00:00:00 IGIHE NETWORK KN KINYARWANDA EN ENGLISH FR FRANCAIS

Bahati agiye gusohora filime y’umugabo ukodesha abasore ngo bamuterere umugore inda

Yanditswe na Uwiduhaye Theos
Kuya 14 Ugushyingo 2021 saa 07:19
Yasuwe :
0 0

Bahati Makaca wamenyekanye mu Itsinda Just Family ryakanyujijeho mu Rwanda agiye gushyira hanze filime yise ‘Super Stars’ ikubiyemo ubuzima bw’umuntu w’icyamamare warushinze akabura urubyaro akaza kugenda aha amafaranga abasore ngo batere inda umugore we.

Uyu musore yamaze kurangiza Episode 50 z’iyi filime ubu akaba yiteguye kuyishyira hanze abantu bakayireba.

Yavuze ko ari filime yitondeye mu gihe cy’amezi abiri, kandi ko yayishoyemo arenga miliyoni 6 Frw. Ni filime avuga ko irimo abakinnyi b’amazina azwi, abahanzi bagenzi be n’abandi yakoresheje muri filime ze zirimo ‘Mbaya’ na ‘True Love’.

Bahati avuga ko inkuru y’iyi filime ijya kumera nk’iye, kuko yabaye umuhanzi ariko akaza no kujya mu gukina filime.

Ati “Ni filime ivuga ubuzima bw’icyamamare cyigeze kuririmbaho. Bisa n’aho bisanisha n’ubuzima bwanjye. Ni umusitari waririmbye ariko noneho akaza kubivamo akajya gukina filime. Uyu musitari aza gushaka umugore, yagera mu rugo akabura urubyaro.”

Yakomeje agira ati “Akagera ku rwego rw’aho azajya yishyura abasore ngo baze batere inda umugore we. Hari aho agera akabwira umugore ati ‘rero nzajya nzana abantu mbishyure amafaranga muryamane uzagutera inda tumuhe amafaranga menshi kurushaho noneho aturekere umwana, basi tube mu rugo rufite umwana.”

Bahati wize ibijyanye no gutunganya filime muri Kenya, anavuga ko umugore w’uyu muhanzi na we amusaba uburenganzira akamushakira abakobwa baryamana akabishyira kugira ngo babone umwana.

Muri abo bakobwa, uyu mugore ashaka hazamo n’umukobwa uba warakuze ari umufana w’uyu muhanzi ku buryo we ashegera kuryamana na we adahawe amafaranga.

Ngo uyu mufana birangira yigaruriye urugo, hanyuma umugore mukuru akirukanwa.

Bahati yavuze ko iyi filime ayitezeho gukundwa ashingiye ku kuntu ikoze n’abakinnyi barimo umuraperi Ama G The Black bazayigaragaramo. Avuga ko kugeza ubu hari umushoramari bari kuvugana uzamufasha gucuruza iyi filime ye.

Iyi filime izajya hanze ku wa 19 Ugushyingo 2021, mu muhango uzitabirwa n’ibyamamare uzabera kuri HeartLand Hotel i Nyamirambo muri Kigali.

Kugeza ubu, abarimo umuhanzi Papa Cyangwe, Siperasinya wamenyekanye nka Intare y’Ingore, umukinnyi Byiringiro Lague wa APR FC, umuraperi Sky2 ni bo bamaze kwemeza ko bazitabira uyu muhango wo kwerekana iyi filime.

Bahati wahoze muri Just Family aritegura gushyira hanze filime nshya ivuga ku buzima busa nk’ubwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .