Bishop Kayinamura yakuyeho urujijo ku bibwiraga ko Itorero Methodiste Libre rizemera ubutinganyi

Yanditswe na Emma-Marie Umurerwa
Kuya 28 Ugushyingo 2017 saa 02:58
Yasuwe :
0 0

Mu gihe amwe mu matorero ya Methodiste mu bihugu bitandukanye yatangaje ko ashyigikiye ugushyingirana kw’abafite ibitsina biteye kimwe n’abibaza aho iri torero mu Rwanda rihagaze, ubuyobozi bwaryo bwatangaje ko budatezegushyigikira iyi migirire.

Abayobozi b’amatorero y’Aba-methodiste Unie muri Nigeria, Côte d’Ivoire na Leta Zunze Ubumwe za Amerika baherutse gutangaza ku mugaragaro ko bashyigikiye ubutinganyi. Ibi byatumye bamwe mu bayoboke b’Itorero Methodiste Libre mu Rwanda batangira kubunza imitima bibwira ko ababayobora bashobora kugera ikirenge mu cy’aya matorero.

Umukirisitu mu Itorero Methodiste Libre i Gikondo, Nyiramariza Leonie, aganira na IGIHE yavuze ko afite impungenge ko ubutinganyi bushobora guhabwa intebe mu idini asengeramo. Yagize ati “Mu matorero y’Aba-Methodiste mu bindi bihugu twumva ko barangije kwemera ubutinganyi, dufite impungenge ko na hano mu Rwanda bizahagera.Ubu rwose twatangiye kubunza imitima.”

Gatari Epimaque wo mu Karere ka Rusizi na we ati “Niba abo muri Amerika baramaze kubyemeza, abo muri Nigeria n’ahandi bakabyemeza , ndabona amaherezo no mu Rwanda bizahagera, dutegereje icyo abayobozi bacu bazabivugaho.”

Umuyobozi w’itorero Methodiste Libre mu Rwanda, Bishop Kayinamura Samuel, avuga ko badateze kwemera ubutinganyi n’uwabushyigikira wese kandi ko amahame ngengamyitwarire y’iri torero na yo atabwemera.

Yagize ati “Abantu bakwiye gusobanukirwa ko Methodiste ziri ukwinshi, twebwe ni Methodiste Libre, ubundi haba Methodiste Unie, Methodiste Episcopal Church na Methodiste gusa. Ibyo rero by’Abanyamerika bamaze kwemeza ubutinganyi ntabwo ari aba Methodiste Libre (EML) .”

Bishop Kayinamura yakomeje avuga ko mu gitabo cy’imitegekere aba-methodiste bagenderaho harimo ko badashobora kwemera ubutinganyi. Ati “Twabiganiriyeho cyane (mu nama yahuje Abepisikopi ba Methodiste Libre ku isi), tuvuga ko twe (Methodiste Libre) duhagaze ku cyemezo cyacu cy’uko tudashobora kwemera ubutinganyi n’uwo ari we wese uzabijyamo twe tuzitandukanya na we.”

Umuyobozi w’itorero Methodiste Libre mu Rwanda, Bishop Kayinamura Samuel, avuga ko badateze kwemera ubutinganyi n’uwabushyigikira wese

[email protected]


Niba ushaka kuduha inkuru waduhamagara kuri 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza