00:00:00 IGIHE NETWORK KN KINYARWANDA EN ENGLISH FR FRANCAIS

Sinatunguwe kuko sinari niteze ko Macron asaba imbabazi i Kigali-Mukamabano

Yanditswe na Karirima A. Ngarambe
Kuya 17 Kamena 2021 saa 12:40
Yasuwe :
0 0

Nyuma y’uruzinduko Perezida w’u Bufaransa, Emmanuel Macron, yagiriye mu Rwanda mu mpera za Gicurasi 2021 n’ubutumwa yahatangiye yemera uruhare rw’igihugu cye muri Jenoside yakorewe Abatutsi, abasesenguzi mu bya politiki mpuzamahanga bakomeje kugaragaza uko bakiriye iki gikorwa.

Perezida Macron yasuye u Rwanda ku wa 26-27 Gicurasi mu ruzinduko rufatwa nk’urw’amateka rwari rutegerejweho kumenya igikurikira ukuri kwari kwatangajwe muri Raporo Duclert, ku ruhare rw’u Bufaransa muri Jenoside yakorewe Abatutsi mu Rwanda.

Nubwo hari ababona ko yari akwiriye kongeraho gusaba imbabazi, ku rundi ruhande hari abasanga ibyo yakoze bifite agaciro gakomeye mu rugendo rwo kumenya ukuri n’amateka kuri Jenoside yakorewe Abatutsi.

IGIHE yagiranye ikiganiro cyihariye cy’ubusesenguzi na Mukamabano Madeleine, wahoze ari umunyamakuru wa RFI, wanakoreye ‘France Culture’, akanahabwa igihembo cya ‘Prix International Bayeux’ nk’umunyamakuru mu bihe by’intambara mu 2000.

IGIHE: Waba uri mu bavuga ko batanyuzwe n’uko Perezida Macron atasabye imbabazi mu buryo bweruye ?

Mukamabano : Oya rwose ntabwo natunguwe, nkeka ko igisubizo ngiye kuguha kigutungura, sinatunguwe kuko sinari ntegereje rwose ko Perezida Macron asaba imbabazi i Kigali, hari impamvu navuga zigera kuri eshatu zifitanye isano n’ibihe u Bufaransa burimo ubu.

Mu Bufaransa baritegura amatora y’Umukuru w’Igihugu mu mezi icumi ari imbere, Perezida Macron bikaba bizwi ko azongera kwiyamamaza.

Mu Bufaransa ubu hari izamuka ry’abo bita muri politiki ‘Extrême droite’ bivuga amashyaka n’amashyirahamwe atavuga rumwe kenshi mu buryo usanga harimo irondamoko, irondakarere, kwanga abatari abenegihugu, impunzi n’abandi, biba binyuranye ni byo Inteko Ishinga Amategeko igenderaho. Aba rero ntibufuza ko Macron yakwemera ko igihugu cyabo gica bugufi bagasaba imbabazi. Hari kandi n’abandi benshi mu mashyaka ‘Extrême gauche’ atifuza ko bakora ku Bufaransa cyangwa bwasaba imbabazi.

Kuri Perezida w’u Bufaransa kujya gusaba imbabazi mu Mahanga muri Politiki yabo ni ubwiyahuzi, ni yo mpamvu ntari mbitegereje, Macron yakoze ibishoboka byose arabyirinda.

Ikindi navuga ni uko bigoye gusubiza amaso inyuma muri iriya myanya ngo ukuremo isomo, we yarabikoze ahereye ku mateka u Bufaransa bwagize nko muri Madagascar mu gihe cy’ubukoloni, mu gihe u Bufaransa bwakoranye n’aba-Nazi mu bwicanyi bwakorewe Abayahudi cyangwa uruhare u Bufaransa bwagize mu ntambara n’ubwicanyi no gucunaguzwa byakorewe muri Algérie, ibi bihe byose habayeho kwinangira kenshi mu kubisabira imbabazi.

Nk’uruhare rw’u Bufaransa muri Jenoside yakorewe Abayahudi byasabye imyaka 50 kugira ngo Perezida Chirac abisabire imbabazi. Rero iyo ubundi hasabwe imbabazi, abazisabye bahita bumva ko birangiye rwose nta nkurikizi yindi, kandi ubundi hagomba kubaho n’indishyi z’akababaro. Twavuga nk’u Budage bwemeye ko bwakoze Jenoside ariko biherekezwa n’indishyi z’akababaro.

U Bufaransa rero bwirinze ko buzasabwa indishyi z’akababaro cyane ko ari n’ibintu bica mu Nteko Inshinga Amategeko kugira ngo byemezwe. Ku bwanjye ibi n’iyo bica mu Nteko ntibyari kwemerwa rwose ndabarahiye.

Iyo Perezida Macron aza akavuga ati ‘nje gusaba imbabazi ariko Guverinoma y’u Bufaransa ntiyumvaga uburemere bw’ibyabaga, ntitwari tuzi ko bizavamo kuba jenoside, icyo gihe jye nari kubyakira nk’urushyi bankubise ubwanjye ndetse no ku barokotse Jenoside yakorewe Abatutsi. Ni izo impamvu eshatu zerekana ko ntari ntegereje ko Macron asaba imbabazi mu ruzinduko rwe i Kigali.

Wakiriye ute rero ijambo yavugiye mu Rwanda ?

Ibyo Perezida Macron yavugiye i Kigali birakomeye cyane, biranakomeye kuruta gusaba imbabazi. Jye icyari kinshinshikaje ni ukwemera uruhare u Bufaransa bwagize muri jenoside yakorewe Abatutsi mu Rwanda. Sinzibagirwa na rimwe iri jambo yavuze agira ati ‘Naje kwemera uruhare rwacu’ ati kandi ‘u Bufaransa bwari buzi bunirengagiza ibyakorwaga ntibwanagira icyo bubikoraho mu kubikumira no kubyamagana. Ahubwo u Bufaransa bwafashije Guverinoma yakoze jenoside mu buryo bwa politiki, ubwa gisirikare, dipolomasi kandi bari bazi ibyo barimo.’ Ibi rero Macron yavuze biruta kure kuri jye gusaba imbabazi.

Kandi hari na Raporo Duclert ivuga uruhare rukomeye rwa guverinoma y’u Bufaransa muri jenoside yakorewe Abatutsi, ibi bikavugwa n’umuperezida ukiri ku buyobozi mu Bufaransa. Birafungura inzira nyinshi ku bifuza gukomeza gukora kuri iyi dosiye mu bice bitandukanye haba ku mateka cyangwa gushinga imanza mu nkiko.

Wavuze ko mu ijambo rye harimo ibintu byinshi byo kugenderaho cyangwa kwifashisha mu buryo butandukanye, washakaga kuvuga iki ?

Ni byo nakomeje mvuga ko ntakunda ko bari gusaba imbabazi kuko byari gutuma amadosiye ashyingurwa burundu, ariko na we yarabyivugiye ati ‘ ntibirangiye, ubushakashatsi bugomba gukomeza gushaka ukuri kuri jenoside yakorewe Abatutsi, bagakora ubushakashatsi ku ruhare rw’u Bufaransa. Ati ndahamagarira impande zombi gukomeza gukora ubushakashatsi kuko byose ntibiragaragara.’

Urugero nk’ihanurwa ry’indege ya Habyarimana, ni Abafaransa bari imbere aho iyo mpanuka yabereye. Ni iki rero babivugaho, ni iki babonye, ni nde wayirashe, agasanduku k’umukara kaburiye he kugeza ubu? Ibyo ni ibintu bitaragara mu kuri.

Hari ububiko bwa Perezida Mitterrand, harimo iki? Hari Umujyanama wa Perezida Mitterrand wiyahuye akimara kumenya ko bahanuye indege ya Habyarimana, aho yavuze ati ‘ba batindi barabikoze’, ni ukuvuga ngo hari byinshi by’aya mateka bigomba kumenyekana.

Perzida Macron yanagarutse ku gufungura inzira y’ubucamanza, aha yavugaga ku bicanyi, abakoze jenoside bacyidegembya mu Bufaransa, ndizera ko ubwo Macron yabivugiraga i Kigali abari mu Bufaransa bireba bataryamye ngo basinzire iryo joro.

Ariko kandi ntibigomba guhagararira aho, iyo ufashe nka raporo Duclert yerekana uruhare rukomeye bw’u Bufaransa muri jenoside yakorewe Abatutsi hakiyongeraho n’ijambo rya Perezida Macron ryerekana ko bishoboka kujya mu nkiko.

Ndibaza nti ‘Ni iki cyabuza amashyirahamwe y’abacitse ku icumu rya jenoside yakorewe Abatutsi ndetse n’andi mashyirahamwe yigenga yo mu Bufaransa yakomerekejwe n’ibyo Leta ya Mitterrand yakoze kiriya gihe mu izina ryabo, ukareba nk’abanditse ibitabo birimo akababaro k’Abafaransa nka Patrick de Saint-Exupéry n’abandi barimo n’abanyamakuru bafatanya n’abacitse ku icumu rya jenoside yakorewe Abatutsi bagasaba ubutabera mu nkiko.

Si ubwa mbere byaba bibayeho mu mateka, nakwibutsa ko imanza nyinshi zafunguwe nyuma y’intmbara ya kabiri y’Isi yose zitashojwe na za Leta, duhereye ku rubanza rukuru rwa Nuremberg, ibi byose byagizwemo uruhare n’amashyirahamwe yigenga agizwe n’abarokotse jenoside yakorewe Abayahudi. Leta ntabwo ari zo zizabikora, buriya Raporo Decrert n’ijambo rya Macron i Kigali ryafunguye byinshi.

Perezida Sarkozy koko yaje mu Rwanda avuga ko ibyabaye u Bufaransa bwasaga n’ubwahumye amaso, Abaperezida uko bakurikiranye nyuma ya François Mitterrand uhereye kuri Chirac, Sarkozy na Hollande nta n’umwe muri bo wigeze afungura amadosiye ku ruhare rw’u Bufaransa muri Jenoside yakorewe Abatutsi mu Rwanda, urareba ugasanga ari ubutwari cyangwa kugira umutima w’ubumuntu kuri Perezida Macron ?

Ntabwo ndi buvuge ko Macron atari intwari cyangwa adafite umutima w’ubumuntu, ikibazo si aho kiri, Macron yagiye i Kigali mu Rwanda nk’umunyapolitiki kandi nk’Umukuru w’Igihugu. Nk’uko ubizi Leta nta nshuti, nta marangamutima zigira, byose ni mu nyungu. Ahubwo ni ukwibaza ngo ni izihe nyungu abonamo mu gihe hasigaye gusa amezi 10 ngo habe amatora mu Bufaransa? Hari rwose bagenzi be babimubujije bakinakomeza ariko Macron ni umuntu ukora icyo yiyemeje kandi agashirwa ari uko agishoje.

Kuri Macron umubano w’u Bufaransa guhera kuri Gén. Charles de Gaulle yarawukomeje mu bijyanye na Politike, ubukungu na dipolomasi. Afurika ni inyungu ikomeye ku Bufaransa si iby’uyu munsi gusa, uhereye ku bihugu bya Afurika bivuga Igifaransa n’ibindi, uyu munsi rero Macron yumvise neza ko agomba kwagura amarembo.

Kuva kera muri ibi bihugu bya Afurika u Bufaransa bwari buhafite ijambo mu bijyanye n’ubukungu none ntibikimeze bityo, haje Abashinwa, Abaturikiya, ibihugu byo muri Golfe n’ibindi.

Urugero hari inama ya France-Afrique Perezida Kagame yari arimo noneho Chirac afata icyemezo cyo gutera Irak yumva ko ibihugu byose bya Afurika biri bumukurikire, icyo gihe ni Perezida Kagame wavuze ko bidashoboka ko bo nk’Abakuru b’ibihugu bya Afurika babanza kubiganiraho badakurikira gutyo gusa ibyo u Bufaransa bubashyizemo. U Bufaransa ntibwabyumvise kuko bwari busanzwe buvuga icyo bushatse ku byemezo bya Afurika.

Iyo urebye Afurika uyu munsi mu bukungu yarahombye kubera n’ibitero by’abiyahuzi, aho ibigo by’Abafaransa bitakiri mu bya mbere mu gutera imbere nka mbere, ugasanga buratanga amafaranga menshi mu kubungabunga umutekano muri ibyo bihugu, aho umuntu yakwemeza ko bitameze neza.

Macron yabivuze imbere y’abanyamakuru, ati ‘ubu ndi gushaka abafatanyabikorwa nyabo u Rwanda rukaba ruhagaze neza urebye mu kuba umufatanyabikorwa kuko rwujuje ibyangombwa byose, nk’umutekano, kuba rugeze aho rugeze nyuma y’aho nta wakekaga ko ruzivanayo kuko jenoside yari yarushwanyaguje.

None ubu rukaba ari igihugu cyohereza ingabo zarwo kubungabunga umutekano mu bihugu bitandukanye bya Afurika kandi kikaba igihugu kidafite abiyahuzi, gihagaze neza mu bukungu uretse Covid-19.U Rwanda ni igihugu kivuga kiti ‘nimuze iwacu mushore imari, muzane ikoranabuhanga natwe tuzabicunga neza.’

Ibyo rero ni byo Macron bimukurura ashaka kurusha aho ajya agasanga bamusaba umuceri cyangwa abasirikare bo kubungabunga umutekano w’igihgugu cyabo n’ibindi. Kuri Macron asanga Kagame ari umufatanyabikorwa wizewe kandi wujuje ibyangombwa. Mu kujya i kigali kuri we yari azi neza inyungu bifitiye u Bufaransa.

Mukamabano Madeleine yasesenguye iby’uruzinduko rwa Macron mu Rwanda

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .