Young Grace n’andi makuru mashya y’Imyidagaduro

Yanditswe na

Richard Irakoze

Kuya 22 Ukwakira 2012 saa 08:02
Yasuwe :
0 0

Young Grace yahuje abaraperi b’abakobwa 12 mu ndirimbo “Hip-Hop Game”
Young Grace yashyize hanze indirimbo yamenyekaniyeho yitwa ’Hip-Hop Game’ayisubiranyemo n’abaraperi b’Abanyarwandakazi 12.
Abo baraperi ni El Poeta, Fealess, Sandra Miraji, Iryn, Sister P, Grace Da Queen, Da Pink, Ciney, The Chris, Rap Target, Grace Da Queen n’abandi.
Young Grace avuga ko impamvu yahisemo gusubiramo iyi ndirimbo ari uko yifuje guhuriza hamwe abakobwa b’abaraperi-kazi mu Rwanda ngo batake injyana bakora ya (...)

Young Grace yahuje abaraperi b’abakobwa 12 mu ndirimbo “Hip-Hop Game”

Young Grace yashyize hanze indirimbo yamenyekaniyeho yitwa ’Hip-Hop Game’ayisubiranyemo n’abaraperi b’Abanyarwandakazi 12.

Abo baraperi ni El Poeta, Fealess, Sandra Miraji, Iryn, Sister P, Grace Da Queen, Da Pink, Ciney, The Chris, Rap Target, Grace Da Queen n’abandi.

Young Grace avuga ko impamvu yahisemo gusubiramo iyi ndirimbo ari uko yifuje guhuriza hamwe abakobwa b’abaraperi-kazi mu Rwanda ngo batake injyana bakora ya Hip-Hop.

Yagize ati “numvise kuba nayikorana n’abakobwa bagenzi banjye tukayikorana byaba byiza kurushaho kandi by’akarusho b’abaraperi tugataka hip-hop yacu kuko twafashe icyemezo mu kurapa.”

Young Grace avuga ko muri iyi ndirimbo nshya buri mukobwa yagiye agaragaza umwihariko we kugira ngo iryohe.

Yagize ati “akarusho kuri iyi ndirimbo ni swagga z’abantu batandukanye buri wese afite uburyo yinjiramo kandi ndizera ko Abanyarwanda bazayikunda. Mpamya ko buzashimisha abakunzi b’umuziki nyarwanda.”

Young Grace avuga ariko ko umwe mu baraperi bakomeye mu bakobwa, Paccy Oda, we atagaragara muri iyi ndirimbo kubera impamvu ze bwite.

Yagize ati “Paccy ntarimo kubera ko atabishatse ku mpamvu ze bwite twaganiriyeho nk’abakobwa, ariko yarabinsobanuriye ndabyumva, nta kibazo kirimo.”

Iyi ndirimbo Hip-Hop Game", wakumva HANO kuri IGIHE, yakozwe na Davydenko, muri Studio F2K Studio i Nyamirambo.

Iyi ndirmbo niyo Young Grace yahereyeho. Yamuhesheje amafaranga ibihumbi magana atatu (300,000Rwf) nk’indirimbo yasabwe n’abantu benshi mu matelefone yabo (Caller Tune) muri MTN mu itangwa ry’ibihembo bya Salax Awards 2011.

Iri mu ndirimbo zamuhesheje igihembo cy’umuhanzi ukizamuka mu Rwanda muri Salax Awards 2010.

Andi makuru avugwa mu myidagaduro...


Kurwanira muri Studio Ibisumizi byatumye TMS yirukanwa ku kazi
TMS na Riderman

TMS wakoraga nk’uwakira abakiriya n’ushinzwe ibikorerwa muri studio ya Riderman Ibisumitsi aheruka guhagarikwa kubw’imyitwarire mibi irimo kurwana no kunywera inzoga muri studio nk’uko Riderman abivuga.

TMS we yamagana ibi, avuga ko Riderman atigeze atungura ijambo rivuga ko amuhagaritse. TMS avuga ariko ko atakiri muri Studio Ibisumizi, ko ahubwo ari kwita ku gutegura ibihangano bye.

Aganira na IGIHE, Riderman yavuze ko yahagaritse TMS, mu kwezi gushize mbere y’uko ajya muri Leta Zunze Ubumwe z’Amerika.
Yagize ati “byabaye mbere y’uko nanagenda muri Amerika. Afite uburyo yitwaye butari bwiza yarwanye n’abantu barwanira kuri studio byatumye rero ahagarikwa.”

TMS we avuga ko iby’uko ngo yaba yaritwaye nabi ari ugushaka gusebanya kuko atarwanye. Avuga ko hari umuhanzi witwa Tarza baheruka gushyamiranira muri Studio Ibisumizi, ariko ko byari mu nyungu z’akazi.

Yagize ati “njye ntabwo ride yigeze ahohora mu kanwa ke ijambo ngo yaranyirukanye. Ibyo njyewe ndumva ari ugusebanya”.


The Ben, Meddy, K8 Kavuyo na Lick Lick basigaye babana i Chicago
K8 kavuyo, The Ben na Meddy

Meddy yaraye atangaje ko yimutse akava Texas akajya kubana na The Ben hamwe na Lick Lick i Chicago mu rwego rwo gufatanyiriza hamwe ngo akazi k’ubuhanzi kaborohere.

Ibi yabivugiye nijoro ku Cyumweru mu kiganiro Sunday Night cya Radio Isango Star.

Meddy yagize ati “tuba hamwe dufatanyiriza hamwe, ubundi njye nabaga Texas ariko ubu ngubu twarimutse dusigaye tubana”.

Yongeyeho ko na Cedru ateganya kuzabasangayo, bakabana.

Umwe mu bazi neza aho baba, avuga ko baba mu nzu nziza nini cyane ishobora no kwakira abashyitsi.

Meddy yavuze ko ari kwiga mu mwaka wa mbere wa Kaminuza mu ishami rya Computer Science. Yavuze kandi ko anakora akazi kajyanye n’ikoranabunga IT; aho yavuze ko akorana na Kampani ikorana na Apple.

Muri iki kiganiro cyo kuri telefone Meddy yasobanuye ko ako kazi akora kamutwara umwanya munini ku buryo ari yo mpamvu atagiye akunda gutangaza amakuru ye kenshi. Meddy yavuze ko mu minsi ya vuba bateganya kuzasohora indirimbo iri mu rurimi rw’Icyongereza, we na The Ben.

Yanagarutse ku by’urukundo n’abakobwa b’abazungukazi, avuga ko badafite abagore nk’uko byahwihwishwe, ko ahubwo we afite umunyamerikakazi bakunda kuba bari kumwe ariko bitaravamo gukundana bisesuye (girlfriend).

Yavuze ko bateganyaga kuza mu Rwanda mu Kuboza ariko ko umwanya wababanye muto ku buryo bateganya ko bashobora kuzaza muri Gashyantare, bagakora ibitaramo, bagasubira muri Amerika.


Gushyira umudiho wa Kinyarwanda mu ndirimbo ye byatumye ica mu bitangazamakuru mpuzamahanga

Audy Kelly avuga ko indirimbo ye “Ndakwitegereza” imaze guca mu bitangazamakuru mpuzamahanga nka BBC n’Ijwi ry’Amerika “Voice of Amerika”.

Uretse aha, iyi ndirimbo ye avuga ko yageze kure, aho avuga ko abantu bo mu bihugu byo mu Burayi nk’u Bubiligi bakunda kumuhamagara bamubwira ko bayikunze.

Avuga ko yaciye kandi kuri Televiziyo ya Citizen yo muri Kenya, mu Burundi no muri Congo, kandi ko bakunda kumuhamagara cyane.

Aganira na IGIHE, Auddy yavuze ko iyi ndirimbo ye yagerageje kuyigira umwihariko wo mu Rwanda. iyi akaba ari yo mpamvu avuga ko akeka ko ari yo yatumye ica muri ibyo bitangazamakuru bitandukanye.

Yagize ati “harimo umuco, nashatse uburyo nashyiramo umuco nyarwanda mbikoze ku mutwe wanjye. Amasunzu y’abasore bajyaga kurambagiza.”

Auddy arateganya gushyira hanze indirimbo nshyashya yitwa “Usa Neza”.

Arateganya kandi gukora igitaramo mu mpera z’umwaka.


B-Gun bahugiye ku gutunganya Album yabo bise “Next-Level”

Abahanzi bagize itsinda rya B-Gun baratangariza abafana babo ko muri iki gihe hari indirimbo nshyashya babahishiye gushyira hanze n’amashusho y’indirimbo zabo mu gutegura album nshya “Next-Level”.

Izo ndirimbo nshya bateganya gushyira hanze mu minsi ya vuba zirimo indirimbo bakoranye na Washington n’izindi.

Bavuga kandi ko muri iki gihe bari gushyira hanze amashusho y’indirimbo “Bwiza Bwanjye” baririmbanye na Tom Close. Bavuga ko nicyo duhugiyeho, turateganya kuyishyira hanze.

M-Cool, umwe mu bahanzi bagize iri tsinda aganira na IGIHE yagize ati “Tukayitondera. Abakunzi nabasaba ko bakomeza kudufasha, bakadusengera, bagakomeza kudukunda nk’uko natwe tubakunda.”


Amashusho y’indirimbo “Buri Buri” ni ukuri kw’ibyabaye kuri Bahati wo muri Just Family

Mu mashusho y’indirimbo “Buri Buri” ya Just Family harimo umukobwa w’inshti (girlfriend) ya Bahati uririmba muri iri tsinda.

Uyu mukobwa witwa Umumararungu Sandra niwe ugaragaramo cyane nk’umukinnyi w’ibanze muri Video.

Aganira na IGIHE, Bahati yavuze ko yari yatandukanye nawe, ariko bikamwanga munda akamuhimbira iyi ndirimbo amubaza impamvu amusize wenyine “buri buri”. Amaze kuyimuririmbira, uyu mukobwa Sandra yaje kubitekerezaho nuko amusaba ko bakwiyunga.

Mu gukora amashusho y’iyi ndirimbo, Bahati yaje gusaba Sandra ko yaba ari we ugaragara mu mashusho y’iyi ndirimbo ari nako byaje kugenda. Bahati yagize ati “ni ukuri kw’ibyambayeho, ariko ubu tumeranye neza, indirimbo yaratwunze.”

Croidja, uririmbana na Bahati muri Just Family, aganira na IGIHE yavuze ko amashusho y’iyi ndirimbo aje ategura kumurika Album yabo nshya kuwa 3 Ugushyingo 2012, i Rubavu.

N’ubwo zimwe mu ndirimbo zizajya kuri iyi album nka “Buri Buri” ziri hanze mu mashusho, Croidja avuga ko batarasohora indirimbo izitirirwa iyi Album yabo nshya bateganya gushyira hanze mu byumweru bibiri gusa.


Dj Zizou Alpacino yitirirwa indirimbo ataziririmbyemo
Dj Zizou ny'irindirimbo "Bagupfusha Ubusa"

Umwe mu bantu bakurikiranira hafi ibya muzika mu Rwanda, by’umwihariko akaba azwiho kuba ari umwe mu ba Dj bazwi cyane hano mu Rwanda, Dj Zizou ari kugenda agaragaza udushya twinshi mu muziki nyarwanda.

Ubu noneho, uyu Dj Zizou amaze gushyira hanze indirimbo eshatu zigakundwa we ataziririmbyemo, nyamara zitwa ko ari ize.

Izi ndirimbo Zizou azikorana n’abandi bahanzi basanzwe bakunzwe hano mu Rwanda ari nabo bazimuhimbira, bagendeye ku gitekerezo cye, bakanazimuririmbiramo zikamwitirirwa.

Izo ndirimbo ni: “Urwandiko” yumvikanamo Ally Soudy, Urban Boyz, Riderman, Pacy Oda, Sandran Miraji, Mani Martin, Kamichi, Uncle Austin na TMC.

Iya kabiri ni “Arambona Agaseka” irimo Kitoko, Kamichi, Pacy Oda, Social, Fire Man, Ama-G The Black, Ciney, Babou, TNP (Trecy na Paccy), Bull Dog, Sandra Miraji, Dream Boyz (Platini na TMC), Neg-G the General na Riderman.

Iya gatatu ni iyitwa “Bagupfusha Ubusa” irimo King James, Safi, Humble G, Ama-G The Black, Princess Priscilla, Fire Man na Uncle Austin. “ Amashusho yayo akaba ari hanze.

Video ya "Bagupfusha Ubusa", indirimbo ya mbere Princesse Priscilla agaragayemo aririmba

Kuri ubu amaze no gushyira hanze indi ndirimbo nshya yitwa “Uzagace-akabaruwa” yaririmbiwe na Kitoko.

Aganira na IGIHE, Zizou (wigeze no gukora kalendari zamamaye cyane mu Rwanda ziriho amafoto y’abastar) avuga ko kuba indirimbo zimwitirirwa ataziririmbamo nta kibazo biteje. Avuga ko izo ndirimbo ari ize kuko ari we uba wazanye igitekerezo cya mbere, agashaka abahanzi, akabahuza, akakibagezaho ndetse akishyura ibijyanye n’ikorwa ry’izo ndirimbo zose.

Yagize ati “Igitekerezo mbere na mbere nicyo cy’ingenzi.” Zizou avuga ko ibi abikora mu rwego rwo kuzana udushya twe mu muziki nyarwanda ngo urusheho kuryoha. Avuga kandi ko ari no mu rwego rwo kwagura umuziki nyarwanda.

Zizou arateganya gushyira hanze CDs z’amashusho y’uruvange rw’indirimbo zakunzwe cyane mu Rwanda, mu karere no ku isi mucyo yise Zizou+


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza