Ubukwe bwe bwegereje, "kuva mu mva kwe" n’ibindi; Dady de Maximo yaganiriye birambuye na IGIHE

Yanditswe na Dean Irak
Kuya 6 Kamena 2013 saa 01:54
Yasuwe :
0 0

Umuhanzi w’imyambaro n’imideri, umwanditsi w’ibitabo, umunyamakuru akaba umukinnyi n’utunganya amafilimi, Dady de Maximo Mwicira Mitali, arateganya gushyingirwa mu kwezi kwa munani (Kanama) uyu mwaka.
Mwicira, w’imyaka 31, avuga ko ateganya gushyingiranwa n’umuzungukazi witwa Louisa, bamaze igihe bakundana.
Muri iki kiganiro yagiranye na IGIHE, uyu muhanzi w’umunyabungeni munyabugeni Dady de Maximo aragira icyo avuga ku iserukiramuco mpuzamahanga azitabira ahagarariye abahanzi b’imideli bo mu (...)

Umuhanzi w’imyambaro n’imideri, umwanditsi w’ibitabo, umunyamakuru akaba umukinnyi n’utunganya amafilimi, Dady de Maximo Mwicira Mitali, arateganya gushyingirwa mu kwezi kwa munani (Kanama) uyu mwaka.

Mwicira, w’imyaka 31, avuga ko ateganya gushyingiranwa n’umuzungukazi witwa Louisa, bamaze igihe bakundana.

Muri iki kiganiro yagiranye na IGIHE, uyu muhanzi w’umunyabungeni munyabugeni Dady de Maximo aragira icyo avuga ku iserukiramuco mpuzamahanga azitabira ahagarariye abahanzi b’imideli bo mu Rwanda rikazabera i Paris mu Bufaransa.

Mu kiganiro kirambuye yagiranye na IGIHE, Dady de Maximo yagize icyo avuga ku byo abantu bakunda kumuvugaho ko ngo ’yaba ari umwe mu baryamana bahuje ibitsina’. Abanyarwanda benshi bamagana abaryamana bahuje ibitsina ariko Dady de Maximo we si ko abibona. Agira ati “Ababana bahuje ibitsina ni abantu bakwiye kwakirwa mu muryango nyarwanda.”

Dady de Maximo avuga ko n’ubwo umutekano we awizeye agifite impungenge z’umutekano uva ku rurimi no gutukwa n’abantu.

Mu makuru ye mashya avuga ko asigaye yambika imyambaro y’akazi abakozi bo muri Hotel des Mille Collines ya hano i Kigali ndetse na Hotel Serena yo muri Kenya. Avuga kandi ko aheruka gutumirwa mu ngendo nyinshi mu guhabwa ibihembo no kumurikayo imideri.

Soma ikiganiro kirambuye Dady de Maximo yagiranye na IGIHE:

Umuhanzi w'imideli Dady de Maximo Mwicira Mitali

IGIHE: Muraho Dady!

Dady: Muraho!

IGIHE: Hari amakuru avuga ko waba ufite ubutumire mu iserukiramuco rizabera mu Bufaransa. Ubivugaho iki?

Dady: Ni byo koko ubutumire bwangezeho ndabufite.

IGIHE: Wakiriye ute gutumirwa mu iserukiramuco mpuzamahanga ry’imyambaro n’imideri rizabera i Paris mu Bufaransa?

Dady: Byaranshimishije cyane nyuma y’ibyumweru bitatu gusa ngarutse mu Rwanda.

Nagarutse numva ko ngomba kwigarurira agaciro nyuma yo guhohoterwa, nyuma yo kuba muri torture [ihohoterwa] igihe kirekire, nyuma y’ibitutsi byinshi cyane no gushinyagura kw’Abanyarwanda; numvise ko ngomba kubona agaciro kanjye mbere na mbere kuko ni ikintu nasengeye cyane mbere yo kugaruka […]

IGIHE: Ubutumwa wanditse kuri facebook wagaragaje ko ushobora guhura n’imbogamizi. Ni iki wasaba ababifitiye ubushobozi kugira ngo koko uzajye guhagararira u Rwanda?

Dady: Mbere na mbere ndashimira Leta y’u Rwanda kuko njya mu Buholandi no muri Estoniya, Layituniya na Lituwaniya byavuye muri Perezidansi; ni bo bamfashije ku matike n’ibindi. Na ho muri Minisiteri ni bo bamfashije gutunganya filimi yanjye nshya nka 90%. Nkaba numva n’ubundi nta kibazo aho nzakomanga [bazankingurira].

Si nanjye njyenyine kuko batumiye na Ambasaderi w’u Rwanda mu Bufaransa na Minisitiri w’umuco na siporo. Banifuza ko hagati ya Minisitiri w’umuco na siporo na Madamu Jeannette Kagame umwe yaba umushyitsi w’imena uhagarariye icyo cyumweru mpuzamahanga cy’imideri, kuko gifite intego yo gukemura amakimbirirane, gukoresha ubuhanzi mu gufasha abantu barwaye malaria no mu kurwanya SIDA. Bifuza ko umwe mu bayobozi b’u Rwanda yaba umuyobozi w’icyubahiro uzaba uhagarariye iryo serukiramuco nk’uko babinyandikiye mu ibaruwa bampaye […]

IGIHE: Ni iki uteganya kuzereka abashoramari baho ku Rwanda?

Dady: Ni umwanya wo kugira ngo nereke abanyamahanga ko dufite igihugu cyiza wakwerekaniramo ibikorwa byo kwamamaza hakoresheje ibikorwa birimo. Ni ahantu abantu bashobora gusura, ngakangurira ibihugu bindi n’amasosiyete kuza gukorera ibikorwa byabo mu Rwanda […]

Dady de Maximo avuga ko abantu benshi bagendera ku buryo agaragara n'uko yambara bakavuga ko aryamana n'abagabo bagenzi be
Aha Dady de Maximo yari ari kuririmbana n'umuhanzi Ceclile Kayirebwa

IGIHE: Ntacyo bizahungabanyaho ku iserukiramuco ry’imyambaro utegura hano mu Rwanda?

Dady: Oya, kuko Rwanda Fashion Festival izaba kuva ku itariki ya 23 kugeza kuya 30 Nzeri. Ubu turi mu myitozo dukora ku wa Gatanu gusa. Ahubwo ni uburyo bwo kugira ngo abazaza nzatumira mbabonereyo. Nk’itangazamakuru hariyo Elle Magazine, Amina Magazine na Black Magazine. Ndifuza ko hazaza ibitangazamakuru byaje umwaka ushize n’ibindi nka Canal+, France 2, Trace TV, BBC n’abandi. Bakaza bakareba ko dufite ibikorwa byiza. Ni ukurata isura y’u Rwanda mu bundi buryo.

IGIHE: Ese aho wari umaze umwaka wahabonye ute? Wasanze u Rwanda ruhagaze rute nyuma y’igihe utahaba?

Dady: Maze umwaka n’igice ntaba mu Rwanda, ubuzima bwari bwiza nshobora gusubirayo mu kwezi kwa 11. Naje maze gusinyana amasezerano na Amnesty International n’Umuryango w’Ubwami w’Abaholandi n’Umuryango Hot Fabrique w’u Busuwisi.

Nzajya no mu Busuwisi tariki 21 z’ukwezi kwa 9, aho nzaba ngiye gusohorera igihangano cyanjye cy’uyu mwaka mu myambarire. Gusa namaze umwaka ntakora kuko nagombaga kubanza kuvurwa. Nagiye mu itangazamakuru nanditse inkuru nyinshi zagiye zikundwa.

IGIHE: Wagiye uvuga ko wahohotewe, ese abaguhohoteye warabakurikiranye? Ubu bigeze he?

Dady: Numvise ikintu cya mbere na mbere ari ukwivuza cyane cyane ko si ubwa mbere mva mu mva, ndabishima Imana kuko byarabaye biraba birarangira ntabwo nigeze numva nakomeza kubitindaho cyane.

Gusa ikintu cyankomerekeje cyane ni ibivugwa nyuma yabyo, ibitutsi by’Abanyarwanda, gushinyagura. Ngaho umuntu yariteye! Yashakaga kujya mu Burayi! Nk’aho umuntu atirirwagayo, atabagayo; ibyo ni byo bintu byampungabanyije cyane.

[…] Biriya ni byo babonye gusa, hari byinshi bizwi n’abaganga gusa byabaye muri ririya joro byatumye mara n’igihe kirekire nivuza bikomeye cyane, atari na ngombwa kubwira Abanyarwanda. Ariko ntabwo numvise ngomba kubikurikirana, ntabwo ari akazi kanjye, akazi kanjye ni ukongera kubaho no gutera imbere [….]

IGIHE: Muri iki gihe wagarutse, wizeye umutekano wawe?

Amwe mu mafoto yafashwe ubwo havugwaga ko Dady de Maximo yahohotewe

Dady: U Rwanda ni igihugu gifite umutekano, ni igihugu kirinzwe. Umutekano wanjye ndawizeye nk’uko uw’Abanyarwanda muri rusange wizewe. […]

Gusa ikibazo mfite ni umutekano uva ku rurimi. Ibyo byo birimo birampungabanya cyane ntabwo nabihisha bimaze kugera aho bintera ibibazo by’uburwayi n’ejobundi byabaye ngombwa ko njyanwa kwa muganga banteruye. […] […]

IGIHE: Ubona biterwa n’iki kubona abantu batukana batyo?

Dady: Ni ubutindi […]

IGIHE: Bigenda birushaho kuvugwa ko mu Rwanda hari bamwe mu baryamana bahuje ibitsina. Wowe ubivugaho iki ku giti cyawe?

Dady: Ntabwo ari ikintu cyoroshye cyane cyane ko Abanyarwanda babyumva ku buryo butandukanye. Bashobora kuba bumva ko umuntu abyuka mu gitondo agahita aryamana na mugenzi we. Ni ibintu byinshi cyane byabaye ngombwa ko nsoma, ko mbyiga njya muri ONUSIDA ndabyiga.

Hari abavuka batyo, baremwe batyo, hari abandi biza bitewe n’uburyo bakuze n’ibyo babayemo, hari n’abandi babikora bitewe n’iraha.

Niba u Rwanda rwaramaze kwemera ko tubana n’abantu bahekuye abandi muri Jenoside, njye nahitamo kwicarana n’umuntu wakoranye n’undi imibonano, kurusha uko nakwicarana n’umuntu wafashe umuhoro akica abantu […]

Ababana bahuje ibitsina ni abantu bakwiye kwakirwa mu muryango nyarwanda. Leta y’u Rwanda ivuga ko nta tegeko ribahana, ariko nta n’itegeko ribarengera […] […][…]

IGIHE: Ese ko hari Abanyarwanda bavuga ko bidahuje n’umuco nyarwanda?

Dady: Ariko se hari icyo nibaza n’ubu kinshobera? Umuco nyarwanda, uwuhe? Dusobanukirwe, ni uwuhe muco? Ese umuco nyarwanda ni ishabure, ni umushanana se? Ni igiseke se? Oya oya oya!

None se umuco nyarwanda wemera habaho ibintu runaka tukabyakira? Mu Rwanda ko umuntu wishe undi agaruka ku Murenge tukamwakira tukabana? Ibyo se ni wo muco nyarwanda? […]

Ngo ntabwo tubyemera mu ndangagaciro nyarwanda? None se indangagaciro nyarwanda turemera ko umuntu aza agasenya inzu y’undi? […]

Indangagaciro ntabwo ziri mu guhamiriza, ziri muri kirazira. Ziri mu gusabirana, mu guhana mu guturana. Hari ibyavuye hanze tutagomba kwemera kuko ntabwo ari ibintu byacu, ariko twamaze kwemera ibirenzeho. Ni yo mpamvu rero tudakwiye gufata bimwe ngo tubigire akaga, kandi ibibi twaramaze kubyakira.

Turi muri sosiyete ihinduka; turi mu gihugu cyagize amateka mabi, tugomba kubishyira mu kayunguruzo tukayungurura buhoro buhoro nta kaga gahaye akandi akato.

IGIHE: Bijya bivugwa ko na we waba uri umwe mu bifuza kubana bahuje ibitsina, ubivugaho iki?

Dady: Nabisobanuye inshuro nyinshi cyane, bihora bigaruka, bigaruka inshuro nyinshi cyane Abanyarwanda ntabwo tujya twumva. Ndamutse mvuze ngo ‘njyewe nkunda abakobwa’, cyangwa nkavuga ngo ‘njyewe nkunda abahungu’ ni hahandi.

Ushobora kuba umuhomosexuel (umugabo uryamana na mugenzi we w’umugabo) cyangwa ukaba umu-bisexuel (uryamana n’uwo bahuje igitsina akanaryamana n’uwo batagihuje).

Ushobora no kurongora umugore ugakomeza kuryamana n’umuhungu mugenzi wawe. Hari n’abandi bakwepa bakajya kurongora kugira ngo abihishe kandi ari ko bari. Ni yo mpamvu kugusubiza nonaha nkakubwira ngo njyewe ntabwo ndiwe, nkunda abakobwa, nzarongora, ntibisobanura ko ntari homosexual nta n’ubwo bisobanura ko wenda ntigeze kuba we […]

Ukuri kwanjye rero bategereze, nta n’umugabo wivuga mu gitsina […] nibategereze isaha n’isaha akana ka mabukwe kazabisobanura.

Nshobora kurongora kugira ngo Abanyarwanda bampe amahoro ariko ntibazampa amahoro. […]

Dady de Maximo ari mu kazi ke ko kumurika imideli

IGIHE: Ubu uhagaze gute mu rukundo?

Dady: [Abivuga yihuta cyane asa n’ushaka kubicaho yigendera gusa] Hari umuzungukazi twakundanaga muri ino minsi mu kwa munani cyangwa mu kwa karindwi nshobora kumurongora. Sindabimenya neza nankundira ikibazo cy’aho ari n’aho ndi kirimo kumugora cyane. Ntawamenya! […]

IGIHE: Haba hari ikibazo tutakubajije wumva ari ngombwa wavugaho?

Dady: Abahanzi b’Abanyarwanda dusabwa byinshi cyane kandi duhabwa bike cyane. Turavunwa cyane […] Igihe kirageze ngo [twebwe abahanzi] bagabanye kudutuka […] ahubwo badushyiremo ingufu.

Dukunda igihugu cyacu ariko bagenzi bacu b’Abanyarwanda ni bo batadukunda, ni bo badushyashyariza.

Niba ntashobora kwambika imyenda y’akazi (impuzankano) Serena Hotel yo mu Rwanda, ariko Serena Hotel yo muri Kenya ikantumaho nkajya kubakorera imyambaro y’akazi nzajya gutura muri Kenya. [….]

Uhereye i bumoso ni Dady de Maximo, Medy n'intumwa Gitwaza

IGIHE: Urakoze Dady!

Dady: Namwe murakoze

Umva HANO ikiganiro cyose IGIHE twagiranye na Dady de Maximo:


Icyitonderwa:
  • Twoongere tubibutse ko nta gitekerezo gisesereza cyangwa gisebanya cyemerewe gutambuka kuri IGIHE!


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza