kwamamaza
Indirimbo nshya nyarwanda zakwinjiza muri Weekend

Indirimbo nshya nyarwanda zakwinjiza muri Weekend


Yanditswe kuya 21-08-2021 - Saa 08:47' na Uwiduhaye Theos

Muri uwo mujyo IGIHE yahisemo gusangiza abakunda umuziki w’ingeri zitandukanye indirimbo zabafasha muri izi mpera z’icyumweru mu gihe baba bari mu rugo cyangwa ahandi hantu hatandukanye.

Zirimo izihimbaza Imana, izisanzwe nka Hip Hop, Afro Beat n’izindi izo ari zo zose.
La Vida Loca

Iyi ndirimbo y’umuhanzikazi Uwayezu Ariel wamamaye nka Ariel Wayz ni imwe mu zagiye hanze kuri uyu wa Gatanu. Iyi ndirimbo iganisha ku rukundo. Ije ikurikira indi yaherukaga guhuriramo na Juno Kizigenza.

Ariel Wayz yavukiye mu Karere ka Nyarugenge mu Mujyi wa Kigali mu 2000. Ni uwa Gatandatu mu bana barindwi bavukana na we. Yasoje amasomo y’umuziki ku Nyundo mu 2018. Mu buhanzi bwe afatira urugero kuri Bruno Mars ndetse n’umwongerezakazi Ella Mai Howell.

Seriye

Iyi ndirimbo ni iy’umuhanzi Iradukunda Javan ukoresha amazina ya Javanix. Iri kuri album ya mbere y’uyu muhanzi. Ikubiyemo ubutumwa bwo guhwitura abasore n’inkumi bo muri iyi minsi.

Uyu musore akorera umuziki mu Ntara y’Iburengerazuba, mu Karere ka Rusizi. Yavutse mu 1995.

Yatangiye umuziki agisoza amashuri yisumbuye gusa aza gusa n’ugenje gacye kuko yahise ajya kwiga muri Kaminuza y’u Rwanda ishami ry’uburezi mu 2015 aza kongera kujya mu muziki mu 2018.

Ubu afite album y’indirimbo 11 n’izindi zakozwe mbere gato y’uko ajya kwiga. ‘Seriye’ ni indirimbo yakozwe na Captain P, amashusho akorwa na Director XB.

Nderuye

Ni imwe mu ndirimbo ziri kuri Extended Play [EP] umuhanzi Kaligombe aheruka gushyira hanze, yayihuriyemo na M Kay Igisonga biganye umuziki ku Nyundo. Ni indirimbo ivuga ku bantu bamwe banga kuvuga abantu bahari bagahitamo kubavuga bagiye.

Uyu muraperi ubusanzwe witwa Munyurangabo Steven uri mu barangije mu cyiciro cya mbere cy’abize umuziki ku Nyundo, yaherukaga gushyira hanze EP iriho indirimbo eshatu zirimo n’iyi ye nshya.

Iyi EP uyu musore yayise ‘Mba ndi mu kazi petit’ indirimbo yanitiriwe. Iriho izindi nka ‘Intro’.

Mi Casa

Kuri uyu wa Kane tariki 19 Kanama, Muneza Christopher uzwi mu muziki w’u Rwanda nka Christopher wari umaze umwaka urenga adasohora indirimbo, yashyize hanze indirimbo nshya yise ‘Mi casa’.

Uyu muhanzi yaherukaga gushyira hanze indirimbo tariki 14 Gashyantare 2020 ubwo yasohoraga iyitwa ‘Breath’, nyuma yayo yahise aburirwa irengero n’abakunzi b’umuziki we.

Iyi ndirimbo ‘Mi casa’ Christopher yasohoye yakozwe na Producer Element, amajwi atunganywa neza na BOB Pro mu gihe amashusho yayo yo yafashwe anatunganywa na Bagenzi Bernard.

Isonga UTB

Ni indirimbo y’umuhanzikazi Wanny. Yayihimbye nyuma yo gusoza amasomo y’icyiciro cya kabiri cya Kaminuza muri Kaminuza y’Ubukerarugendo, Ikoranabuhanga n’Ishoramari (UTB). Ni indirimbo yahimbiye iri shuri yigagamo yafatanyije na Riderman.

Yabwiye IGIHE ko yayikoze ari nk’impano ku kigo yigagamo, ati “ Nk’umunyeshuri usorejeyo nifuje kubakorera indirimbo nk’umuhanzi na bo baranshyigikira. Gukorana na Riderman nasanze tuyifatanyije ari byo byiza kubera uko urubyiruko rumufana harimo n’abanyeshuri ba UTB.”

Umukobwa witwa Umutoni Alice wahisemo kuza mu muziki yitwa Wanny, afite imyaka 22. Yaherukaga gushyira hanze indirimbo yise ‘Umwiza’.

Hahiye

Iyi ni indirimbo y’abanyabirori y’umuhanzi Sody Utuje yafatanyije na B-Threy. Ni indirimbo yagenewe abanyabirori.

Sody Utuje ari na we nyiri iyi ndirimbo ari mu bahanzi bari kuzamukwa azwi cyane mu magambo atangira ( intro) y’indirimbo ya Pacson yitwa ‘Go Hard’. Ni umwe mu batanga icyizere mu minsi iri imbere nyuma yo gushyira hanze zimwe mu ndirimbo ze za mbere zirimo n’iyo yahimbye arwaye kwa muganga.

Yakoze indirimbo zirimo iyitwa muri ‘Muri Ghetto’, ‘Gute?’ n’izindi zitandukanye. Uyu musore avuga ko afite gahunda yo gukomeza gukundisha abantu Hip Hop, we avuga ko ari yo ‘ya nyayo’.

Brigade

Iyi ndirimbo uyu muhanzikazi yashyize hanze agaragaza ko yari yihebye ubwo icyorezo cya COVID-19 cyatangiraga kuganza Isi ndetse akibaza uko ubuzima buzamera mu gihe azaba yigunze ari mu nzu.

Hari aho avuga ukuntu ibibazo byabaye ibindi ndetse ushaka kumenya byinshi yabaza aba-dj bakora mu tubyiniro ubu twabaye amatongo.

Muri Mata uyu muhanzikazi yari yasezeye muri The Mane ariko hashize ukwezi kumwe ayisubiramo. Icyo gihe yahise ashyira hanze indirimbo yise ‘Sorry’. Marina yinjiye muri The Mane mu 2017 nyuma y’iminsi mike atangiye umuziki.

Abakunda indirimbo zihimbaza Imana na bo bakwinjira muri week-end bumva zimwe mu zagiye hanze:

Ndakomeye

Iyi ni indirimbo y’umuhanzi mu ndirimbo zihimbaza Imana witwa Byishimo Patrick. Iyi ndirimbo nshya igaragaza ko umuntu uri muri Yesu aba abayeho mu buzima bwiza.
Yari asanzwe akora muzika ariko adahozaho, kuri ino nshuro yatangaje ko agiye gukora muzika ihimbaza Imana mu buryo bwo guhozaho, akaba ashingira ku impamvu imwe yo kuba yarabonye umujyanama uzamufasha aho yari asanzwe afite intege nke.

Komeza intambwe zanjye

Iyi ndirimbo yahimbwe mu 1997, ubwo Théodose Mwitegere wayihimbye yari atangiye urugendo rwo kuba Padiri mu Iseminari Nkuru.

Théodose Mwitegere yayihimbye ari gusaba Imana ngo imukomereze intambwe mu nzira yo kwiyegurira Imana. Icyo gihe yari amaze kumva ko umutima we wari urarikiye Imana ku buryo azanyurwa ari uko abanye na yo.

Ni indirimbo itanga ihumure, injyana yayo n’amagambo akubiyemo bifasha umuntu cyane cyane uri mu bihe bigoye nk’ibi byacu kwiragiza Imana no guhumurizwa na yo.

Umuhanzi w’iyi ndirimbo afite indirimbo nyinshi, avuga ko zikabakaba magana abiri na mirongo itanu. Umuhanzi Théodose Mwitegere avuga ko iyo ahimba aba agamije gufasha abakristu gusenga.

Mu bindi bikorwa bya Padiri Théodose Mwitegere harimo ibitabo yanditse. Icyitwa “Mundebereho” (Mt 11, 29), cyandikiwe gufasha umukristu kurebera kuri Yezu Kristu mu mpande zose z’ubuzima bwe. Cyasohotse umwaka ushize muri Kanama. Ikindi cyitwa “Naganiriye na Padiri Théodose Mwitegere”, gikubiyemo ibisubizo Padiri yahaye umuntu baganiraga, amubaza ibibazo ku ngingo nyinshi z’ubukristu. Cyasohotse uyu mwaka muri Kamena.

Théodose Mwitegere ni umupadiri wa Diyosezi ya Nyundo. Yahawe ubupadiri mu 2003. Nyuma yo kuba Padiri, yakoreye ubutumwa muri Paruwasi Mukungu, muri 2009 ajya kwiga muri Kaminuza i Roma, aho yavanye impamyabushobozi y’Ikirenga (Doctorat) mu bijyanye no gusesengura Bibiliya. Nyuma yaho yoherejwe kwigaisha mu Iseminari nkuru ya Nyakibanda mu mwaka wa 2017.

Kuva mu 2019 kugeza ubu ashinzwe ububiko bw’inyandiko ndetse n’iyogezabutumwa rya Bibiliya muri Diyosezi ye ya Nyundo.

Umwiza Ubaruta

Ni indirimbo y’itsinda rya Roberto & Salome. Iri tsinda rya Marie Salome Iratwibuka ndetse na Robert Nshimiyimana rigamije kwagura umuziki wo muri Kiliziya Gatolika ugashinga imizi.

Iyi ndirimbo yabo nshya nk’uko izina ryayo ribivuga, (umwiza ubaruta) ikubiyemo amagambo meza ataka umubyeyi Bikiramariya.

Marie Salome Iratwibuka yagize ati “Kuri twe, Bikiramariya umubyeyi ukomeye cyane, twemerera ko ari mu ijuru hamwe n’umwana we, kandi ko ahora adusabira. Iyi ndirimbo kandi ni isengesho, tumusaba gukomeza kudukunda cyane cyane twe Abanyarwanda.”

IBITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!