00:00:00 IGIHE NETWORK KN KINYARWANDA EN ENGLISH FR FRANCAIS

Ibyishimo ni byose ku baganuye kuri ’Film Residency’ yujujwe i Rwamagana

Yanditswe na Nsengiyumva Emmy
Kuya 2 Ukwakira 2021 saa 11:58
Yasuwe :
0 0

Nyuma y’iminsi mike harangiye kubakwa Film Residency ya mbere mu Rwanda, itangiye kubyara umusaruro kuko nibura imirimo yo gutunganya filime enye ziri gukorerwamo igeze kure.

Ubuzima tubamo hano ku isi, buri rugendo rwose dukora ruhera ku gutera intambwe ibanziriza izindi.

Uku niko bimeze no mu ruganda rwa sinema mu Rwanda rutaramara igihe kirekire ariko aho rugana n’ibimaze gukorwa bikaba bishimishije.

Film Residency yafunguwe mu Murenge wa Kigabiro, Akarere ka Rwamagana mu Ntara y’Iburasirazuba. Yafunguwe na Joel Karekezi umaze gukomeza izina rye muri sinema y’u Rwanda, unakomeje kubaka izina rye mu ruhando mpuzamahanga cyane ko filime ze zose zikunze kugaragara zihanganye ku ruhando mpuzamahanga.

Muri filime z’uyu mugabo zubatse izina harimo; Imbabazi/The pardon ivuga kuri Jenoside yakorewe Abatutsi mu 1994, iyi ikaba yaregukanye ibihembo byinshi muri Afurika no hanze yayo.

Hari kandi filime ndende mbarankuru ‘’Rwanda: Les portraits du pardon’’ na yo ivuga ukuntu abarokotse Jenoside yakorewe Abatutsi bagiye batanga imbabazi ku babiciye, intego ari ubumwe n’ubwiyunge bw’Abanyarwanda, iyi na yo ikaba yarerekanywe inshuro nyinshi kuri Televiziyo mpuzamahanga y’Abafaransa Canal+.

Nyuma yo kwandika filime zavuzwe cyane, Karekezi yakomereje ku yitwa "Mercy of the jungle‘’ yegukanye ibihembo bitangwa na African Movie Academy Award ifite icyicaro i Lagos muri Nigeria ndetse iza no kwegukana igihembo kiruta ibindi muri Afurika mu iserukiramuco mpuzamahanga rya sinema FESPACO.

Muri iyi Film Residency yafunguwe kuva tariki 14 kugeza 30 Nzeri 2021 harimo gukorerwa imishinga ya filime enye ngufi z’Abanyarwanda bamwe bari abatangizi, abandi bakaba bafite uburambe muri sinema.

Kugeza ubu aba bahanzi bose barangije icyiciro cyo gufata amashusho (Production) bakaba bagiye kwinjira mu cyo kuzitunganya (Post production).

Joel Karekezi yabwiye IGIHE ko yishimiye uburyo yabashije gukabya inzozi akuzuza iyi Film Residency, ikirenze kuri ibi agashimishwa n’uburyo itangiye gutanga umusaruro mu bahanzi nyarwanda.

Ati"Byaranshimishije cyane gushyira mu ngiro igitekerezo nari maranye igihe cyo gushaka ahantu abahanzi b’Abanyarwanda bashobora kwicara batuje kandi batekanye bafite ubujyanama bakahategurira imishinga yabo mu rwego rwa sinema’’.

Yongeraho ko ikindi cyamushimishije ari uko iyi mishinga usibye kugaragaza impano nshya mu gukina no gukora filime ariko yatanze akazi mu batuye Akarere ka Rwamagana.

Muri bamwe bazwi muri sinema bakinnye muri izi filime ziri gutunganyirizwa muri iyi Film Residency harimo; Gaga Daniel uzwi nka Ngenzi muri filime yitwa Ikigeragezo cy’ubuzima,Israel Dusabimana uzwi nka Papa Trecy muri filimi Impanga,Annualite Uwumukiza ukina yitwa Neza muri filime Ejo si Kera na Uwabeza Leocadia bita Esiteri muri filime Seburikoko zose zica kuri Televiziyo y’u Rwanda.

Ibyishimo ni byose ku banditsi n’abayobozi ba filime zirimo gutunganwa bavuga ko bungukiye byinshi muri iyi Film Residency.

Hakizimana Vincent avuga ko kuba hamwe ari itsinda rikora filime byabafashije gufatanya muri byose bikihutisha akazi.

Avuga kandi ko gukorera hamwe byongereye ubucuti n’imikoranire hagati y’abakinnyi na ba nyiri filime.

Mugenzi we Nambajimana Prosper usanzwe ufite uburambe muri sinema we avuga ko kuba hamwe byabafashije gusangira amakuru y’akazi kabo ka buri munsi bityo bikongera umusaruro.

Ati "Gukorera hamwe dusabana byongereye ubucuti no kwizerana bituma twese dutahiriza umugozi umwe ku intego twari twihaye yo gukora ibihangano byiza’’.

Nambajimana Prosper ufite filime iri gukinirwa i Rwamagana
Hakizimana Vincent nawe ufite filime iri gukinirwa i Rwamagana yishimiye bikomeye iby'iyi Film Residency

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .