Hagiye gusohoka Bibiliya y’Ikinyarwanda yagenewe urubyiruko gusa

Yanditswe na Ishimwe Israel
Kuya 29 Kanama 2016 saa 02:52
Yasuwe :
0 0

Umuryango wa Bibiliya mu Rwanda wafashe icyemezo cyo gusohora Bibiliya yihariye ku rubyiruko nyuma yo gusanga hari amagambo amwe n’amwe yo muri iki gitabo gitagatifu atumvikana ku bakiri bato.

Uyu muryango uvuga ko amagambo yo muri Bibiliya agera kuri 41% urubyiruko rw’iki gihe rusoma ntiruyasobanukirwe arimo Inzovu, Sitadiyo, Mikono….n’ayandi agomba gusimbuzwa ayo urubyiruko rwiyumvamo mu Bibiliya yarugenewe by’umwihariko.

Rev. Canon Emmanuel Kayijuka, Umunyamabanga Mukuru w’Umuryango wa Bibiliya mu Rwanda, yatangarije IGIHE ko hari amagambo yanditswe mu Bibiliya urubyiruko rwagaragaje ko rutumva icyo asobanuye.

Aha yatanze urugero rw’ahanditse sitadiyo ndetse na mikono ‘ibipimo by’uburebure’ nkuko bigaragara mu butumwa bwiza uko bwanditswe na Yohana 6:19, ahagira “ Bamaze kuvugama sitadiyo makumyabiri n’eshanu cyangwa mirongo itatu, babona Yesu agendesha amaguru hejuru y’inyanja, Ageze bugufi bw’ubwato baratinya.”

Mu gice cya 21:8 muri iki gitabo haranditswe ngo “Ariko abandi bigishwa baza mu bwato, bakurura urushundura rurimo ifi kuko batari kure y’inkombe, ahubwo hari nka mikono magana abiri.”

Rev. Canon Emmanuel yagize ati “Urubyiruko rwo mu maparuwasi atandukanye, urwiga mu mashuri makuru na za kaminuza rwaduhaye amagambo agera ku bihumbi bibiri rusoma ntiruyumve. Agera kuri 51% twasanze tutayahindura, hanyuma dusanga andi agera kuri 41% twareba amagambo yoroshye twayasimbuza. Hari aho usanga muri Bibiliya bakoresha ijambo inzovu (bisobanura ibihumbi 10) urubyiruko rushobora guhita rwumva inzovu yitwa Mutware yo muri Parike y’Akagera.”

Ese hazabaho na Bibiliya yagenewe abagore?

Mu gusubiza iki kibazo, Rev. Canon Emmanuel, yagize ati “Niba hari imvugo z’abagore gusa? Namwe mwadufasha mukababaza muti ibivugwa mukumva ari amahamba ni ibihe ngo tubigeze ku muryango wa Bibiliya ubisobanure mu magambo mwumva? N’ibindi byiciro baramutse batugejejeho amagambo batumva twabyigana ubushishozi tukareba ko ibyo bavuga aribyo tukayahindura.”

Izi mpinduka ntizishobora kuzatuma Bibiliya itakaza umwimerere wayo?

Umuyobozi ushinzwe itumanaho no kumenyekanisha ibikorwa by’Umuryango wa Bibiliya mu Rwanda, Pasiteri Gasare Michel avuga ko umwimerere wa Bibiliya ari ndakorwaho.

Ati “Inshingano ikomeye y’Umuryango wa Bibiliya mu Rwanda ni ukurinda ukuri k’umwimerere wa Bibiliya. N’ubwo dufite mu nshingano kujyanisha imyandikire y’ikinyarwanda n’igihe, hari abahanga mu myandikire no kumenya ikigomba guhindurwa, bahindura ijambo ku buryo ritavuguruza ukuri kwa Bibiliya.”

Akomeza avuga ko inshingano ikomeye y’Umuryango wa Bibiliya mu Rwanda, ari uko Bibiliya igera ku bakirisitu bose kandi mu rurimi bumva, ifite umwimerere nyakuri w’ijambo ry’Imana.

Mu Rwanda haboneka Bibiliya y’abana, Bibiliya y’urubyiruko (izashyirwa ku mugaragaro mu minsi ya vuba) Bibiliya Ntagatifu, Bibiliya Yera hamwe na Bibiliya ijambo ry’Imana ihuriweho n’Amatorero ya Gikirisitu hamwe na Kiliziya Gatulika.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244