Stan Lee wagize uruhare mu ihangwa ry’intwari za sinema nka ‘Spiderman’ yitabye Imana

Yanditswe na Mukaneza M.Ange
Kuya 13 Ugushyingo 2018 saa 09:24
Yasuwe :
0 0

Stan Lee, umwanditsi n’umuyobozi wa film zirimo intwari zidasanzwe zamenyekanye ku Isi nka ‘Spiderman’, yitabye Imana ku wa Mbere afite imyaka 95.

Kirk Schneck wunganira umukobwa wa Lee mu mategeko niwe wahamije amakuru y’urupfu rw’uyu mugabo wafatwaga nk’intwari muri sinema.

Yaguye mu bitaro Cedar’s Sinai Medical Center mu Mujyi wa Los Angeles, nyuma yo kuvanwa iwe atwawe mu mbangukiragutabara. Impamvu y’urupfu rwe ntiramenyekana.

Lee ubusanzwe witwa Stanley Martin Lieber yatangiye gukora muri Marvel Comics icyo gihe yitwaga Timely Comics mu 1939, ari umwanditsi, aza kugirwa umwanditsi mukuru n’umuyobozi w’iyi nzu yahangiwemo izi ntwari.

Mu myaka ya 1950 ubwo yari umwanditsi mukuru, yababazwaga n’uburyo isoko ryari ryarigaruriwe na DC Comics yahanze intwari zirimo Superman, Batman, Wonder Woman na Green Lantern zigize itsinda rizwi nka ‘Justice League’.

Yaje gusabwa n’uwari umuyobozi we guhanga itsinda ry’intwari zishobora guhangana na ‘Justice League’, maze afatanyije n’abandi bahanga mu kwandika no gushushanya nka Jack Kirby na Steve Dikto uherutse kwitaba Imana havuka intwari zikundwa n’abato n’abakuru nka ‘Spiderman’.

Mu ntwari zahanzwe Lee abigizemo uruhare harimo Spiderman, Hulk, Doctor Strange, Fantastic Four, Daredevil, Black Panther, X-Men, Ant-Man, Iron Man, na Thor zihuriye mu itsinda ryitwa ‘Avengers’.

Izi ntwari zahanzwe hagati ya 1961-1964 zaje kwigarurira imitima ya benshi ndetse zihigika ‘Justice League’, ahanini bitewe n’uburyo mu kuzihanga bazihaye imico nk’iy’abantu ndetse zituye mu mijyi izwi nka New York, mu gihe abandi bari barahimbye umujyi utabaho uzwi nka ‘Gotham City’.

Mu 2006 yigeze kugira ati“ Sinari nzi ko Spiderman azaba icyitegererezo ku Isi hose. Icyo nifuzaga ni uko igitabo kigurisha, nanjye nkabasha kugumana akazi kanjye.”

Spiderman aba ari umwana w’umuhungu witwa ‘Peter Parker’ upfusha ababyeyi akaza kurerwa na nyina wabo. Nyuma yo kurumwa n’igitagangurirwa agira imbaraga zo kuguruka no kurwana yifashishije indodo zacyo, akundwa bitewe n’uburyo agira uruhare mu gucunga umutekano w’aho atuye.

Mu 2009 inzu ya Marvel Entertainement yaje kugurwa na Walt Disney Company itunganya film nyinshi kuri miliyari enye z’amadolari.

Agitangira ngo yumvaga atewe ipfunwe no kuba we yandika ibitabo birimo abantu bafite imbaraga zidasanzwe, mu gihe abandi bari kubaka ibiraro, bakiga ubuvuzi n’ibindi.

Ati “Nyuma naje kubona ko imyidagaduro ari kimwe mu bintu by’ingenzi mu buzima bw’abantu. Nta myidagaduro abantu bashobora kujya mu gahinda. Numva ko niba ufite ubushobozi bwo gutuma abantu bidagadura, uri gukora akazi k’ingenzi.”

Lee yitabye Imana nyuma y’uko umwaka umugore we Joan Lee bari bamaranye imyaka 69 nawe apfuye ku myaka 95.

Joan Lee nawe yafatanyije n’umugabo we mu guteza imbere inkuru za ‘Marvel Comics’, aho ijwi rye ryumvikanye muri film zishushanyije za ‘Fantastic Four’ na ‘Spiderman’.

Stan Lee hamwe n'ibishushanyo by'intwari zidasanzwe Spiderman na Hulk
The Rock ni umwe mu byamamare byababajwe n'urupfu rwa Lee
The Rock ni umwe mu byamamare byababajwe n'urupfu rwa Lee
Chris Evans uzwi nka 'Capitain America', yababajwe n'urupfu rwa Lee

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza