Udushya muri filime yiswe ‘Sogokuru’ ivuga kuri Pasiteri Ezra Mpyisi

Yanditswe na Uwiduhaye Theos
Kuya 11 Ukuboza 2018 saa 07:54
Yasuwe :
0 0

Pasiteri Ezra Mpyisi wamamaye mu Itorero ry’Abadivantisiti b’umunsi wa Karindwi no mu bikorwa byiganjemo ibyerekeye amadini, yakorewe filime mbarankuru igaruka ku byaranze ubuzima bwe bwite n’ibindi bimwerekeyeho bizwi na bake.

Iyi filime yayobowe n’umwuzukuru w’uyu musaza witwa Kamikazi Mpyisi, imara isaha imwe n’iminota cumi n’itanu.

Kamikazi yayoboye ikorwa ry’izindi filime zitandukanye zirimo ‘Breath of Fresh Difference’ yanahawe igihembo cya filime nziza ngufi muri Rwanda film festival mu 2017, ‘Brothers In Art’, ‘Motherland’ ndetse na ‘Sogokuru’ agiye gushyira hanze.

Ubusanzwe avuka ku muhungu wa Pasiteri Ezra Mpyisi gusa akaba yarihebeye ibyo gukina filime.

Yabwiye IGIHE ko gukora iyi filime yise ‘Sogokuru’ byaturutse ku kuba hari abantu bamwe babonera Sekuru mu isura itari nziza bigatuma bamufata uko atari kandi ari umusaza w’umunyabwenge kandi uzi byinshi ku muco gakondo.

Ati “Igitekerezo cyo gukora iyi filime nise ‘Sogokuru’ kuri Pasiteri Ezra Mpyisi cyaturutse ku bintu byinshi ariko icy’ingenzi ni uko ari umuntu twabanye, nakuze ahari kandi yari umusaza wubashywe cyane mu muryango wacu.”

Yakomeje avuga ko atangiye gukura yabonye abantu benshi b’Abanyarwanda bamuvugaho ibintu bitandukanye bamwe bakemeza ko hari byinshi avuga bisekeje ‘nanjye nk’umuntu ukora filime ndavuga nti ndabona hari abantu bafite ibitekerezo byabo bitandukanye kuri uyu musaza ariko njye nzi byinshi kubarusha reka mbacire ku mayange’.

Yakomeje agira ati “Nakoze iyi filime nshaka kugaragaza mu by’ukuri uwo ariwe nshaka guhindura imyumvire y’abantu bamwe kuri we, abantu bakumva ko hari ibintu byinshi bahora bamuvugaho bitari byo.”

Kamikazi yanavuze ko atari ibyo gusa, ahubwo yashatse kumubyaza umusaruro akamukinisha muri filime nk’umwe mu bazi amateka menshi ku Rwanda n’umuco.

Ati “Kubera imyaka ye, ukuntu yabayeho n’uko akomeye kandi akaba azi ibintu byinshi ku muco n’amateka menshi y’u Rwanda nabonye ko ari inzira nziza yo kumukoresha nk’umuyoboro wo kubwira abantu ku mateka n’umuco by’u Rwanda. Ni we mukinnyi w’imena.”

Uretse abana n’abandi bo mu muryango wa Ezra Mpyisi bagiye bahabwa ibiganiro muri iyi filime bakabazwa ibibazo bitandukanye, harimo n’inshuti ze magara nke.

Filime ivuga ku buzima bwa Pasiteri Ezra Mpyisi igiye kujya hanze

Ku myaka isaga 96 aracyafite imbaraga utamukekera

Kamikazi yemeza ko n’ubwo Pasiteri Ezra Mpyisi ari umusaza w’imyaka ikabakaba ijana, agifite imbaraga nyinshi.

Ati “Njya kumubwira ko nshaka gukora filime ivuga ku buzima bwe yabyakiriye neza kuko azi ko nkunda ibintu bya filime, nawe yabikoze turi gufashanya nk’umuryango. Yaramfashije turi kwagura ijambo rye n’ibintu atekereza.”

Yakomeje ati “Ni umusaza ukomeye cyane afite imbaraga ahubwo njyewe nararuhaga kumurusha kandi njye ndi muto, ndi umwana kuri we.”

Kamikazi yavuze ko bari gufata amashusho y’iyi filime, Mpyisi yakundaga kubanguka cyane no kugira ubushake bwo gukora ibintu vuba.

Ati “Ni umusaza ushabutse cyane, tuvuge nk’aho twabaga dufite gahunda yo kujya ni we wanyibutsaga akambwira ngo tugende vuba na bwangu kandi ari njye wakagombye kumubwira gutyo.”

Hari byinshi abantu bazareba Sogokuru bazamenya kuri Mpyisi

Ati “Ntekereza ko ikintu kizaba ari agashya ari ukureba umusaza Ezra Mpyisi ari kumwe n’umuryango bari gutera ibiparu n’ibiganiro byihariye, hari ibijyanye n’umugogo w’umwami Kigeli.”

“Ariko cyane cyane arashabutse. Abantu bazatungurwa n’ukuntu ari umusaza ariko akaba atajya yibagirwa, ibintu byo mu myaka yo mu 1932 no mu 1956 arabyibuka neza nk’aho byabaye ejo bundi. Ni ibintu bizatungura abantu benshi ukuntu afite ubwenge bwibutsa bwo ku rwego rwo hejuru.”

Iyi filime ivuga ku buzima bwa Pasiteri Mpyisi amashusho yayo yafatiwe mu Rwanda mu bice bitandukanye birimo i Nyanza mu Majyepfo y’u Rwanda no mu Mujyi wa Kigali.

Mpyisi w’imyaka 96 yavutse mu 1922, yabonye impamyabumenyi y’icyiciro cya kabiri cya kaminuza mu 1964.

Kamikazi wakoze iyi filime afite imyaka 29, yavukiye mu Mujyi wa Nairobi, aba muri Tanzania we n’umuryango we bahavuye bahita bagaruka mu Rwanda. Ni umwana wa gatanu mu muryango.

Filime ivuga ku buzima bwa Mpyisi izerekanwa kuri uyu wa Gatandatu tariki 15 Ukuboza kuva 6:30 z’umugoroba mu isomero rusange riherereye ku Kacyiru. Kwinjira bizaba ari Ubuntu.

Reba agace gato ka ‘Sogokuru’

Kamikazi Mpyisi wakoze filime 'Sogokuru' ku buzima bwa Pasiteri Ezra Mpyisi
Pasiteri Ezra Mpyisi ni umwe mu basaza b'inararibonye ku mateka y'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza