Gushyingirana hagati y’amadini ya gikirisitu bikomeje kuba agatereranzamba

Yanditswe na Kanamugire Emmanuel
Kuya 13 Nzeri 2016 saa 12:35
Yasuwe : XX
0

Mu madini amwe n’amwe ya gikirisitu, ntibashyingirana. Ibi ngo biterwa n’amahame ngengamyitwarire ya buri dini aba atandukanye,dore ko bamwe badatinya no kwita abandi abapagani.

Kuba mu Rwanda hari amatorero n’amadini afata gushyingirana hagati yayo nk’umuziro bivuze ko niba umukobwa/umusore runaka yakundanye n’abo mu idini ritandukanye n’iryabo iyo bageze igihe cyo gusezerana mu rusengero bahura n’amananiza.

IGIHE yaganiriye n’ibyiciro bitandukanye birimo abangiwe gusezerana n’abagiye gusezeranira mu yandi madini bagacibwa mu matorero yabo.

“Nangiwe gusezerana n’umukobwa twakundanye, bambwira ko ari ikizira”

Umwe mu baganiriye na IGIHE, ni umugabo uvuga ko yakundanye n’umukobwa wo mu rindi dini ritandukanye n’iryo yasengeragamo.

Ati “Umukobwa na we yari akijijwe ariko tudasengera mu idini rimwe. Umushumba wanjye yarambwiye ngo uwo mukobwa ni ikizira ntibadusezeranya. Kubera ko nari umuririmbyi mu rusengero, bambwiye ko nindamuka ngiye gusezeranira aho umukunzi wanjye asengera bazanshyira inyuma y’itorero(bazanca) ndatinya. Byarangiye twishyingiye.”

Undi ati “Umugabo wanjye yari uwo mu rindi dini rya gikirisitu, yanga kuza mu ryanjye ngo abe ariho dusezeranira. Byabaye ngombwa ko dusezeranira mu idini rye bituma aho nasengeraga bangira igicibwa.”

Icyo abanyamadini babivugaho

Umuvugizi wungirije w’Itorero rya ADEPR, Bishop Tom Rwagasana yavuze ko batanga gushyingirana n’andi matorero.

Yagize ati « Ntitwanga gushyingirana n’andi matorero ya gikirisitu. Iyo abashaka gushyingirwa bafite ubuhamya bwiza nta kabuza turabashyingira. Iyo umukobwa cyangwa umusore bacu bashaka kujya gushyingirirwa mu rindi torero na bwo ntitubyanga, baragenda bagashyingirwa, babishaka bakazagaruka bagakomeza imirimo bakoraga mu Itorero nta kibazo. »

Musenyeri Birindabagabo Alexis, uyobora Diyoseze ya Gahini mu itorero Anglican, akaba n’umuyobozi w’Umuryango ‘Peace Plan’ uhuriwemo n’amadini n’amatorero atandukanye, yatangarije IGIHE ko abagifite imyumvire yo kwanga gusezeranya abo badahuje imyemerere bakwiye kwisubiraho.

Yagize ati «Abayobozi b’amadini n’amatorero duhurira mu miryango itandukanye ya gikirisitu. Sinakwanga ko umukirisitu nyoboye ajya gusezeranira mu rindi torero.Nta n’uwo nakwanga gusezeranya. Hari abajyaga bita abandi ibizira bakumva ko aribo bazajya mu ijuru bonyine bagaha abandi akato, ariko ubu ubona ko bigenda bigabanuka, bagenda basobanukirwa ko Yesu Kristo watubambiwe ari umwe. »

Akomeza avuga ko kubuza umuntu gusezeranira mu idini rya gikirisitu ahisemo ari ukumubuza uburenganzira bwe, ibi ngo abakibitsimbarayeho bakwiye kubireka.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza