Polisi yatangiye iperereza ryimbitse kuri Weinstein umaze gushinjwa n’abagore basaga 60 kubahohotera

Yanditswe na Herve Ugirumukunda
Kuya 4 Ugushyingo 2017 saa 09:09
Yasuwe :
0 0

Icyamamare mu gukora filime, Harvey Weinstein umaze iminsi aregwa n’abagore benshi bakina filime bavuga ko yabahohoteye mu myaka ishize; ashobora gufungwa kuko polisi yatangiye kumukoraho iperereza ryimbitse.

Umukinnyi wa filime Paz de la Huerta arega Weinstein ko yamusambanyije ku ngufu inshuro eshatu mu 2010 ariko hari n’ abandi bagore bamushinjaga ntibikurikiranwe kuko nta bimenyetso, ariko ubu noneho Polisi yamaze kwerura ko yatangiye kumukoraho iperereza.

Mu kiganiro n’itangazamakuru ku wa Gatanu, Umuyobozi w’abagenzacyaha muri Polisi ya New York, Robert Boyce, yavuze ko dosiye ya Paz de la Huerta, w’imyaka 33 yo ifite ishingiro kuko yashoboye ‘kwerekana neza buri kintu uko cyagenze, aho yari ari, n’aho yahohoterewe.’

Ibiro by’ubushinjacyaha mu Karere ka Manhattan nabyo byabwiye CNN ko byashyizeho umushinjacyaha uzobereye mu bijyanye n’ibyaha bishingiye ku gitsina uzakurikirana iby’icyo kirego.

De la Huerta yamenyekanye cyane muri filime nka ‘A Walk to Remember na Broadway Empire”, yavuze ko mu cyumweru gishize ari bwo yahamagaye polisi ayimenyesha ibyamfura mbi Weinstein yamukoreye.

Asobanura ko mu Ukwakira 2010, hashize imyaka 12 ahuye bwa mbere na Weinstein baje guhurira mu kabyiniro mu gace ka Tribeca aho bose bari batuye.

De la Huerta avuga ko Weinstein yamusabye ko amutahana mu modoka akamugeza iwe kuko bwari bwije, bagezeyo aramwinginga ngo basangire icyo kunywa, akaba ari bwo yamufashe ku ngufu bwa mbere.

Yagize ati “Yazamuye ikanzu yanjye afungura lisani arampohohotera.”

Ibyo byararangiye uyu mugore ngo yasigaye yaguye mu kantu, yahungabanye atiyumvisha ibyamubayeho, ati “ Yarangije ibyo yakoraga arambwira ngo azajya ampamagara.”

Nyuma y’amezi abiri, De la Huerta nabwo avuga ko Weinstein yamusanze iwe nijoro, akongera akamusambanya.

Yagize ati “Ubwa mbere sinamenye uko bigenze kuko byabaye vuba. Ubwa kabiri naramutinye, naramubwiye nti ‘Oya”.

Abagore basaga 60 bamaze kuvuga ko Harvey Weinstein yabasambanyije. Uretse i New York, uyu mugabo yatangiye gukorwaho iperereza na polisi zo muri London na Los Angeles.

Nubwo Harvey Weinstein ashinjwa n’abagore benshi, arabihakana akavuga ko abo yasambanye nabo bose bari babyemeye.

De la Huerta (ibumoso) ashinja Harvey Weinstein kumusambanya ku ngufu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza