Kwamamaza

Kigali yungutse Kiliziya ya miliyoni 800 irimo ibisigazwa bya Karoli Lwanga

Yanditswe kuya 19-11-2016 saa 17:17' na Ntakirutimana Deus


Kiliziya Gatolika mu Rwanda yujuje inyubako yitiriwe Mutagatifu Karoli Lwanga ishobora kwifashishwa nk’ahakorerwa urugendo nyobokamana rwo kwiyambaza abahowe Imana rusanzwe rubera buri mwaka muri Uganda.

Iyo nyubako ya Paruwasi Gatolika ya Nyamirambo yahawe umugisha inatahwa ku mugaragaro ku wa Gatandatu tariki ya 19 Ugushyingo 2016.

Musenyeri Antoine Kambanda, Umushumba wa Diyoseze ya Kibungo wayoboye Misa yo guha umugisha iyo nyubako, yavuze ko iyi ngoro izafasha abashaka kwegera Imana no kwiyambaza abatagatifu.

By’umwihariko ngo iyi ngoro ni yo ifite ibisigazwa bya Mutagatifu Karoli Lwanga mu Rwanda, niyo mpamvu ngo abatabonye uko bagera ahashyinguye abo bahowe Imana (Abamaritiri) i Namugongo muri Uganda babonye ahabegereye.

Ati “Udashoboye kujya i Namugongo, hano ni kwa Karoli Lwanga dushobora gukorera urugendo nyobokamana. Tuzajya tuhaza kenshi kumwiyambaza, niho hambere hari ibisigazwa by’uwo mutagatifu mu Rwanda.”

Iyi Kiliziya ibitse ibisigazwa bya Mutagatifu Karoli Lwanga

Arikiyepisikopi wa Kigali, Musenyeri Thaddée Ntihinyurwa utari mu Rwanda kubera impamvu z’uburwayi, mu butumwa yoherereje abakirisitu yabashimiye icyo gikorwa cyiza bakoze mu butumwa basomewe na Musenyeri Jean Claude Muvandimwe igisonga cye.

Yavuze abakirisitu bari bafite igishyika cyo gusengera ahantu hatisanzuye birinda imvugo y’Abanyarwanda yo gusengera Imana ahadakwiye. Ati “Usengera Imana ku ishyiga ikagusiga ivu. Mwashatse kuyisengera aheza none mubigezeho.”

Yabasabye gukomeza kurangwa n’umutima utanga kandi wuzuye impuhwe. Yababwiye ko iyi kiliiziya biyujurije ari ituro batuye Imana bayishimira kuko yahuje ubwenge, umutima n’imbaraga kugira ngo batangire kubaka kugeza ho birinze kuzitatanya.

Umuyobozi w’Akarere ka Nyarugenge, Kayiisime Nzaramba , yavuze ko iyubakwa ry’iyo ngoro rigaragaza ishyirwa mu bikorwa ry’umuco mwihariko ukomoka ku isoko y’Abanyarwanda wo kwigira.

Yasabye andi madini akorera muri ako karere kwigira kuri abo bakirisitu nabo bakiyubakira aho gusengera kuko ngo bishoboka, kuko abishyize hamwe Imana ibasanga.

Amateka ya Kiliziya ya Paruwasi Nyamirambo

Paruwasi Gatorika ya Nyamirambo yitiriwe Mutagatifu Kalori Lwanga yatashye inyubako ifite ubushobozi bwo kwakira abantu bakubye inshuro zirenze eshatu z’abakirwaga n’iyubatswe mbere.

Iyi Kiliziya nshya ishobora kwakira abantu bagera ku 2300 bicaye neza batabyigana, yatangiye kubakwa muri 2011 yuzura itwaye asaga miliyoni 650 harimo izigera kuri 500 zatanzwe n’abakirisitu na 150 zatanzwe na Musenyeri Ntihinyurwa ubwo yashyiraga ibuye ry’ifatizo ahubatswe iyo nyubako tariki ya 26 Gicurasi 2012.

Inyubako ije gusimbura iyakiraga abantu 700 bayibyiganiragamo bigateza icyokere ndetse bamwe bagasengera hanze bahagaze. Yari yarubatswe mu 1969 mu gihe iyo Paruwasi ya Nyamirambo yari ifite abakirisitu 8600 ubu ikaba ifite abakabakaba ibihumbi 50.

Igitekerezo cyo kubaka iyi nyubako cyavutse mu 2004 iyo paruwasi itangiye kuyoborwa n’Abanyarwanda. Icyo gihe yayobowe na Padiri Padiri Gasana Emmauel akaba ari nawe mupadiri wa mbere w’Umunyarwanda wayiyoboye nyuma y’imyaka 40 yari ishinzwe iyoborwa n’abapadiri bera.

Iyi nyubako igizwe na Kiliziya n’amacumbi y’abapadiri n’abashyitsi. Hari kandi ibiro bizakorerwamo imirimo ya paruwasi, chapelle n’ibyumba bizakodeshwa ngo byinjirize paruwasi.

Kugira ngo iyo mirimo igere ku musozo birasaba miliyoni 250 zisigaye zizatangwa mu bwitange bw’abakirisitu.

Iyi kiliziya yitiriwe Mutagatifu Karoli Lwanga, Umusore w’umunya-Uganda waranzwe n’ukwemera akayobora bagenzi be kuu kudahakana Imana kugeza babijijijwe. Musenyeri Ntihinyurwa avuga ko byerekana ubukirisitu bujyana no kwigomwa.

Abakirisitu bari bitabiriye misa yo gutaha iyi kiliziya ari benshi
Abihayimana batandukanye bari bitabiriye iki gitambo cya misa
Imiterere ya Althar y'iyi kiliziya
Umuvunyi Mukuru, Aloysia Cyanzayire, ni umwe mu bakirisitu bari bitabiriye iki gitambo cya misa
Musenyeri Antoine Kambanda wayoboye iki gitambo cya misa kuko Musenyeri Ntihinyurwa afite ikibazo cy'uburwayi byatumye ajya kwivuza mu mahanga
Iyi Kiliziya nshya ishobora kwakira abantu bagera ku 2300 bicaye neza
Inyubako ije gusimbura iyakiraga abantu 700

Amafoto: Mahoro Luqman


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved