Imbamutima za Kibonke uherutse kurushinga bamwe bakagira ngo ni urwenya

Yanditswe na Uwiduhaye Theos
Kuya 5 Ugushyingo 2018 saa 12:37
Yasuwe :
0 0

Mugisha Emmanuel Clapton [Kibonke] umaze kumenyekana mu rwenya mu Rwanda, aherutse kurushinga, bamwe babonye amafoto ye azamuye ukuboko anafashe ku ibendera, bagira ngo ni ya mashyengo ye.

Ubukwe bwa Kibonke na Mutoni Jacky bamaranye imyaka itatu bakundana, bwabaye ku wa 18 Ukwakira mu murenge wa Niboye mu Karere ka Kicukiro.

Ibyavuzwe ku bukwe bwe byamusanze aho yari yicaye bakiri mu birori, cyane ko ubu Isi yabaye umudugudu kubera internet.

Mu kiganiro na IGIHE yagize ati “Nagiye kubona mbona nkicaye ahabereye ubukwe, inkuru yasohotse abandi bagira ngo ni ugusetsa koko. Binyibutsa igihe Papa na Mama bari gusezerana, natumira abantu ntibaze bagira ngo ni ugukina, nyuma mberetse amafoto bakajya bansaba imbabazi.”

Uyu mugabo izina rye rimaze gukomera ku bakunda urwenya no mu bandi bakunda filime nyarwanda ziri muri uwo mujyo. Ajya akora n’indirimbo zituma benshi bakubita udutwenge.

Hari abo yamaze kwigarurira ku mashusho yo gusetsa asakaza kuri Youtube n’abandi bafite amasaha ahora aregeye ngo badacikwa na filime y’uruhererekane ya Seburikoko agaragaramo nka Kibonke, ica kuri Televiziyo y’u Rwanda.

Ni umugabo w’urubavu ruto, iyo akubwiye ko afite imyaka 30 y’amavuko ugwa mu kantu kubera ko ku isura agaragara nk’ukiri muto, ugereranyije n’iyi avuga.

Avuka mu karere ka Gatsibo mu ntara y’Iburasirazuba. Yaje i Kigali mu 2009 nyuma y’umwaka umwe asoje amashuri yisumbuye.

Mu 2013 yinjiye mu byo gusetsa binyuze mu mashusho yifataga akoresheje telefoni yakuraga mu zo yacuruzaga, agira amahirwe yo gutoranywa mu gukina muri filime zitandukanye ndetse atangira guca mu kiganiro The Ramjaane show yanyuraga kuri Lemigo TV ikiriho.

Iyo uganira nawe biragoye ko wazinga umunya kuko akunda gutebya cyane kandi ntiwapfa kumubona adafite ikintu avuga.

Imyaka ni nk’inkorora, ntiyihishira …

Kibonke yavuze ko kurushinga ari igitekerezo yari amaranye imyaka isaga ine.

Ati “Gushinga urugo byambayemo kuva kera, buriya ushobora guhagarika ibintu byose bigakunda ariko ntiwahagarika imyaka, ntijya yihishira ni nk’inkorora, nkomeje kubihishira ejo mwavuga ko natinze gushaka.”

“Nyuma y’akazi umuntu aba ari umuntu, aba akeneye kwaguka no gushaka umufasha umwungura ibitekerezo mu byo yakoraga.”

Avuga ko igitekerezo yari akimaranye igihe gusa akaba yarabihishe kugira ngo bidasakara bikagira ibintu bimwe bituma akora mu buryo atateguye.

Yakoze ubukwe umukunzi we atwite

Ubusanzwe Kibonke ni umwemeramana mu itorero rya Healing Center riherereye i Remera.

Yavuze ko kuba yarateye inda Mutoni bagahita bakora ubukwe, ari icyaha yakoze imbere y’Imana ndetse yabisabiye imbabazi.

Ngo ateganya no gusezerana mu itorero nibamara kwibaruka. Gusa ngo gutera inda si byo byatumye ubukwe bushoboka.

Ati “None se abantu bose babyariye iwabo kuki abakunzi babo batabatwaye? Ni uko abo bakundanaga nta gahunda bari bafite, n’iyo wenda bitabaho nari kumushaka.”

Yemeza ko ari icyemezo yafashe nta muntu agishije inama, kuko ngo kuba umukunzi we yari kubyarira iwabo, byari kuba ikosa rikomeye.

Ati “Nshoboye kurera umwana wanjye kandi nanavuka azanasange ari kwa se!”

Yasabye imbabazi itorero

Kibonke avuga ko impamvu we n’umukunzi we batasezeranye imbere y’Imana ari uko bari barakoze icyaha, cyane ko ngo atari kubura uwo yishyura ngo amusezeranye.

Ati “Nashatse ko tuzaserana mu idini yacu nyuma yo kubabarirwa kuko twasabye Imana imbabazi, abantu bo ni bakeya bashobora kukubabarira ariko nyuma umugore wanjye namara kwibaruka tuzasezerana imbere y’Imana.”
Kibonke yakomeje avuga ko ubu batari inyuma y’itorero, ahubwo bari mu rugendo rwo kubabarirwa byuzuye.

Ati “Icyaha iyo cyakozwe usaba imbabazi, abantu benshi bakora ibyaha bitandukanye ariko ukirinda gukora ibindi byaha nko gukuramo inda, gutesha agaciro uwo wateye inda cyangwa se gutera inda undi mukobwa.”

Kuba umugabo byaramuhinduye

Kibonke ahamya ko yamaze kuganira n’umugore we ko bazibaruka abana bane kuko aribo bafitiye ubushobozi, ariko ngo bashobora no kurenga mu gihe Imana yaba imuhaye ubushobozi burenze ubwo afite uyu munsi.

Yakomeje avuga ko kurushinga, ikintu cya mbere byamuhinduyeho ari ukuba atagifata icyemezo hubuhubu, ahubwo abanza akabiganiraho n’umugore we, yakumva kinoze akagishyira mu bikorwa.

Ati “Icya mbere ni uko nta kintu nzongera gukora ntagitekerejeho, ubu ngubu ni ugukora ibintu bimfitiye akamaro.”

Mbere yo kurushinga kandi, Kibonke yari afite icyifuzo ko umunsi byabaye azakora igitaramo cy’urwenya, akanamurika album y’indirimbo zarwo.

Uwo mushinga ubu yarawunogeje, igitaramo kizaba ku wa 1 Ukuboza 2018 muri Kigali Serena Hotel.

Imihigo no yose nyuma yo kurushinga

Mu myaka itanu iri imbere Kibonke avuga yifuza kuzaba afite inzu itunganya ibintu byose akora bijyanye n’urwenya ndetse ubu yatangiye kuzamura abakiri bato biyumvamo gukina ‘comedy’.

Ati “Mu myaka itanu nifuza kuzaba mfite inzu itunganya ibikorwa byanjye, ibintu byose nkora biva muri studio yanjye. Nzaba mfite ikipe nini n’ibikoresho byinshi byamfasha kuba nakwikorera amashusho y’urwenya rwanjye, nshobora kuba nazenguruka igihugu nkora ibitaramo nibyo bintu numva nzakora.”

Avuga ko ubu yatangiye urugendo rwo kuzamura abanyarwenya bakiri bato binyuze muri ‘label’ yashinze yitwa Daymakers.

Imwe mu ndirimbo za Kibonke


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza