Impamvu idasanzwe yatumye Umunyakenya yita umuhungu we ‘Kagame’

Yanditswe na Deus Ntakirutimana
Kuya 12 Ukuboza 2016 saa 10:16
Yasuwe :
0 0

Izina ‘Kagame’ rimaze kuba ikimenyabose mu mahanga kubera ibikorwa by’indashyikirwa Perezida Paul Kagame amaze kugeza ku Banyarwanda, bishingiye ku miyoborere ye myiza n’icyerekezo cy’iterambere n’ubukungu yahaye igihugu.

Perezida Kagame bamwitirira ibikorwa runaka, birimo imihanda muri Malawi n’inyubako nka Hoteli iri muri Tanzania ndetse birengaho ababyeyi bibarutse abana bashima kubamwitirira kugira ngo bazatere ikirenge mu cye.

Urugero rusanzwe rumenyerewe mu Rwanda, ni urw’abana benshi bitwa ba Kagame, ariko igitangaje ni uko iri zina ryamaze no kugera mu bitabo by’irangamimerere byo mu gihugu nka Kenya, aho umubyeyi witwa Handa Caesar yise umwana we wa gatatu ufite imyaka itanu ‘Kagame’ Benji.

IGIHE yashatse kumenya byinshi ku cyatumye uwo mubyeyi yita umwana we iryo zina, ritamenyerewe muri Kenya maze igirana ikiganiro na Handa utuye mu Mujyi wa Nairobi ariko wigeze no kuba mu Rwanda.

Ati “Mu muco wacu twita amazina abana tugendeye ku bantu batunyura, bashobora kuba ari abo dufitanye isano, abantu b’icyitegererezo mu buzima, cyangwa abakunyura mu byo bakora.”

Yakomeje avuga ko kwita umuhungu we Kagame atari impanuka ahubwo yabitewe n’uburyo bw’imiyoborere ye idasanzwe. Ati “Nyurwa na Perezida Kagame, nyurwa n’uburyo ayobora u Rwanda, kandi agatuma rusagamba ituze n’umudendezo. Nyurwa na politiki ze n’uburyo yahesheje agaciro Abanyarwanda mu buryo buha amahirwe buri Munyarwanda wese yo gutera imbere. Ibi ni byo byiza bye byanyuze.”

Ku bijyanye n’uburyo abona Perezida Kagame mu ruhando rw’amahanga, yavuze ko kuri we atagereranywa, "aruta bose. Ntekereza ko mu bijyanye n’imiyoborere myiza, ari umuyobozi mwiza muri Afurika ndetse no ku Isi yose, niyo mpamvu mwita intwari yanjye nka Perezida.”

“Ndi Umunyakenya wo mu bwoko bw’aba Luo , nkuko nabivuze iyo ufite intwari; umuntu ukunyura by’ukuri, kandi ukaba ufite umwana w’umukobwa cyangwa w’umuhungu ntacyakubuza kumumwitirira. Kuva igihe umuhungu wanjye yavukaga kugeza n’ubu , ndacyemeza ko nyurwa cyane na Perezida Kagame, ku bw’ibyo yakoreye abaturage b’u Rwanda, ibyo akomeje gukora nka Perezida, kuri gahunda ze n’uburyo zikomeje guteza imbere u Rwanda.”

Handa yemeza ko imiyoborere ya Perezida Kagame yakwiye kubera benshi urugero.
Ati “Ku bwanjye, imiyoborere yo muri Afurika ni byo ikeneye. Umuyobozi agomba kuba intangarugero, ntabwo ari ushyiraho politiki runaka gusa, ahubwo ni uyobora neza abaturage be.”

Handa kandi yemeza ko ibyo avuga ari byo yahagazeho kuko yabaye mu Rwanda, akabona Perezida Kagame afatanya n’abaturage mu muganda, ku buryo ahamya adashidikanya ko akuirikije uko yamubonye mu bikorwa no mu mitekerereze bye, ashyira imbere iterambere ry’u Rwanda.

Isura ya Kigali imutera kwibaza byinshi

Muri rusange ngo iterambere ry’u Rwanda rigaragarira muri byinshi, ariko yibanze ku isura y’Umujyi wa Kigali, urangwa cyane n’inyubako ndende zubatswe mu kanya gato.

Ati “ Nitegereje uburyo yashyizeho icyerekezo gihamye, ushobora kugera i Kigali ugahita ubona uburyo iterambere ryivugira. Iyo ushaka kubigereranya na Nairobi, dufite umushinga witezweho guteza imbere imiturire muri Nairobi. Ni umushinga washowemo imari, ariko mu myaka itanu ishize duhora dusaba ko umujyi uvugururwa, inzu zishaje zigasenywa hakazamurwa izindi nshya. Dufite amafaranga(amikoro) ariko hashize iyo myaka tukibihanze amaso. Ari nko muri Kigali icyo cyemezo cyaba cyarashyizwe mu bikorwa n’ubuyobozi buhamye.”

“Mu mwaka umwe haba hamaze gukorwa impinduka zigaragara kubera ko ubuyobozi buba bwabyiyemeje. Icyo nicyo nita imiyoborere. Ibyo ni byo tuba dusobanura iyo tuvuga demokarasi, kuko ibintu nk’ibi ntibisobanutse mu cyerekezo cya Afurika.”

Ubushake bwa politiki buranga umukuru w’u Rwanda ngo byagombye guha isomo abandi bayobozi, Afurika ikagira abayobozi basobanukiwe n’icyo baturage babo bashaka, bakagena ibyemezo bihamye kandi bakabishyira mu bikorwa ku bw’inyungu z’abaturage babo atari iz’abantu ku giti cyabo.

Ubwo bushake ngo bwatumye anyurwa n’uburyo u Rwanda rwashyizeho politiki ihamye yo gukumira no kurwanya ruswa, ikaba yaragabanutse ku buryo bugaragarira buri wese, akababazwa n’uburyo yahawe (ruswa) icumbi iwabo.

Iherezo ry’umuhungu we…

Handa yifuza ko umuhungu we nawe yazavamo umuyobozi ukomeye ku rugero rw’uwo yamwitiriye. Ati “Nifuza ko umuhungu wanjye yazavamo umuyobozi ukomeye kandi ufite intego. Ndamwifuriza kumenya aho yavuye no kuba umwe mu bayobozi baharanira impinduka nziza z’imibereho myiza y’abaturage mu buzima bwabo. Ibyo ni byo nifuza kumubonaho.”

“Buri munsi yiyita Perezida. Iyo akomanze ku cyumba ndaramo nkabaza ngo ni nde ukomanze, arasubiza ngo ni Perezida. Ndifuza ko yazavamo umuntu ukomeye, ushyira mu gaciro, ufata ibyemezo bihamye, ariko bigamije guteza imbere rubanda, atari ku giti cye, biranyura. Ndashaka kubimubonamo.”

Asoza avuga ko ubutumwa bwe butagenewe umuntu runaka, ahubwo bugamije guha icyubahiro Perezida Kagame kuko anyurwa n’imiyoborere ye.

Kagame Benji avuka mu muryango w’abana bane aho we ari uwa gatatu. Handa avuga ko mu minsi mike RwandAir izamufasha kuza mu Rwanda kongera kwihera ijisho ibyo u Rwanda rwagezeho.

Handa afite umugore w’umubwirizabutumwa (Pastiteri), yigeze kuba mu ndorerezi z’Umuryango w’Ibihugu bivuga Icyongereza(Commonwealth) zakurikiranye amatora ya Perezida wa Repubulika mu Rwanda mu 2010, mu myaka yashize yakunze kuza mu Rwanda, ubu akora ibijyanye n’itumanaho muri Kenya.

Uyu mwana yiswe 'Kagame' kuko se anyurwa n'ibikorwa bya Perezida Kagame
Uyu mwana nawe ngo yatangiye kwiyita 'Perezida'
Kagame Benji na nyina umubyara
Handa yifuza ko umwana we yazatera ikirenge mu cy'uwo yamwitiriye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza