00:00:00 IGIHE NETWORK KN KINYARWANDA EN ENGLISH FR FRANCAIS

Umukino wakinishijwemo Malaika Uwamahoro ku gitabo cya Ilibagiza uri kwerekanwa kuri internet

Yanditswe na Uwiduhaye Theos
Kuya 22 Mata 2021 saa 01:46
Yasuwe :
0 0

Umukino ‘Miracle In Rwanda’ umaze kwerekanwa ahantu henshi ku Isi, wakozwe na Leslie Lewis Sword afatanyije na Edward Vilga ukomowe ku gitabo cya Ilibagiza Immaculée yise ‘Left To Tell Discovering God Amidst The Rwandan Holocaust’ kirimo ubuhamya bw’uko yarokotse Jenoside n’uko yatanze imbabazi, uri kwerekanwa ku rubuga rwa Prime Stage Theatre.

Uyu mukino wakozwe mu 2007 watangiye kwerekanwa kuri uru rubuga guhera ku wa 16 Mata kugeza ku wa 26 Mata 2021. Hifashishijwemo Umunyarwandakazi uba muri Leta Zunze Ubumwe za Amerika, Angel [Malaika] Uwamahoro, wamamaye cyane mu guhimba imivugo no gukina ikinamico na filime.

Amagambo avugamo n’ibimenyetso agaragaza biherekezwa n’indirimbo za Teta Diana zirimo ‘Birangwa’ ndetse na ‘Ndaje’.

Washyizwe kuri Prime Stage Theatre iri mu bawutunganyije mu rwego rwo gukomeza kwifatanya n’abanyarwanda mu bihe byo kwibuka ndetse no guha icyubahiro abazize Jenoside yakorewe abatutsi mu 1994. Uyu mukino umara amasaha abiri n’iminota 34 kuwureba ni $10.

Iki gitabo cyakomoweho umukino ‘Miracle In Rwanda’ Ilibagiza avugamo uburyo yarokotse Jenoside akihisha mu bwiherero bw’urugo rw’umupasiteri wari umuhutu bari baturanye aho yamaze iminsi 91.

Yabanaga n’abagore barindwi bagenzi be. Ntibagiraga icyo banywa n’icyo barya. Amanywa n’ijoro yabaga ari kuvuga ishapure asaba Imana ngo imurinde gucumuzwa n’amage yari arimo.

Avuye muri ubwo bwihisho yasanze abo mu muryango we bose barishwe keretse musaza we umwe wigaga mu mahanga. Ilibagiza yaje guhura amaso ku yandi n’uwishe nyina n’abavandimwe be aramubabarira.

Igitabo “Left To Tell” cyashyizwe mu ndimi 17 hagurishwa kopi zacyo zirenga miliyoni ebyiri.

Ilibagiza Immaculée yanditse ibindi bitabo nka “The Story Of Mary and Jesus in Kibeho: A Prophecy Fulfilled”, “The Station Of The Cross”, The Boy Who Met Jesus And Message For Humanity n’ibindi byinshi.

Ushaka kureba uyu mukino wakomowe ku gitabo cye wakanda hano: http://video.primestage.com/

Malaika azwi mu mivugo no muri filime zitandukanye
Malaika Uwamahoro agaragara muri uyu mukino
Uyu mukino wakozwe mu 2007 watangiye kwerekanwa kuri uru rubuga guhera ku wa 16 Mata kugeza ku wa 26 Mata 2021
Ilibagiza yanyuze mu nzira ikomeye muri Jenoside anabyandikamo igitabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .