Abashyitsi batugana mu miryango yacu bakirwa bate?

Yanditswe na Pastor Desire Habyarimana
Kuya 3 Nzeri 2019 saa 01:30
Yasuwe :
0 0

Ntimukirengagize gucumbikira abashyitsi, kuko bamwe bacumbikiye abashyitsi, bacumbikiye abamarayika batabizi. (Abaheburayo 13:2)

Umushyitsi n’ijambo rimenyerewe na buri wese, ntekereza ko nta muntu utaraba umushyitsi ahantu ngo anezezwe n’uburyo yakiriwe neza cyangwa se ababazwe n’uko atitaweho uko bikwiriye.

Iyo umuntu yazindukiye ahantu aba afite amatsiko menshi y’ibyo ari bubone bishya atari amenyereye iwabo, uburyo ari bwakirwe, ibyo n’ibyo bituma afata icyemezo cyo kuzagaruka cyangwa ntazagaruke, mu mutwe asigarana isura y’abamwakiriye y’ukuri cyangwa itari iyo ukuri bitewe n’uburyo icyo gikorwa cyo kumwakira cyagenze.

Umushyitsi ashobora kuza ari umwe cyangwa itsinda ry’abantu benshi baje gusura umuntu umwe, umuryango, itorero, cyangwa igihugu uko baza kose kwakirwa neza ni ngombwa cyane.

Yesu mu nyigisho ze yakanguriye abantu kwakira abashyitsi igihe yohereza intumwa ze kwigisha yazibwiye ko aho bazinjira bakabakira bazabasabira amahoro n’umugisha kandi abo bazanga kubakira bazakunkumure umukungugu wo mu munsi y’ibirenge byabo bigendere. (Matayo 10:14)

Agiye gusubira mu ijuru yavuze ko kimwe mu byo abantu bazabazwa ari uko banze gucumbikira abashyitsi, kandi ahamya ko ababikora neza bazabigororerwa kuko ubikoze aba abikoreye Yesu. (Matayo 25:38). Ibi yavugaga yari abizi neza kuko mw’ivuka rye ababyeyi be babuze icumbi bituma Yesu avukira mu muvure w’inka.

Pawulo we avuga ko kugira ngo umuntu yemererwe kuba umushumba akwiriye kuba azi gucumbikira abashyitsi (1 Timoteyo 3:2-3). Yashimye abantu ku giti cyabo, imiryango n’amatorero bagira umwete wo kwakira abashyitsi, anacyaha abatabikora. (3 Yohana 1:5)

Uyu murimo mwiza ugira inyungu

Bibiliya ihamya neza ko Aburahamu yakiriye abashyitsi agasanga yakiriye Abamalayika atabizi, byatumye asohorezwa isezerano yari amaranye imyaka makumyabiri n’itanu abyara Isaka. (Itangiriro 18)

Uyu muco mwiza Abisirayeli bakomora ku mukurambere wabo Aburahamu utuma bakira abashyitsi basuye igihugu bagera kuri miliyoni eshatu buri kwezi baje gusura icyo gihugu mu buryo bw’ubukerarugendo. Ibi bikaba ari n’isezerano ry’Imana nkuko bigaragara muri Yesaya 60:11 ko amarembo ya Yerusalemu azahora akinguye ku manywa na n’ijoro, bakira abashyitsi.

Burya umushyitsi akenshi ntaza gutyo gusa aba afite ibyiza bifadika n’ibidafadika, aba azanywe n’urukundo, agusangiza ibyishimo, kandi hari n’ubwo aza yikoreye kumwakira neza bituma agena icyo agusangiza bitewe n’uburyo yakiriwe. Izarefati umupfakazi yakiriye Eliya bituma amara igihe nta nzara afite nubwo mu gihugu abantu bapfaga kubera inzara. (1 Abami 17)

Mu miryango imwe n’imwe bazinutswe kwakira abashyitsi ku bw’ibikomere bahuriyemo na byo. Ntabwo abashyitsi bose baba ari beza, hari ubwo wakira abantu bakakwiba, cyangwa bakagenda bagusebya, cyangwa se bakagira inyifato ituma umuryango utumvikana cyane cyane iyo ari abashyitsi bafite imyitwarire itari myiza.

Gerageza ukore iyo bwabaga wuzuze inshingano zawe uko kumucira bugufi bizamuha isomo ry’ubuzima. Iyo tutabigenje dutyo dutanga isura itari yo ku miryango yacu, amatorero ndetse n’igihugu.

Ibyiza mbere yo kwakira abashyitsi cyane cyane abaje mu muryango bikwiriye kuganirwaho n’abawugize kugira ngo mumenye niba hari ubushobozi buzatuma abaje bazakirwa neza, igihe bazamara, n’ibindi.

Ese niba tutabasha kwakira neza umuntu umwe aje atugana, tuzi, tuzakira neza abaje mu gihugu tutanazi? Muri Politike ya leta harimo kwakirana abantu na yombi, hari ibihugu bimwe na bimwe iyo ukinjira mu gihugu wakirwa n’abagusaba, Imana ishimwe ko uwo muco mubi ugenda ucika mu Rwanda, abandi iyo babonye umunyamahanga aje kubagurira bahita bazamurira ibiciro, abandi bagira imyitwarire iyobowe n’ibikomere batewe n’abanyamahanga bandi.

Hari bamwe bitewe n’imiryango bavukiyemo irimo ubukungu butifashe neza, cyangwa idakunda abantu, urukundo rwabo ruba rugerwa ku mashyi iyo babonye umushyitsi bahita bumva batari buhage, cyangwa ko aje kubateza ibibazo n’ibindi.

Hari umugani wa kinyarwanda uvuga ngo urugo rwiza ni urugendwa. Nubona iwawe hashize iminsi nta mushyitsi uhaza, uzafate akanya wisuzume uko wakira abantu. Abasenga ni byiza ko buri munsi ufata akanya ugasenga usaba Imana abashyitsi kandi b’ umugisha.

Past Desire Habyarimana avuga ko abashyitsi bakwiye kwakirwa neza kuko ari umugisha

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza