Uwiragiye yahembwe n’umwamikazi w’u Bwongereza ku bwo gufasha abafite ubumuga

Yanditswe na Uwishyaka Jean Louis
Kuya 22 Ukuboza 2016 saa 06:45
Yasuwe :
0 0

Kellya Uwiragiye w’imyaka 25, ni umwe mu rubyiruko 60 ruherutse kugenerwa igihembo n’Umwamikazi w’u Bwongereza, Elizabeth II, kubera ibikorwa by’indashyikirwa akora mu gufasha abantu, by’umwihariko abafite ubumuga bwo kutumva no kutavuga abinyujije mu muryango yashinze witwa ‘Media for Deaf Rwanda’.

Iki gihembo cyitwa ‘Queen’s Young Leaders Award’ , azashyikirizwa muri Kamena 2017. Gihabwa urubyiruko rufite hagati y’imyaka 18 na 29, rwakoze imishinga yo guhangana n’ibibazo byugarije Isi birimo; uburezi, ihindagurika ry’ibihe, uburinganire n’uburenganzira bw’abafite ubumuga, mu bihugu 54 byo mu muryango wa Commonwealth.

Mu kiganiro na IGIHE, Uwiragiye yavuze ko iki gihembo yahawe kubera ibikorwa bihindura ubuzima bw’abafite ubumuga bwo kutumva no kutavuga, kizamufasha kugera ku nzozi ze zibumbiye mu kubona abafite buriya bumuga batanga umusanzu mu iterambere nk’abandi.

Yagize ati “Iki gihembo kizatwongerera icyizere kuko abantu babonye ko ibikorwa byacu hari aho byavana sosiyete n’aho byayigeza. Kizatuma dukorana na bo kugira ngo abana batumva, batanavuga babone uburezi, rya hezwa rigihari kuri bo riveho bagire imyigire nk’abandi bana.”

Ubusanzwe umushinga Media for Deaf Rwanda, ufite ibikorwa byinshi birimo gukorana bya hafi n’abantu bafite ubumuga bwo kutumva no kutavuga cyane binyuze mu itangazamakuru, hakareberwa hamwe uko ryatuma bibona mu bikorwa by’iterambere.

Uburezi ku isonga

Uwiragiye avuga ko kuri ubu umushinga we uri kwibanda ku burezi bw’abana bato bafite ubumuga bwo kutumva no kutavuga, kugira ngo nabo babashe gukura bakoresha ururimi rw’amarenga bityo bumvikane n’abandi bantu mu byo bakora byose.

Agaruka ku mbogamizi zikigaragara mu burezi bw’abafite ubumuga bwo kutumva no kutavuga zirimo integanyanyigisho zidateguye mu buryo buzabafasha kubyaza umusaruro ibyo biga. Uwiragiye yemeza ko kiriya gihembo kizamufasha guhangana na zo.

Ati “Amashuri arahari ariko imyigire yabo nayo ntijyanye, turashaka gukora integanyanyigisho ishingiye ku mashusho ku buryo umwana ufite ubumuga bwo kutumva no kutavuga, azajya yigishwa mu marenga ibyo abwiwe akanabibona n’amaso.”

Uwiragiye akomeza avuga ko umushinga wabo uteganya guha amahugurwa urubyiruko rufite ubumuga bwo kutumva no kutavuga mu bijyanye no gukora amashusho. Ubu bumenyi ngo buzahindura ubuzima bwabo bagire uruhare mu iterambere ry’igihugu.

Inzozi ni zose kuri Uwiragiye

Nubwo hakiri imbogamizi z’amafaranga rimwe na rimwe zikoma mu nkokora ibitekerezo bya Uwiragiye n’abo bafatanya, ngo hari inzozi zo kuzabona abafite ubumuga bwo kutumva no kutavuga bari muri sosiyete bisangamo, biga kandi bagahabwa akazi mu nzego zose badakumiriwe n’ubumuga bafite.

Yagize ati “Mfite inzozi zo kubona nta mwana ufite ubumuga bwo kutumva no kutabona wasigaye inyuma kubera amashuri, kubona batanga umusanzu mu iterambere, kubona muri serivisi zose nko kwa muganga hari umuntu ubafasha, badahezwa mu bizamini by’akazi byo kuvuga ngo ni uko bakoresha amarenga.”

Media for Deaf si iya none

Uyu mushinga wakomotse ku gitabo Kellya Uwiragiye yanditse asoza icyiciro cya kabiri cya Kaminuza mu ishuri ry’itangazamakuru n’itumanaho mu mwaka wa 2014.

Yamenyekanye ku bukangurambaga bwiswe “Vuga izina ryawe mu rurimi rw’amarenga (Sign your name)" bwari bugamije kugaragariza Abanyarwanda ko n’abadafite ubwo bumuga bashobora gukoresha urwo rurimi rw’amarenga.

Mu 2015, Media for Deaf banahawe igihembo cyitwa “Celebrating Young Rwandan Achievers (CYRWA Award), nk’urubyiruko rw’indashyikirwa, bagihabwa na Madamu Jeannette Kagame binyuze mu muryango Imbuto Foundation na Minisiteri y’Urubyiruko n’Ikoranabuhanga.

Igihembo cy’umwamikazi w’u Bwongereza, kizatuma babona amahugurwa ku miyoborere mu gihe kingana n’umwaka, bazahabwa n’abafasha mu buzima bwa buri munsi (Mentors), banahuzwe n’urundi rubyiruko ruba rwaragize ibyo rugeraho rugahabwa icyo gihembo kugira ngo bahane ibitekerezo, banagirane ubufatanye.

Queen’s Young Leaders Award, ni igihembo cyanemerewe undi Munyarwanda, Yvette Ishimwe w’imyaka 19 ukomoka mu Karere ka Kayonza. Yatoranyijwe kubera ibikorwa yakoze mu kugabanya imvune z’abagore n’abana bakundaga kugira mu bijyanye no kubona amazi meza kandi afite isuku.

Uwiragiye Kellya (hagati) yahembwe nk'umwe mu rubyiruko rwakoze ibikorwa by'indashyikirwa
Uwiragiye yagenewe n'Umwamikazi Elizabeth II igihembo kubera ibikorwa bihindura imibereho y'abana bafite ubumuga yakoze
Afasha abana bafite ubumuga bwo kutumva no kutavuga abinyujije mu muryango Media for Deaf Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza