00:00:00 IGIHE NETWORK KN KINYARWANDA EN ENGLISH FR FRANCAIS

Prince Harry yasabwe kwamagana filime ya Netflix ivuga kuri Princess Diana

Yanditswe na Uwiduhaye Theos
Kuya 8 Ugushyingo 2021 saa 02:05
Yasuwe :
0 0

Igikomangoma cy’u Bwongereza, Prince Harry, cyasabwe n’inzobere z’ibwami guhagarika amasezerano cyagiranye na Netflix y’imikoranire yanatumye bamuha miliyoni 112£; nyuma y’ibiri kuvugwa bizagaragara mu gice cya gatanu cya ‘The Crown’ bizaba birimo kwibasira umubyeyi we Princess Diana uzagaragarazwa uko atari ameze.

Ikinyamakuru Daily Mail cyandikirwa mu Bwongereza cyatangaje abasanzwe bakora ibwami mu Bwongereza bamaganye cyane iyi filime kuko yuzuyemo ibinyoma.

Muri abo harimo Angela Levin usanzwe wandika ‘biography’ zo muri uyu muryango . yavuze ko Prince Harry akwiriye guhaguruka akamaganira kure iyi filime ndetse akaba yanasesa amasezerano ye na Netflix.

Ati “Agomba gusesa amasezerano ye agahesha agaciro mama we. Ni iki cy’ingenzi? Ni amafaranga ? Cyangwa ni ugushyigikira nyina ? Byaba bitangaje atagize icyo avuga kuri ibi.”

Uretse uyu kandi Jemima Khan wari inshuti y’akadasohoka ya Princess Diana witabye Imana, yaretse inshingano yari yahawe zo gufasha umwanditsi w’iyi filime Peter Morgan kuyinononsora avuga ko irimo kubahuka Princess Diana.

Yabwiye The Sun ko uko yatekerezaga iyi filime izandikwa atari ko bimeze.

Ati “Byari iby’agaciro kuri njye kuba iminsi ya nyuma y’inshuti yanjye igaragazwa uko yari iri, kandi ntabwo byari byarigeze biba mu bihe byashize. Mu gihe uwo twagombaga gufatanya kwandika atabihaye icyubahiro nkanamenya ko inkuru itazabarwa Princess Dianna yubahwa, nahise mpagarika umusanzu wanjye wose ndetse nsaba ko nakurwa mu itsinda rizayikoraho.”

Khan yakoranye na Morgan kuva muri Nzeri umwaka ushize kugeza muri Gashyantare uyu mwaka, bakoraga inkuru zijyanye n’ubuzima bwa Princess Diana n’umubano we na Hasnat Khan usanzwe ari umuganga ubaga imitima na Dodi Fayed bapfanye mu mpanuka mu 1997 ndetse n’ikiganiro yagiranye n’Umunyamakuru wa BBC, Martin Bashir, cyateje impaka.

Igice gishya ari nacyo cya gatanu cya ‘The Crown’ kizajya hanze mu Ugushyingo umwaka utaha. Iyi filime izaba ivuga ku mubano wa Princess Diana n’abahungu be Prince Harry ndetse na Charles.

Bivugwa ko Princess Diana agaragazwa bitandukanye n’uko yari ari mu minsi ye ya nyuma. Elizabeth Debicki w’imyaka 31 niwe uzakina ari iki gikomangomakazi.

Umwaka ushize nibwo Prince Harry na Meghan Markle basinye amasezerano yo gukorana na Netflix ibiganiro bitandukanye, filime mbarankuru, ikiganiro bafite n’ibindi.

Diana na Dodi Fayed wari umukunzi we ku wa 31 Kanama 1997, bombi baguye mu mpanuka y’imodoka bari kumwe, ubwo barimo kwiruka bahunga abanyamakuru barimo kubafotora mu Mujyi wa Paris.

Princess Diana yapfuye azize impanuka
Prince Harry yasabwe kwamagana filime ya Netflix yubahuka Princess Diana
Khan Jemima yavuze ko yanze inshingano zo kugira uruhare mu kwandika igice cya gatanu cya 'The Crown' kubera uburyo Princess Diana agaragazwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .