00:00:00 IGIHE NETWORK KN KINYARWANDA EN ENGLISH FR FRANCAIS

‘Spencer’, filime nshya ivuga ku buzima busharira Princess Diana yabayemo

Yanditswe na Uwiduhaye Theos
Kuya 10 Ukwakira 2021 saa 08:39
Yasuwe :
0 0

Nyuma y’imyaka 24 uwari umufasha w’Igikomangoma Charles cyo mu Bwongereza, ’Princess Diana’ yitabye Imana hagiye kujya hanze filime ivuga kuri bumwe mu buzima bwe bwa nyuma.

Ni filime yiswe ‘Spencer’ yakinwemo n’umukinnyi wa filime w’Umunyamerika Kristen Stewart w’imyaka 31 ariwe Princess Diana. Iheruka kwerekanwa muri The London Film Festival mu mpera z’iki Cyumweru. Yayobowe na Pablo Larraín mu gihe yanditswe na Steven Knight.

Iyi filime yerekanwe bwa mbere muri Venice Film Festival; Pablo Larraín wayiyoboye mu kiganiro yagiranye na Reuters ubwo filime yerekanwaga mu Bwongereza yavuze abifata nko kuyijyana mu rugo.

Ati “Ndishimye kuba twayizanye mu rugo. Twaje ku bw’uru rukundo. N’ubwo buri wese yayanze, bimeze nk’aho bizaba byiza kubera ko twakoresheje icyo aricyo cyose twari dufite kuri yo.’’

Kristen Stewart yavuze ko yashimishijwe n’icyizere cya Pablo Larraín wayoboye iyi filime. Ati “Hari aho twageraga akavuga ati ndatekereza ko ukeneye gukorana ibi nanjye.”

"Spencer" igaragaza ubuzima Princess Diana yabayemo yarahawe akato mu muryango w’ibwami. Yerekana kandi ubumwe bukomeye yari afitanye n’abahungu be Prince Harry na William.

Kristen Stewart akina muri iyi filime ari Princess Diana, Princess of Wales (wari ufite amazina yiswe akivuka ya Diana Frances Spencer). Muri iyi filime hagaragaramo uko Diana yafashe icyemezo cyo gutandukana na Prince Charles ( izi nshingano zikinwa na Jack Farthing) ndetse akareka umuryango w’Ibwami muri filime uba urimo Timothy Spall, Sean Harris na Sally Hawkins bakinamo.

Iyi filime igaragaramo bimwe na bimwe byabaye kuri Princess Diana mu minsi ye ya nyuma, ndetse n’ibindi bihimbwa hakurikijwe ibihe bibi yabayeho i Bwami.

Princess Diana wari waragizweho ingaruka zikomeye n’umugabo we wamucaga inyuma, mu kiganiro yagiranye na BBC ku wa 20 Ugushyingo 1995, yavuzemo zimwe mu mvugo zamenyekanye cyane ku Isi, nk’aho yagize ati “[Uru rukundo] tururimo turi batatu.”

Diana yanavuze ko afite ubwoba bw’uko hari abantu batamwifuriza ineza mu Ngoro y’u Bwongereza, ndetse anagaruka ku buzima bwaho butamunyuze cyane nk’uko yari abyiteze, dore ko yanashatse mu muryango w’abami akiri muto, kuko yari afite imyaka 20 gusa.

Nyuma y’iki kiganiro, ibintu byarushijeho gukomerera Diana, arushaho kwiheba kuko abenshi mu bagize Umuryango w’Ubwami bw’u Bwongereza banenze ikiganiro yatanze, bamwe bamushinja kubabeshyera abandi bavuga ko yakabije.

Byaje kurangira Diana atandukanye n’Igikomangoma Charles mu 1996, akomeza kubaho mu buzima bwigunze ariko agakundwa cyane n’itangazamakuru ndetse n’abaturage, ku buryo hari abafotozi bari bafite akazi ko kuneka aho ari hose bakamukurikira no mu ngendo zo mu mahanga, kuko ifoto ye yakoshaga akayabo muri ibyo bihe.

Diana yakomeje kubaho ubuzima bwa wenyine ahunga itangazamakuru, kugeza ubwo yinjiye mu rukundo na Dodi Fayed ndetse ku wa 31 Kanama 1997, aba bombi baguye mu mpanuka y’imodoka bari kumwe, ubwo barimo kwiruka bahunga abanyamakuru barimo kubafotora mu Mujyi wa Paris.

‘‘Spencer’’ ni filime izajya hanze ku wa 5 Ugushyingo 2021.

Princess Diana (hagati y'abahungu be Prince Harry [iburyo] na Prince William bakiri bato). Aba bana be baramukundaga cyane, na we akabakunda ndetse no muri iyi filime bizagaragaramo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .