Lion, Alpha na Christian baremeza ko Kalimba ashobora kwegukana Tusker Project Fame

Lion, Alpha na Christian baremeza ko Kalimba ashobora kwegukana Tusker Project Fame


Yanditswe kuya 5-07-2012 - Saa 18:33' na Ally Muhawe

Ibi Lion Imanzi, Rwirangira Alpha na Rwirangira Christian Robert babitangaje mu biganiro bagiranye na IGIHE mu minsi itandukanye y’iki cyumweru.

Alpha wegukanye iri rushanwa muri 2010 yavuze ko Kalimba Jackson ameze neza ku buryo ashobora kuzegukana TPF 5 (Tusker Project Fame ku nshuro yayo ya gatanu); Lion w’umushushyarugamba nawe yunga mu rye avuga ko kubera ubuhanga n’ubumuntu bwe ashobora kuzegukana umwanya wa mbere; Naho Christian witabiriye iri rushanwa hamwe na Alpha, avuga ko bizaterwa n’amahirwe, ngo gusa aramutse ataje muri babiri ba mbere baba bamwibye.

Alpha yagize ati: “Jackson ameze neza kabisa, uriya ashobora no kugitwara. Ndamuzi kuva cyera; muzi muri studio kuri MVi production, icyo gihe twakorerwaga na Junior i Kagarama ku Kicukiro.”

Yongeyeho ati: “Ebana azi kuririmba kandi aca bugufi cyane, afite ibikenewe byose kugira ngo ajyere aho ashaka, hanyuma muzi anaririmba muri Guma Guma. Gusa ikiruta byose muzi nk’umuntu ukunda Imana.”

Lion we yagize ati: “Kalimba ni umuhanga, ufite ijwi ryiza kandi akagira n’umwihariko wo kuriyobora (kuba yarizamura cyangwa akarimanura); uretse ibyo kandi n’uw’ igikundiro ku buryo amaze kugira abafana benshi. Bityo mbona afite amahirwe menshi yo kuzegukana irushanwa.”

Mu butumwa yahaye Abaturarwanda, Lion yagize ati: “Dukwiye kumutera ingabo mu bitugu, byazaba ngombwa ko tumutora, tukamutora. Ibyo tukabikora tutabikoreye ko ari Umunyarwanda gusa, ahubwo tubikoreye ko ari Umunyarwanda kandi ushoboye.”

Christian nk’umwe mu bahanzi b’Abanyarwanda bigeze kwitabira iri rushanwa, ndetse akaba kuri ubu arikurikiranira hafi, yagize icyo avuga ku irushanwa muri make ndetse nawe agira icyo avuga kuri Jackson.

Ku byerekeye irushanwa, Christian yavuze ko ubundi abakemurampaka bita ku bintu bine ari byo: Uburyo umuntu aririmba amagambo y’indirimbo yasubiyemo (Lyrics), Imiririmbire ye (vocal range), Uburyo yitwaye ku rubyiniro(stage performance) ndetse n’uburyo ukoresha mikoro (mbese kumenya kuyegereza umunwa igihe bikenewe no kuyishyira kure yawo mu gihe bikenewe).

Kubera izo mpamvu, Christian yavuze ko Kalimba ari muri babiri ba mbere kuko uwo bagwa miswi ari Umunyakenya Ruth Matete ngo gusa ashobora kumurushiriza ku Cyongereza azi neza, mu gihe Kalimba akigerageza.

Christian yavuze ko aramutse avanywemo, bariya bandi batandatu barisigayemo bakirimo baba bamwibye. Impamvu ngo ni uko Jackson arusha abo bandi batandatu basigaye mu irushanwa (yaba muri 4 basigaye muri Academy no muri 4 bashyizwe muri probation), ngo kandi hakaba hatabarwa amajwi y’abafana gusa, kuko n’iyo abafana batagutora ushoboye, abarimu (faculty) bashobora kuguha amahirwe yo kuguma mu irushanwa biturutse ku buhanga ufite.

Twabibutsa ko irushanwa Tusker Project Fame ku nshuro yaryo ya gatanu (TPF 5) rigeze muri Top 8 (hasigayemo abantu umunani), kuwa Gatandatu Tariki 30 Kamena 2012 nibwo hasezerewe babiri bari mu rutegererezo (probation) rw’icyumweru cyari giherutse, urwo rutegerezo rwarimo n’abandi baririmbyi barimo na Kalimba Jackson warokowe n’abaririmbyi bagenzi be, nyuma y’uko atari yatowe bihagije n’abafana.

Ku munsi wakurikiyeho ku Cyumweru, nk’uko bisanzwe muri iri rushanwa, abo baririmbyi bose uko ari umunani basigaye mu irushanwa bararirimbye maze bane bashyirwa mu rutegererezo, abandi bane barimo na Kalimba barakomeza (baguma muri academy).

Ubu kuri uyu wa Gatandatu niho abo bane bashyizwe mu rutegererezo bazasubiramo izo baririrmbye ubundi bitewe n’amatora y’abafana, ay’abaririmbyi bagenzi babo ndetse n’ay’abarimu (faculty), umwe akazahita asezererwa mu irushanwa, batatu bagakomeza. Abo batatu bazahita biyongera kuri ba kalimba maze bose babe barindwi, abo barindwi akaba ari bo bazaririmba kuri iki Cyumweru, muri bo hakavamo abakomeza n’abajya mu rutegererezo.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO