Kwamamaza

Terry George wakoze ‘Hotel Rwanda’ yasohoye indi filime ishobora guteza impaka

Yanditswe kuya 13-09-2016 saa 11:06' na Rabbi Malo Umucunguzi


Filime nshya yakozwe ku bwicanyi bwakorewe Abanya-Armenia bishwe n’ubuyobozi bwa Ottoman mu Ntambara ya Mbere y’Isi, ishobora gukongeza umwuka mubi mu gihe ibihugu bitarumva kimwe aya mateka y’ubwicanyi bwaje kwemezwa nka Jenoside nyuma yo guhitana abasaga miliyoni 1.5.

Iyi Filime yitwa "The Promise", yayobowe n’Umwongereza Terry George wanayoboye filimi ya Hotel Rwanda[yaje kwamaganwa] ikaba yarerekanwe bwa mbere ku mugoroba wo kuwa 11 Nzeri i Toronto muri Canada, mu iserukiramuco mpuzamahanga rya Sinema.

"The Promise" igaragaramo ibyamamare nka Oscar Isaac (Michael) uba ari Umunya-Armenia w’umunyeshuri mu by’ubuganga hamwe na Christian Bale (Christopher) uba ari umunyamakuru wa Associated Press,Ibiro ntaramakuru by’Abanyamerika.

Itangirira mu 1914 aho Michael atuye mu cyaro muri Turikiya, akiyemeza gushyingiranwa n’umukobwa, ibiceri 400 bya zahabu by’inkwano agahita abyifashisha ajya Istanbul kwiga ibijyanye n’ubuvuzi. Niho ahurira na Christopher hamwe na Ana uba warakuriye mu Bufaransa ariko akaba afite umuryango w’abana yitaho, akaniyemeza kumucumbikira mu masomo ye.

Ubucuti bw’aba batatu bukomeza no mu minsi ikurikiraho, aho ubwami bwa Ottoman butangira guhiga Abanya-Armenia, umuryango wa Michael n’icyaro cyose bakicwa ariko we akazarokorwa n’ingabo z’Abafaransa zirwanira mu mazi.

Kamere y’ubu bwicanyi ntivugwaho rumwe

Jenoside yakorewe Abanyarumania, kugeza uyu munsi yemerwa na guverinoma n’Inteko zishinga amategeko z’ibihugu 28, birimo nka Brazil, Canada, u Bufaransa, u Budage, u Butaliyani n’u Burusiya,na leta 45 muri 50 zigize Leta Zunze Ubumwe za Amerika, ariko nka Turukiya yari iifite igice kinini cy’ubwami bwa Ottoman hamwe na Azerbaijan, byo ntibiyikozwa.

Muri uyu mwaka, Turukiya yaje guhamagaza Ambasaderi wayo mu Budage, nyuma y’uko Inteko Ishinga Amategeko y’iki gihugu yari imaze kwemeza ko ubu bwicanyi bwabaye mu 1915 ari ‘Jenoside yakorewe Abanya-Armenia.’

Turukiya yemera ko Abanya-Armenia benshi bishwe mu mirwano y’impande zihanganye kuva mu 1915, ariko igahakana ko abagera kuri milioni 1.5 bishwe ndese igahakana ko ibyabaye ari Jenoside, nubwo iyi nyito imaze kwemezwa n’abahanga benshi n’inneko zishinga amategeko zitandukanye.

Director Terry George na Charlotte Le Bon ugaragara muri 'The Promise'

Nk’uko Reuters yabitangaje, Terry George wayoboye ifi filimi yagize ati “Ni ikintu kimaze imyaka igera ku 100 […] biza gucecekeshwa, ariko ntekereza ko uyu ari umwanya mwiza wo kugerageza kumurikira Isi no kuvuga iyi nkuru ikomeye.”

Uyu mugabo w’imyaka 64 ukomoka muri Ireland, mu 2004 yakoze filimi "Hotel Rwanda" igaragaramo Umunyarwanda Paul Rusesabagina uyikina yitwa Don Cheadle, ayigaragaramo nk’intwari yarokoye Abatutsi bari bahungiye muri Hotel des Milles Collines.

Hotel Rwanda yabanje gufatwa nka filimi ibara inkuru mpamo inahabwa ibihembo bitandukanye, ariko nyuma bamwe mu bo Rusesabagina yavugaga ko yarokoye bari bahungiye muri Hotel des Milles Collines yayoboraga mu 1994, baza kwamagana ibyo yavuze kuko ngo yabakaga amafaranga ubwo yari abacumbikiye.

Iyi filime yamaganiwe kure kuko Rusesabagina yiyitirira ibikorwa byiza, agakinwa muri iyi filimi agamije kwishakira mu mahanga kuko ngo abo avuga ko yarokoye ahubwo yabacucuraga utwabo, nabo bakabyemera kugira ngo baramuke kabiri.

Christian Bale na Charlotte Le Bon bagaragara muri iyi filime
Oscar Isaac muri filime 'The Promise'

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 28 Nzeri 2016
Copyright © 2009 -2014 - IGIHE Ltd - All Rights Reserved