00:00:00 IGIHE NETWORK KN KINYARWANDA EN ENGLISH FR FRANCAIS

Filime ebyiri z’Abanyarwanda zatoranyijwe mu zigomba kwerekana kuri Al Jazeera

Yanditswe na Uwiduhaye Theos
Kuya 12 Ugushyingo 2021 saa 05:43
Yasuwe :
0 0

Filime ngufi ebyiri z’abanyarwanda zirimo iyitwa ‘Settling’ ya Amelia Umuhire n’iyitwa ‘The Young Cyclist’ ya Yuhi Amuli zatoranyijwe muri 14 z’Abanyafurika baturuka mu bihugu 11 zigomba kwerekanwa kuri Al Jazeera.

Izi filime ngufi zatoranyijwe muri gahunda ishami ry’Icyongereza rya Al Jazeera ryashyizeho yitwa ‘Africa Direct’ igamije kwerekana ubuzima bwa Afurika mu nguni zose z’imibereho y’abaturage.

Icyiciro cya mbere cyo kwerekana izi filime kizatangira ku wa 30 Ugushyingo kirangire ku wa 4 Mutarama 2021.

Izi filime zivuga ku nkuru zigaragaza imibereho ya Afurika, zikavugwa n’abakora filime muri Afurika bagaruka ku buzima bw’Abanyafurika.

Abanyarwanda batoranyijwe na Al Jazeera ntabwo ari bashya muri sinema kuko bagiye bakora indi mishinga yahatanye ikanerekanwa mu maserukiramuco akomeye ya filime.

Nka filime ya Amuli yitwa ‘Island’ (Akarwa) yahatanye mu 2018 muri Zanzibar International Film Festival Awards na Durban International Film Festival muri uwo mwaka.

Amelia Umuhire we yakoze filime ndende yitwa “Polyglot” yibanda ku mibereho y’abahanzi b’abirabura i Berlin.

Afite indi yitwa “Mugabo" (2016) ivuga ibyo yanyuzemo nko kurokoka Jenoside yakorewe Abatutsi mu 1994.

Yatwaye igihembo cya Best Experimental Film Award mu 2017 muri BlackStar Film Festival i Philadelphia.

Yanerekanywe mu maserukiramuco arimo Film Africa i Londres, Tribeca Film Festival, Premiers Plans D’Angers Festival no muri Geneva International Film Festival aho yahawe igihembo cya Best International Web Series mu 2015.

Filimi ya Umuhire igiye kwerekanwa kuri Al Jazeera irimo umwarimu witwa Dr. Josephine Malonza werekana iterambere ry’Umujyi wa Kigali ariko na Kigali ya kera cyane.

Iya Yuhu Amuli yo igaruka ku mukobwa utwara igare witwa Aliane Mugisha wahoze acururiza ku muhanda muri Kigali.

Izi filime uko ari ebyiri ziri mu bwoko bwa filime mbarankuru. Zakozwe bigizwemo uruhare na Ingrid Falck, ushinzwe ikorwa rya filime nk’izi kuri Al Jazeera English.

Imishinga 300 ya filime yari yatanzwe n’abantu bashaka kugaragaza filime zabo baturutse mu bihugu 31 gusa 14 zirimo n’iz’abanyarwanda aba ari zo zitoranywa ziturutse mu bihugu 11.

Filime ya Yuhi Amuli iri mu zatoranyijwe
Amelia Umuhire ni umwe mu bafite filime ngufi zigiye gutangira kwerekanwa kuri Al Jazeera
‘Young Cyclist’ ya Yuhi Amuli igaruka ku mukobwa utwara igare witwa Aliane Mugisha
'Settling' igaruka ku buzima bw'Abanya-Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .