Ibyo wamenya kuri Musenyeri Gahima ugiye guhabwa inkoni y’ubushumba ya Diyosezi ya Gahini

Yanditswe na Hakizimana Jean Paul
Kuya 25 Gicurasi 2019 saa 08:58
Yasuwe :
0 0

Tariki ya 1 Kanama 2018 inama y’Abepisikopi ba Provensi y’Itorero Angilikani mu Rwanda, yatoye Munyeseri Dr Gahima Manasseh kuba Umwepisikopi w’Umusimbura wa Diyosezi y’Itorero Angilikani ya Gahini, aho agomba gusimbura Musenyeri Birindabagabo Alexis wari umaze hafi imyaka 22 ayiyobora.

Dr Gahima ni umwe mu bantu bafite uburambe cyane muri iyi Diyosezi kuko amaze imyaka 14 mu nzego z’ubuyobozi bwayo harimo 12 yamaze ari umunyamabanga bwayo, umwe awumara ari Musenyeri wungirije, undi awumaze ari Umwepisikopi w’Umusimbura.

Dr Gahima ni umugabo w’imyaka 49 kuko yavutse ku itariki 19 Ukuboza 1970 afite umugore umwe n’abana umunani. Kuva 1995 kugeza 1997 yabaye umuyobozi w’ikigo wungirije ushinzwe abanyeshuri bigaga mu Cyongereza ku ishuri ryisumbuye rya Lycée de Kigali.

Mu 1997 kugeza 2001 yabaye Burugumesitiri w’iyahoze ari Komini Karangazi naho mu 2004 kugeza 2005 aba Burugumesitiri w’iyahoze ari Komini Gabiro.

Ubwo ngo habagaho amavugurura mu nzego z’ubutegetsi bwa Leta, Dr Gahima yahise ajya gukora mu nzego z’ubuyobozi bw’itorero Angilikani kugera n’uyu munsi.

Afite impamyabumenyi y’ikirenga (PhD) mu bijyanye n’iyobokamana (Théologie) akaba yari umwepisikopi wungirije muri Diyoseze ya Gahini guhera ku wa 28 Gicurasi 2017.

Intego afite nyuma yo guhabwa inkoni y’ubushumba

Mu kiganiro yagiranye na IGIHE, Musenyeri Dr Gahima yavuze ko afite byinshi yifuza kugeza ku itorero birimo kwimakaza ubumwe n’ubwiyunge, kuvugurura inzego n’ibindi byinshi.

Ati “Gahunda ya mbere ni ugukomeza kuvuga ubutumwa bwiza. Mfite inzara n’inyota byo gukomeza kuvuga ubutumwa bwiza kuko ni nabyo nize mu iyobokamana, nshaka kubikora cyane cyane kurenza uko nabikoraga”.

“Icya kabiri, mfite gahunda yo kurwanya ubukene biciye mu nyigisho tuzajya twigisha zigamije guhindura imyumvire y’ubuzima busanzwe ndetse n’ubwa gikiristo, turifuza ko abakiristo bacu bakora cyane bakiteza imbere.”

Musenyeri Dr Gahima yakomeje avuga ko ikindi yifuza gukora ari ‘ugukomeza gushimangira inzira y’ubumwe n’ubwiyunge bikarenga ubwiyunge ahubwo bikaba ubuvandimwe’.

Ati “Ndashaka kuvugurura inzego z’ubuyobozi bw’itorero nkongeramo n’andi maraso mashya azafasha itorero ryacu.”

Musenyeri Bilindabagabo Alexis, ugiye gusigira inkoni y’ubushumba Musenyeri Gahima, aherutse kubwira IGIHE ko bimwe mu byo atashoboye gukora yifuza ko uzamusimbura yazakora.

Ari “Umushinga wo kubaka Kaminuza i Gahini ni umushinga ntashoboye gukora nifuza ko yazakora. Undi ni umushinga wo kubaka Ikigo cy’Ububyutse, kizahuriramo abo muri Afurika y’Iburasirazuba.”

Musenyeri Gahima akaba azahabwa inkoni y’ubushumba kuri iki Cyumweru mu muhango uzabera kuri Diyosezi ya Gahini.

Musenyeri Dr Gahima (ibumoso) ubwo yatorerwaga kuyobora Diyosezi ya Gahini

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza