Ikiganiro cyihariye: Dr Biruta mu cyizere ko Kaminuza imwe izazamura ireme ry’uburezi

Yanditswe na Mathias Hitimana
Kuya 19 Ugushyingo 2013 saa 12:31
Yasuwe :
0 0

Benshi mu gihugu usanga bavuga ko ireme ry’uburezi mu Rwanda riri hasi. Bibaza niba kuba harashyizweho Kaminuza imwe icyo kibazo kizakemuka kandi ko idacunzwe neza ahubwo noneho byasubira irudubi. Minisitiri w’Uburezi, Dr Vincent Biruta, mu kiganiro kirambuye na IGIHE, yadutangarije ko we uko abibona atavuga ko ireme ry’uburezi riri ku ntera ishimishije, ikindi ni uko na none ritari hasi cyane.
Minisitiri Biruta yagaragaje byinshi ku bibazo binyuranye bikunze kwibazwaho, n’uburyo we abibona, (...)

Benshi mu gihugu usanga bavuga ko ireme ry’uburezi mu Rwanda riri hasi. Bibaza niba kuba harashyizweho Kaminuza imwe icyo kibazo kizakemuka kandi ko idacunzwe neza ahubwo noneho byasubira irudubi. Minisitiri w’Uburezi, Dr Vincent Biruta, mu kiganiro kirambuye na IGIHE, yadutangarije ko we uko abibona atavuga ko ireme ry’uburezi riri ku ntera ishimishije, ikindi ni uko na none ritari hasi cyane.

Minisitiri Biruta yagaragaje byinshi ku bibazo binyuranye bikunze kwibazwaho, n’uburyo we abibona, cyane ko avuga ko Kaminuza imwe ari kimwe mu bizakemura ikibazo cy’ireme ry’uburezi abantu bakunze kwibandaho cyane, kandi ko Kaminuza idakwiye kureberwa ku bayobozi b’abanyamahanga bashyizweho, ahubwo yareberwa ku ireme ry’uburezi izatanga.

IGIHE : Igitekerezo cyo gushyiraho Kaminuza imwe y’u Rwanda cyaje gite, cyaturutse kuki?

Minisitiri Dr Vincent Biruta: Igitekerezo cyo gushyiraho Kaminuza imwe y’u Rwanda cyaje bwa mbere mu mwiherero wahuje abayobozi bakuru b’igihugu mu mwaka wa 2011; aho hagiwe impaka ku birebana n’uburezi mu mashuri makuru, byemezwa ko kugira amashuri makuru mato kandi menshi afite ubushobozi buke atari byiza. Noneho hemezwa ko yahurizwa hamwe tugakora Kaminuza imwe, ariko ubwo bushobozi bugahurizwa hamwe bwaba ubw’abarimu, mu buryo bw’inyubako, ibikorwaremezo n’ibindi. Ubundi twari dufite Kaminuza indwi, twazihurije hamwe. Yose hamwe afite abanyeshuri batarenze 40,000.

Ahandi rero mu bindi bihugu, iyo ni Kaminuza iri mu rwego ruciriritse, kuko atari kaminuza wavuga ko ari nini cyane. Iyo urebye usanga uburyo ishuri rikuru rikora ukwaryo, rikishakira abarimu, rigakora porogaramu mu buryo bwigenga, ugasanga dufite porogaramu zigenda zisubirwamo kenshi, aho kugira ngo dushyire imbaraga muri imwe, ugasanga bireba zose. Twasanze rero kubihuriza hamwe ari byo bifite akamaro kuko ari uguhuza imbaraga. Ariko kandi sit we tubitekereje bwa mbere kuko hari ahandi byagiye bikorwa mu mahanga, ari na ho twakuye icyo gitekerezo, kandi birakorwa bikagira akamaro.

IGIHE: Ni iki Kaminuza imwe ije gukemura mu burezi ku banyeshuri bayigamo?

Biruta: Kaminuza imwe ishinzwe gushakira igihugu abakozi mu nzego zitandukanye, no gukora ubushakashatsi. Nta n’ubwo rero ari abakozi turebera igihugu gusa, tugomba no kureba uburyo abanyarwanda biga, bakagera ku rwego rushimishije, bakagira ubumenyi, bakagira ubumenyi ngiro, bagakora nubushakashatsi, bakagira uruhare mu iterambere ry’igihugu, mu iterambere ry’akarere ndetse no mu rwego mpuzamahanga; kuko ubushakashatsi bukorwa aho bwaba bukorewe hose, burya bushobora gutanga n’igisubizo ku rwego mpuzamahanga, bitagarukiye gusa ku gihugu.

IGIHE: Mwakomoje kuri gahunda yayo, ese izaba ari imwe cyangwa buri shuri rizagira iyaryo?

Biruta: Kaminuza uko yubatse ni kaminuza imwe. Izaba igizwa na Koleje esheshatu; hari iy’Ubumenyi n’ikoranabuhanga, iy’ubuvuzi, iy’indimi, umuco n’ubumenyi nyamuntu, iy’ubuhinzi n’ubuvuzi bw’amatungo, iy’uburezi n’iy’ubukungu n’ubucuruzi. Zizaba ari esheshatu mu gutangira, ariko bikumvikana ko bibaye ngombwa hashobora gushyirwaho n’indi Koleji. Munsi ya Koleji hari ibyo twise amashuri (Schools), munsi yayo hakaba udushami (Departments); mbese byubatse nka kaminuza zindi.

Minisitiri w’Uburezi, Dr Vincent Biruta

IGIHE: Kugira ngo mugene amashuri agize Kaminuza imwe n’ibyicaro byayo, hakurikijwe iki? Izakora ite?

Biruta: Nk’uko nabigusobanuriye, Kaminuza ifite porogaramu zitangwa muri ayo mashuri makuru. Bikaba byumvikana ko iyo tuvuze ibingibi, benshi batangira kurebera muri ya mashuri asanzweho, aho bavuga ngo aha n’aha hazaba hari ibi. Tuvuge bati “KIST hazaba hari ubumenyi n’ikoranabuhanga.” Ariko n’ubundi KIST uko yari imeze izaba igizwe n’igice kimwe kigizwe n’ubumenyi n’ikoranabuhanga, ariko hakaba hari n’ibindi byatangirwaga i Huye bizaba biri muri iyo Koleji, ndetse no mu Mutara ushobora gusanga biriyo bizaba bibarizwa muri iyo Koleji; nk’uko ubuhinzi n’ubuvuzi bw’amatungo hari ibyari i Busogo, hakaba bimwe byari i Huye, hakaba n’ibindi biri i Nyagatare.

Kubikora dutyo, ni ukugira ngo, kuko ntabwo ushobora guhuza imbaraga utabishingiye kuri Porogaramu, kugira ngo n’abarimu n’abashakashatsi bigishaga muri izo porogaramu babe bahurijwe hamwe; uri Nyagatare mu birebana n’ubuhinzi n’ubworozi abashe kuba yakwigisha n’abanyeshuri bari i Busogo, cyangwa se bari mu Rubirizi n’ahandi hose mu gihugu, biri muri Koleji imwe, porogaramu bigisha ari zimwe, hanyuma bikaba byumvikana ko agomba kwigisha hamwe cyangwa ahandi bitanyuze mu nzira ndende, cyangwa se bihenda igihugu. Icyo gihe bafatwa nk’abarimu bigisha hamwe, bakigisha hakurikijwe aho bakenewe. Bamaze guhurizwa hamwe, ni bwo abantu babona abandi baba bakenewe kugira ngo iyo Koleji yigishe neza uko bikwiye.

IGIHE: Ko hari ibyemezo byafatwaga bitewe n’amabwiriza buri shuri ryishyiriraho, ibyo bizavaho biharirwe Kaminuza y’u Rwanda cyangwa bizakomeza?

Biruta: Umurongo ngenderwaho muri Kaminuza y’u Rwanda uzaba ari umwe ni uko bimeze. Cyari ikibazo gikomeye aho hafatwaga ibyemezo bitandukanye bitewe n’ishuri. Bari babifitiye ububasha kuko buri Kaminuza yari ifite itegeko riyishyiraho, bari banabyemerewe ariko noneho ugasanga ibigenderwaho biratandukanye. Ubu ni kaminuza imwe, ibizagenderwaho ni bimwe. Kaminuza izaba yigenga twe nta ruhare tuzagira mu gufata ibyemezo.

IGIHE: Ni iyihe nyungu u Rwanda rufite kuri Kaminuza imwe mu gihe mu bindi bihugu usanga ari nyinshi cyane?

Biruta: Dushaka ko Kaminuza yacu iva ku rwego iriho ikajya ku rwego mpuzamahanga. Ni yo twanahisemo kuyiha abayobozi b’inararibonye basanzwe bazwi ku rwego mpuzamahanga.

IGIHE: Ni iki muvuga ku kuba Umuyobozi w’ikirenga ndetse n’Umuyobozi Mukuru ba Kaminuza y’u Rwanda ari abanyamahanga?

Biruta:Iyo ushaka ubumenyi ntabwo ubushakira aho utuye gusa, ubushakira n’ahandi bitewe n’icyo ugambiriye kugeraho. Mu gushaka bariya bayobozi, byakozwe mu buryo busesuye, dutanga amatangazo hirya no hino ku Isi tubona ababyifuza, dukurikije icyo dushaka kuri iriya kaminuza, ireme ry’uburezi n’urwego dushaka ko igeraho ikaba kaminuza izwi, byari ngombwa ko dushaka abantu bazwi ku rwego mpuzamahanga. Icyo tubarebamo si ubunyamahanga cyangwa ubunyarwanda, ni icyo tubatezeho nk’abantu bafite ubunararibonye mu burezi. Ni abantu bayoboye Kaminuza nini hirya no hino ku Isi, ni abantu tubona bashobora kuduha ibisubizo ku cyerekezo dufitiye Kaminuza y’u Rwanda.

Chancellor ni Umuyobozi w’icyubahiro, ni umuntu uvuganira Kaminuza, atanga inama, ayobora imihango itandukanye irimo gutanga impamyabushobozi n’ibindi. Uwo twashyizeho ni umuntu wayoboraga Kaminuza ya Oklahoma, dufitemo abanyaeshuri benshi b’Abanyarwanda, ni umuntu dusanzwe dukorana, asanzwe azi u Rwanda ndetse n’icyerekezo cyarwo, kuko asanzwe ari no munama njyanama y’umukuru w’igihugu. Tukaba tumukeneyeho rero ko ari umuntu uduhuza n’izindi kaminuza z’amahanga.

Vice Chancellor ni we uyobora Kaminuza ku buryo bwa buri munsi. We n’undi umwungirije ushinzwe amasomo n’imyigishirize ni abantu twahisemo dutanze amatangazo ahantu hatandukanye. Vice Chancellor afite ubwenegihugu bwo mu Bwongereza ndetse n’ubwo muri New Zealand. Akaba yarayoboye Kaminuza nka Adelaide-Australia, Massey- New Zealand, ndetse n’umwe mu bayobora ihuriro rya za kaminuza zo mu bihugu bikoresha ururimi rw’Icyongereza(Association of Commonwealth Universities), na International Association of University Presidents.

Umuyobozi w’unjirije ushinzwe amasomo n’ubushakashatsi afite ubwenegihugu bwa Afurika y’Epfo ariko akaba akomoka muri Tanzania. Yari ashinzwe ubushakashatsi muri Kaminuza ya Kwazulu Natal. Basabye ari abantu benshi cyane duhitamo 50, muri bo twatoranyijemo abo babiri twasanze tuzakorana na bo. Ni abanyamahanga ariko icyo twashingiyeho ni icyo tubatezemo. Twagombye guhindura imitekerereze. Iyo dutangaje ko hari Buruse zo kujya kwiga mu mahanga, tubona abantu ibihumbi n’ibihumbi bashaka kugenda. Aho hose bajya ni abanyamahanga basanga. Icyo nabizeza ni uko abo bayobozi tubona ari abantu bafite ubushobozi buzadufasha kugera ku cyerekezo dufitiye Kaminuza.

IGIHE: Ni iki Kaminuza imwe izahindura ku ireme ry’uburezi mu Rwanda bivugwa ko riri hasi?

Minisitiri Biruta: Ibi byose bikorwa ni ukugira ngo tugere ku burezi bufite ireme rikwiye. Ikindi ntimuzigere mwibwira ngo tugeze ku burezi bufite ireme biratunganye, tubivuze dutyo twaba dukoze amakosa. Ireme ry’uburezi kugira ngo rigerweho tugomba guhora dushakisha kurizamura iteka ryose. N’uyu munsi kuvuga ngo ntiririho ni ugukabya, kuvuga na none ngo ririho na byo byaba ari ugukabya. Aho tugomba guhora buri munsi dushaka ingamba zatuma iryo reme ry’uburezi rigomba guhora rizamuka.

IGIHE: Ahari Kaminuza Nkuru y’u Rwanda hashyizweyo ishuri ry’indimi, umuco n’ubumenyi nyamuntu kandi hari Laboratwari zikomeye ndetse hari n’izindi zigomba kuhubakwa. Ibyo bikorwa remezo ntibizahungabanywa?

Biruta: Ntimukitiranye Ubuyobozi bw’amashuri n’ibizahakorerwa. Ariya mashuri uko ari atandatu, aho umuyobozi azaba yicaye ibihasanzwe ntibizahinduka. Dufashe ahari Kaminuza Nkuru y’u Rwanda, ibihasanzwe nk’ubuvuzi, ubuhinzi, ubumenyi n’ikoranabuhanga bizagumayo. Nta munyeshuri uzahungabanywa, bazahaguma ariko uburyo bwakoreshwaga nk’ibikoresho abanyeshuri biga bimwe ariko bari ahandi bashobora kugena igihe bakajya kwigirayo, kugira ngo bakoreshe ibikoresho bo badafite nta zindi nzitizi zibayeho, isomo ryarangira bagasubira aho bigiraga. Ibikorwaremezo bihari bishobora noneho gusangwa n’abanyeshuri aho baba bigira hose. Mu gihe kizaza, kuko tugiye kujya mu gihe cy’inzibacyuho cy’imyaka ibiri, Kaminuza ishobora kugena uburyo bizakorwa neza, kuko abantu bashobora kwigira ahantu hatandukanye ariko babarizwa mu ishuri (College) rimwe.

IGIHE: Mu byemezo byafatwaga muri Kaminuza za Leta, hari aho bemereraga umunyeshuri watsinzwe isomo gukora ikindi kizamini, ndetse hari n’abatakoraga ibizamini bakazabisubiramo ariko ahandi ho birukanaga umunyeshuri watsinzwe. Ese gahunda yo gusubiramo ibizamini n’amasomo izakomeza?

Biruta: Kaminuza igira umurongo igenderaho mu gutanga ibizamini, kwimura, gusibiza no gusezerera abanyeshuri. Uburyo bwo kubaza no gusuzuma ubumenyi bushingira ku buryo bwo kwigisha. Ubu hari uburyo bushya aho umunyeshuri agira uruhare runini mu myigire ye, amanota 60% ajyana n’ibazwa rihoraho umunyeshuri ari mu ishuri, naho 40% asigaye bayakorera mu buryo bw’ibizamini. Iyo uvuga kubaza, gusubira mu isomo n’ibindi, byose bigomba gushingira kuri ubwo buryo. Sinjye uzabwira Kaminuza kubuza umunyeshuri gusubira mu isomo cyangwa se gusibiza, ari njye icyo nemera cyo ni uko umurongo tuzabaha atari ugamije koroshya ibintu, uzaba ugamije gukaza uburyo bwo gutanga no gusuzuma ubumenyi.

Mu rwego rwa Minisiteri y’Uburezi, abanyeshuri ntibagombye kumva ko tugiye koroshya ibintu, icyo twabakangurira ni ugushyiraho umwete bakiga, Minisiteri na Kaminuza icyo bashinzwe ni ugushaka abarimu bashoboye, ni ukubashakira ibikoresho bya ngombwa kugira ngo babashe kwiga mu buryo bukwiye. Icyo abanyeshuri bakwiye gutekereza si uko ibintu bigiye koroha, twe umurongo tuzatanga ni uko hakwiye gushyirwaho ireme ry’uburezi rijyanye n’icyerekezo dushaka cyo guha agaciro impamyabushobozi zihabwa abanyeshuri.

IGIHE: Mu kiganiro tugiranye hari icyo mwifuza kongeraho dushobora kuba tutababajijeho kandi mwumva ari ngombwa kugira icyo mukivugaho?

Biruta: Ubutumwa bwanjye nabutanze, icyo twabibutsa ni uko kuzamura ireme ry’uburezi bireba bose, abarimu n’abashakashatsi, abayobozi ba Kaminuza, abakozi bose ndetse n’abanyeshuri. Icyo tubasaba si uko bumva ko bahuje ibigo ibintu bigakomeza uko byari bisanzwe, bigomba guhinduka mu mikorere, mu myumvire bikajyana n’icyerekezo ndetse n’urwego dushaka kugeraho.

IGIHE: Murakoze cyane Nyakubahwa Minisitiri ku mwanya mwaduhaye wo kugirana namwe ikiganiro.

Minisitiri Dr Vincent Biruta: Murakoze namwe.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza