki bagira bati“Kuba Abahamya ba Yehova bativanga muri politiki babiterwa n’imyizerere yabo ishingiye kuri Bibiliya.

Ntiduharanira ko habaho impinduramatwara, ntidutora amashyaka ya politiki cyangwa abakandida bayo, ntitwiyamamariza imyanya y’ubutegetsi cyangwa ngo twifatanye mu kintu icyo ari cyo cyose kigamije guhirika ubutegetsi. Twemera ko impamvu Bibiliya itanga zo kutivanga muri politiki zifite ishingiro. »

Bakomeza abagira bati «Dukurikiza urugero rwa Yesu kuko na we yanze kuba umutegetsi (Yohana 6:15). Yigishije abigishwa be kutaba “ab’isi” kandi yasobanuye neza ko badakwiriye kwivanga mu bibazo bya politiki.Yohana 17:14, 16; 18:36; Mariko 12:13-17.

Kubera ko duhagarariye ubwo Bwami bw’Imana kandi tukaba dufite inshingano yo gutangaza ko bugiye kuza, twirinda kugira aho tubogamira mu bibazo bya politiki y’igihugu icyo ari cyo cyose, harimo n’icyo dutuyemo.2 Abakorinto 5:20; Abefeso 6:20. »

Kubera ko twirinda amacakubiri ashingiye kuri politiki, bituma twunga ubumwe tukaba umuryango mpuzamahanga w’abavandimwe (Abakolosayi 3:14; 1 Petero 2:17), kuko amadini yishora muri politiki atuma abayoboke bayo bacikamo ibice.1 Abakorinto 1:10.”

Abahamya ba Yehova bubaha abategetsi

Bagira bati “Nubwo tutivanga muri politiki, twubaha abategetsi b’igihugu dutuyemo. Ibyo bihuje n’itegeko Bibiliya itanga rigira riti “umuntu wese agandukire abategetsi bakuru” (Abaroma 13:1). Dukurikiza amategeko, twishyura imisoro kandi dukorana neza n’abategetsi mu ngamba bashyiraho bagamije guteza imbere imibereho myiza y’abaturage.

Aho kugira ngo twifatanye mu bikorwa byo guhirika ubutegetsi, dukurikiza inama yo muri Bibiliya idusaba ‘gusabira abami n’abandi bose bari mu nzego zo hejuru,’ cyane cyane mu gihe bagiye gufata imyanzuro irebana n’uburenganzira dufite bwo gusenga.1Timoteyo 2:1, 2.

Nanone twubaha uburenganzira abandi bafite bwo kwifatira imyanzuro mu bibazo bya politiki. Urugero, ntiduteza imidugararo mu matora cyangwa ngo tubangamire abayajyamo.”

Ese koko abahamya ntibaterwa amaraso ?

Basubiza bagira bati “Twe n’imiryango yacu duharanira icyatuma twivuza neza uko bishoboka kose. Iyo turwaye, twivuza ku baganga bafite ubuhanga bwo kutuvura cyangwa kutubaga bitabaye ngombwa ko badutera amaraso.

Twishimira cyane iterambere ryagezweho mu by’ubuvuzi. Mu by’ukuri, uburyo bwo kuvurwa hadakoreshejwe amaraso bukoreshwa mu kuvura abarwayi b’Abahamya, busigaye bukoreshwa no mu kuvura abantu bose.

Mu bihugu byinshi, umurwayi uwo ari we wese ashobora guhitamo kuvurwa hadakoreshejwe amaraso kugira ngo yirinde ingaruka ziterwa no guterwa amaraso, urugero nk’indwara zandurira mu maraso, iziterwa n’ubwivumbure bw’umubiri n’izindi ziterwa n’amakosa y’abaganga."

Kuki Abahamya ba Yehova batemera guterwa amaraso?

"Icyo ni ikibazo cyo mu rwego rw’idini, aho kuba ikibazo kirebana n’ubuvuzi. Isezerano rya Kera n’Isezerano rishya birimo amategeko yumvikana neza avuga ko tugomba kwirinda amaraso (Intangiriro 9:4; Abalewi 17:10; Gutegeka kwa Kabiri 12:23; Ibyakozwe 15:28, 29). Nanone, Imana ibona ko amaraso agereranya ubuzima bw’umuntu (Abalewi 17:14). Ku bw’ibyo, twirinda guterwa amaraso bidatewe gusa n’uko twifuza kumvira Imana, ahubwo nanone bitewe n’uko tuyubaha kuko ari yo dukesha ubuzima."

Kuramutsa ibendera, gutora no gukora imirimo isimbura iya gisirikare

"Abahamya ba Yehova bemera ko kunamira ibendera cyangwa kuriramutsa, incuro nyinshi bijyanirana n’indirimbo yubahiriza igihugu, ari igikorwa cyo gusenga kigaragaza ko agakiza katava ku Mana, ahubwo gaturuka ku gihugu cyangwa ku bayobozi bacyo (Yesaya 43:11; 1 Abakorinto 10:14; 1 Yohana 5:21). Umwe mu bayobozi nk’abo ni Umwami Nebukadinezari wategekaga Babuloni ya kera.

Kugira ngo uwo mwami wari ukomeye cyane yereke abaturage be icyubahiro cye n’uko yagiraga ishyaka ryinshi mu by’idini, yashinze igishushanyo kinini cyane kandi ategeka abaturage be ko nibumva amajwi y’ibikoresho by’umuzika, twagereranya n’indirimbo yubahiriza igihugu, bunamire icyo gishushanyo. Icyakora, Abaheburayo batatu, ari bo Saduraka, Meshaki na Abedenego, banze kunamira icyo gishushanyo nubwo bari bazi ko bari buhanishwe igihano cy’urupfu. Daniyeli, igice cya 3."

Nanone kandi, bubaha amabendera y’ibihugu kuko bazi ko ari ibirango by’ibyo bihugu kandi bemera ko za leta ziriho ari zo Bibiliya yita “abategetsi bakuru,” kandi ko abo bategetsi ari “umukozi w’Imana” (Abaroma 13:1-4).

Abahamya ba Yehova bafite amahame bagenderaho atandukanye n'ay'andi madini

Gutora abayobozi bo mu nzego za politiki

“Abakristo bubaha uburenganzira abandi bafite bwo gutora. Ntibashishikariza abantu kwanga gutora, kandi bumvira abayobozi batowe. Ariko kandi, ntaho babogamira mu bya politiki (Matayo 22:21; 1 Petero 3:16). Umukiristo yakora iki mu gihe mu gihugu atuyemo gutora ari itegeko cyangwa mu gihe umuntu utagiye ku biro by’itora arebwa nabi? Kwibuka ko byabaye ngombwa ko Saduraka, Meshaki na Abedenego bajya mu kibaya cya Dura, bishobora gutuma Umukristo uri mu mimerere nk’iyo afata umwanzuro wo kujya ku biro by’itora mu gihe yumva umutimanama we ubimwemerera. Icyakora, agomba kwitonda kugira ngo atagira uruhande abogamiraho.”

Abahamya ba Yehova ntibajya mu gisirikare, bakora imirimo isimbura iya gisirikare

“Mu bihugu bimwe na bimwe, Leta itegeka ko abantu badashaka kujya mu gisirikare bamara igihe runaka bakora indi mirimo isimbura iya gisirikare. Mu gihe tugiye gufata umwanzuro urebana n’icyo kibazo, tugomba gusenga, wenda tukanabiganiraho n’Umukristo mugenzi wacu ukuze mu buryo bw’umwuka, maze tukawufata dushingiye ku mutimanama wacu ndetse n’ibyo twamenye kuri icyo kibazo.Imigani 2:1-5; Abafilipi 4:5.

Ijambo ry’Imana ridutera inkunga yo ‘kugandukira ubutegetsi n’abatware no kubumvira, twiteguye gukora umurimo mwiza wose, tukaba abantu bashyira mu gaciro’ (Tito 3:1, 2).
Duhereye kuri ibyo, dushobora kwibaza ibibazo bikurikira: ’Ese gukora uyu murimo bampaye usimbura uwa gisirikare bizatuma ntatira ukutabogama kwa gikristo, cyangwa bitume ngira aho mpurira n’idini ry’ikinyoma” (Mika 4:3, 5; 2 Abakorinto 6:16, 17)?’

’Ese gukora uyu murimo bizatuma ntabasha gusohoza neza inshingano za gikristo, cyangwa se wenda binambuze burundu kuzisohoza” (Matayo 28:19, 20; Abefeso 6:4; Abaheburayo 10:24, 25)? “Ku rundi ruhande se, mu gihe nzaba nkora uyu murimo, gahunda y’akazi izatuma nshobora kwagura umurimo wanjye wa gikristo, wenda nshobore no gukora umurimo w’igihe cyose?’—Abaheburayo 6:11, 12.

Mu gihe Umukristo abitekerejeho neza maze akiyemeza gukora umurimo usimbura iya gisirikare aho gufungwa, Abakristo bagenzi be bagombye kubaha umwanzuro we (Abaroma 14:10). Mu gihe ariko yumva atakora uwo murimo, icyo gihe nabwo abandi baba bakwiriye kubaha uwo mwanzuro afashe.—1 Abakorinto 10:29; 2 Abakorinto."

Mu nkuru yacu itaha tuzabagezaho ibisubizo by’ibindi bibazo abantu bibaza ku Bahamya ba Yehova.

Abahamya ba Yehova bari kwigisha abashumba

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved