Avengers: Infinity war yitezweho gukuraho agahigo ka Black Panther igiye kwerekanwa mu Rwanda

Yanditswe na Mukaneza M.Ange
Kuya 24 Mata 2018 saa 09:10
Yasuwe :
0 0

Mu gihe abakunzi ba sinema mu Rwanda bakomeje kuryoherwa na Black Panther ikomeje guca ibintu no kwinjiza amafaranga menshi, ibyishimo byabo bigiye gukomereza kuri Avengers: Infinity War igaragaramo benshi mu bakinnyi b’imena muri film zivuga ku ntwari zidasanzwe.

Avengers: Infinity War biteganyijwe ko yerekanwa bwa mbere kuri uyu wa 23 Mata 2018 i Los Angeles muri Leta Zunze Ubumwe za Amerika, izagera mu bindi bihugu tariki ya 27 Mata, ari nabwo abatuye mu Rwanda bazayirebera mu nzu ya Century Cinemas.

Iyi film igaragaramo ubutwari budasanzwe igaragaza ibintu bikomeye byabaye nyuma y’imyaka itsinda ry’abanyembaraga baharanira ubutabera rizwi nka ‘Avengers’ risa n’iryatandukanye, Thanos aza ku Isi gutwara amabuye aba azatuma agira imbaraga zizamuha ububasha buruta ubw’ibindi biremwa byose (Infinity Stones).

Kugira ngo babashe kuburizamo umugambi wa Thanos wo kurimbura kimwe cya kabiri cy’abatuye imibumbe yose yo ku Isi dore ko ikiba kimushimisha cyane ari ukwica, aba Avengers n’abarinzi b’isanzure (Guardians of the Galaxy) baba bagomba guhuza imbaraga.

Iyi film imaze igihe kinini itegurwa ndetse ikaba yitezweho guca agahigo k’izindi film zakozwe na Marvel, igaragaramo benshi mu bakinnyi bagaragaza ubuhanga budasanzwe nka Chadwick Boseman ukina ari Black Panther, Chris Evans ukina ari Capitain Amerika, Iron Man ukinwa na Robert Downey Jr.

Avengers: Infinity War inagaragaramo abandi banyabigwi nka Chris Hemsworth ukina Thor, Black Widow ukinwa na Scarlett Johansson, Mark Ruffalo ukina ari Hulk, yitezweho gukuraho agahigo ko kwinjiza amafaranga kamaze iminsi kihariwe na Black Panther yinjije miliyari 1.324 z’amadolari.

Iyi film izerekanwa na Century Cinemas yanerekanye Black Panther hakoreshejwe ikoranabuhanga rya 3D, kuyireba bisaba kwishyura amafaranga y’u Rwanda 7000 ku muntu.

Uretse iyi kandi iyi nzu yerekana film mu Rwanda ikomeje no kugeza ku batuye u Rwanda izindi zigezweho zirimo Rampage igaragaramo ingagi yitwa George iba yaratoraguwe ndetse ikarerwa na Davis Okoye (Dwayne Johnson), ndetse na ‘7 Days in Entebbe’ igaruka ku rugamba rwo kubohora abanya-Israel bari bafatiwe bugwate muri Uganda mu 1976 (operation thunderbolt).

Ku bisobanuro birambuye cyangwa izindi film nshya biteganyijwe ko zizerekanwa mu Rwanda wasura urubugawww.centurycinemas.rw.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza